Li ta 13 yuʼun septiembre ta 2014 nel yuʼunik li chanun 137 li ta Chanob vun sventa Vivlia ta Galaad, ti jaʼ te echʼ yuʼunik li ta smeʼ chanubtasel yuʼun li stestigotak Jeova ta Patterson (Nueva York). Li chanun taje jaʼ sventa chichʼik chapanel lek li stestigotak Jeova ti jal xa tunemik tal ta stojolal Diose, vaʼun chichʼik takel batel ta tsobobbailetik xchiʼuk ta Beteletik sventa stsatsubtasbeik xchʼunel yoʼonton li ermanoetike. Li tsobajel taje te laj yichʼ etʼesel ta Patterson xchiʼuk laj yichʼ jelubtasel batel ta Canadá, Estados Unidos, Jamaica xchiʼuk ta Puerto Rico sventa tskʼelik ek. Ta skotole la stsob sbaik 12,333.

Li Samuel Herd, ti jaʼ jun li ta Jtsop Jbeiltasvanej yuʼun Stestigotak Jeovae, jaʼ laj yal ti buchʼutik chetʼesik mantale. Kʼalal la slikes sloʼile laj yal ti mu jtabetik ta be li snopben Jeovae (Isaías 55:8, 9). Laj yal ti akʼo mi voʼob u la snojes snopbenik li ta smantaltak Jeovae, pe uni juteb noʼox la staik ta ojtikinel (Job 26:14). Jech xtok, laj yal ti ta onoʼox jtabetik sbalil kʼalal ta jtsob jbatik sventa chkalbetik skʼoplal li kʼusi tsnop Diose. Li mantal liʼ eke ta jtabetik sbalil.

«Li talelaletik chakʼ chʼul espiritue jaʼ [...]: stsʼikel [o smalael]» (Galatas 5:22). Li mantal la sjelubtas li ermano John Larson, ti jaʼ Komite sventa Betel ta Estados Unidose, laj yalbe smelolal chaʼtos kʼuxi xuʼ xkakʼ ta ilel ta jkuxlejaltik li jtos stalelal xchʼul espiritu Diose, ti jaʼ li smalael. Li baʼyele jaʼ ti oyuk smalael kuʼuntik ta stojolal Jeova kʼalal yakal chchanubtasutike xchiʼuk kʼalal tstsatsubtas xchʼunel koʼontontike (1 Pedro 5:10). Kʼalal yakal chchanubtasat yuʼun Jeova li Abraane laj yakʼ ta ilel ti oy smalael yuʼune xchiʼuk la smala kʼusi ora chkʼot ta pasel li kʼusi albate (Evreos 6:15).

Li xchibale jaʼ ti skʼan oyuk smalael kuʼuntik ta jtuktik noʼoxe. Li buchʼutik jaʼ to nel yuʼunik li chanune xuʼ van ep kʼusitik tskʼan tspasik ta skoj ti laj yichʼik chanubtasele. Mi muʼyuk lek kʼusi kʼot ta pasel avuʼunik ti bu chavichʼik takel batele, xuʼ van xi chajakʼbe abaike: «¿Kʼu yuʼun ti jech chkʼot jtojolal taje?». Ta skoj ti oy jech kʼotem ta xkuxlejal li ermano Larsone, laj yalbe li jchanunetik ti mi oy smalael yuʼunike xchiʼuk mi jech-o tsots ch-abtejik batel ta stojolal Jeovae chkoltaatik xchiʼuk xuʼ stsal yuʼunik li vokoliletik tsnuptanike (Evreos 6:11, 12).

«Jaluk chʼian kʼopojanik xchiʼuk bikʼituk-o me xavak abaik.» Li Anthony Morris, ti jaʼ jun li ta Jtsop Jbeiltasvanej eke, te la slokʼes ta salmo li mantal la sjelubtase, xi chal li slajeb versikuloe: «Jaluc jabil chʼian [kʼopojanik]» (Salmo 22:26, Sc’op Dios ta Chamula). Sventa jtatik li bendision taje skʼan bikʼit xkakʼ jbatik. Li ermano Morris laj yal ti skʼan bikʼit chkakʼ jbatik yoʼ stunesutik li Jeovae. Mu ventauk mi jal xa chijtun ta stojolal Dios o mi jutuk to, xuʼ me xchʼay ta joltik ti tsots skʼoplal skʼan jechuk jtalelaltik kʼuchaʼal Jesukristoe (2 Pedro 1:9).

Li Vivliae chal ti oy buchʼutik bikʼit laj yakʼ sbaike xchiʼuk ti oy buchʼutik la stoy sbaike. Jun skʼelobile, li Erodes Agripae la stoy sba tajek yuʼun la xchʼam kʼalal muyubtaat yuʼun li krixchanoetike, akʼo mi jaʼ noʼox sta-o jechuk li Diose. Ta skoj taje yayijesat yuʼun jun anjel xchiʼuk lik tiʼatuk ta xuvit (Echos 12:21-23). Pe kʼalal la stukʼibtas Pedro li Jesus ta skoj ti maʼuk tsnop «li snopben Diose, [ti jaʼ tsnop ] li snopben krixchanoetike», yaʼeluke muʼyuk chopol laj yaʼi li Pedroe xchiʼuk muʼyuk ilin-o (Mateo 16:21-23). Bikʼit laj yakʼ sba xchiʼuk la xchʼam li tukʼibtasele. ¡Jaʼ jun slekil kʼelobil kuʼuntik! (1 Pedro 5:5.)

Li buchʼutik nel yuʼunik li chanune, li jlome chbat tunikuk ta Betel yuʼun stestigotak Jeova. Li ermano Morris laj yal ti muʼyuk xmuyubaj chtunik ta Betel mi muʼyuk bikʼit chakʼ sbaike. Akʼo mi jech, xuʼ me mu xkakʼtik lek venta mi bikʼit kakʼoj jbatik. Sventa xalbe lek smelolal taje, li ermanoe laj yal ti oy xa ta epal jabile oy jun mol ta tsobobbail ti laj yichʼ tojobtasel ta skoj ti jtoybae, vaʼun xi tsʼibaj batel ta Betele: «Chʼabal yan vinik ti mas bikʼit yakʼoj sba jech kʼuchaʼal li Voʼone». Li ermano Morris laj yalbe li jchanunetik ti mu jechuk xakʼ ta ilel stalelalik kʼuchaʼal taje. Kʼalal mi te ta snopbenik ti mas tsots yabtel yichʼoj li Jeova xchiʼuk li Jesuse jaʼ chkoltaatik sventa mu stoy sbaik ta skoj li yabtel yichʼojike xchiʼuk chkoltaatik yoʼ bikʼit xakʼ sbaik.

«Muʼyuk spajeb chakʼ li xchʼul espiritue» (Juan 3:34). Li jchanubtasvanej, Michael Burnett, laj yalbe li jchanunetik ti chkoltaatik yuʼun chʼul espiritu sventa stsalik li vokoliletik tsnuptanike xchiʼuk kʼalal mi mu snaʼ kʼusi tspasike. Kʼalal la smeltsan chʼulna pasbil ta nukul li Bezalel eke jaʼ koltaat yuʼun li chʼul espiritu sventa tsal yuʼun li vokoliletik la snuptane (Éxodo 35:30-35). Koltaat sventa mas xtojob ta spasel li yabtele xchiʼuk ta xchanubtasel li yantike. Li buchʼutik naka to nel yuʼunik chanune chkoltaatik me yuʼun chʼul espiritu mi jech chchanubtasvanik kʼuchaʼal chal Vivliae, jech kʼuchaʼal laj yichʼik albel ta chanune.

Li ta skʼakʼalil Vivliae, li antsetik ta Israele ep la skolta sbaik kʼalal laj yichʼ meltsanel li chʼulna pasbil ta nukule (Éxodo 35:25, 26). Jaʼ jech li ermanaetik ti ayik ta chanun eke, li stukike yakʼojik ta ilel ti oy lek spʼijilik ta skoj ti tskolta li smalalike. Kʼalal tsuts sdiskurso li ermano Burnett xi laj yale: «Bikʼit me xavakʼ abaik ta sventa li kʼusi xanaʼik spasele xchiʼuk chʼunik me mantal. Mi jech chapasike, ep me chakʼboxuk s-espiritu li Jeovae».

«¿Mi xuʼ xij-akotaj?» Li Mark Noumair, ti jaʼ yajkoltaobba Komite sventa Chanubtasele, laj yalbe skʼoplal kʼalal laj yal ajvalil David ti akʼo xichʼ ichʼel batel ta Jerusalen li xkaxail smantal Diose (2 Samuel 6:12-14). Kʼalal yakal ch-och ta jteklum li xkaxail smantal Diose, li ajvalile laj yakʼ iluk ti bikʼit yakʼoj sba kʼalal akʼotaj xchiʼuk li ‹smosotak skiaratake› (2 Samuel 6:20-22). Li antsetik taje mu van xchʼay ta sjolik li kʼusi kʼot ta pasel li vaʼ kʼakʼale. Vaʼun, li ermano Noumair la stijbe yoʼonton li jchanunetik ti akʼo x-akʼotajik xkaltik xchiʼuk li mosoiletike. Xi la sjakʼanbee: «¿Mi ta van xavichʼik ojtikinel ti oy ta avoʼontonik skoltael li buchʼutik jutuk noʼox yuni abtelike? [...] ¿Mi ep van sbalil chavilbeik li stalelaltak yantik ermanoetike?».

Mi jech laj yakʼik ta ilel kʼanelal li jchanunetike, yakal me chchanbeik stalelal li Jeovae (Salmo 113:6, 7). Akʼo mi oy bu tstaik ta chiʼinel ta loʼil jlom krixchanoetik ti jtoybaetike, skʼan me mu xchanbeik li stalelalike. ¿Kʼuxi xuʼ stsal yuʼunik? Li ermanoe xi laj yale: «Li kʼusi tskoltaoxuke jaʼ mi muʼyuk tsots akʼoplal chavaʼi abaike». Xi to laj yale: «Ichʼik me ta kʼux li xchijtak Jeova jech kʼuchaʼal tspas li stuke».

«Jcholtik mantal skotol ora.» Li William Samuelson, ti jaʼ yichʼoj ta venta li Departamento sventa Chanob vunetik sventa Diose, laj yalbe skʼoplal li jtakbol Pablo ti ta buyuk noʼox la xchol mantale (Echos 17:17). Ta tsʼakale, laj yalbe jlom jchanunetik ti akʼo echʼ yakʼik ta ilel kʼusitik kʼot ta pasel yuʼunik kʼalal la xcholik mantal ti kʼu sjalil ayik ta chanune. Jun skʼelobile, oy jun nupultsʼakal ti la xchiʼinik ta loʼil jun j-abtel ta jun mukʼta tiendae. La smalaik sventa xokob jutuk, vaʼun laj yakʼbeik skʼel li Video ¿Kʼu yuʼun skʼan jchantik li Vivliae? Vaʼun laj yalbeik ti akʼo skʼel li jpajinatik ta Internet, jw.org, ti xuʼ te sta mantaletik ta skʼop: ti jaʼ lao kʼope. Ta mas jelavele, li nupultsʼakale bat svulaʼanik li antse sventa xchʼiesbeik ta yoʼonton li mantale.

«Albeik-o me batel skʼoplal li Ajvalilal yuʼun Diose.» Li William Nonkes, ti te ch-abtej ta Departamento sventa cholmantale, la sjakʼbe sloʼil chanvoʼ jchanunetik. Li ermanoetik taje yakʼoj xa onoʼox ta xkuxlejalik li kʼusi chal Isaías 6:8, yuʼun xchʼakojbeik xa onoʼox lek yorail sventa chalbeik skʼoplal li Ajvalilale, pe li chanune koltaatik sventa spasik mas. Li ermana Snolia Maseko laj yal ti koltaat li chanun sventa xakʼ venta bu skʼan x-abteje, li jtose jaʼ ta sventa ti skʼan lek stunes li skʼakʼale, akʼo mi jaʼo lubem tajek tsut tal ta cholmantal. Xi laj yale: «Koliyal li chanune xpas xa kuʼun li kʼusi toʼox mu jnaʼ mi spas kuʼune». Li ermano Dennis Nielsen laj yal ti koltaat yuʼun li Sofonías 3:17 sventa mu xchibaj li ta cholmantale. Xi laj yale: «Mi oy junuk kʼakʼal ti muʼyuk lek kʼusi kʼot ta pasel kuʼun ta cholmantale, skʼan jvules ta jol ti xmuyubaj tajek kuʼun li Jeovae yuʼun chkakʼbe iluk ti jkʼanoje, jech oxal skʼan junuk noʼox koʼonton».

«Kʼelo lek avilik li mutetik ta vinajele» (Mateo 6:26). Li mantal ti mas tsots skʼoplale jaʼ la sjelubtas li Stephen Lett, ti jaʼ jun li ta Jtsop Jbeiltasvaneje. Jaʼ la xchapbe skʼoplal li tojobtasel laj yal Jesus ti skʼan jkʼeltik lek li mutetik ta vinajele xchiʼuk ti ep kʼusitik xuʼ jchantik ta sventae (Job 12:7).

Mi chakʼbe sveʼel mutetik li Jeovae, ta me xakʼ li kʼusi chtun kuʼuntik eke. Li voʼotike te jkʼoplaltik li ta «sna Diose» xchiʼuk li Vivliae chal ta melel ti chakʼbe kʼusi chtun yuʼun li «buchʼutik oy ta sba skʼelele» (1 Timoteo 3:15; 5:8). Pe skʼan me oy kʼusi jpastik. Li mutetike chbat saʼik li sveʼelik ti ch-akʼbatik yuʼun Diose. Li voʼotik eke skʼan me ‹jsaʼilantik baʼyel li Ajvalilal yuʼun Dios› sventa xakʼbutik li sbendisione (Mateo 6:33).

Li ermano Lett xtoke laj yal ti oy ep mutetik ti ep ta tos kʼu yelan ch-okʼik kʼalal chaʼiik ti oy kʼusi xibal sba tsnuptanike. Li voʼotik eke xuʼ jpʼijubtastik li ermanoetik ‹ti chchʼayik ta be› sventa xkalbetik li kʼusi xibal sba xuʼ snuptanike (Galatas 6:1). Jech xtok, kʼalal ta jcholtik mantale yakal ta jpʼijubtastik li krixchanoetik ta sventa ti toj nopol xa li «smuc’ta c’ac’alil Muc’ul Diose» (Sofonías 1:14). Li ermanoe laj to yal ti oy mutetik ti toj toyol snaʼ xvilike ti olon to chiktaik li tayal vitsetike, li voʼotik eke xuʼ me stsal kuʼuntik tsatsal vokoliletik ta skoj ti tskoltautik li Jeovae (Mateo 17:20).

Stsutsebal. Kʼalal laj xaʼox yichʼ sdiplomaike la skʼel jlik karta jun jchanun ti la stsʼiba ta skotolik sventa tstojik ta vokol li kʼusi la xchanike. Li ta slajeb xae, li ermano Herd laj yalbe li jchanunetik ti akʼo snakʼ lek ta yoʼontonik li snopbentak Jeova jech kʼuchaʼal chichʼ bajel ta laux li teetik ta sbe trene. Sventa lek tsinil xkom li sbe trene skʼan bajel lek ta martiyo. Li jchanunetik eke skʼan me snopilanbeik skʼoplal li kʼusi la xchanik ta chanub vune. Xi laj yal li Herd: «Chʼakbeik yorail sventa xatsʼun lek ta avoʼontonik li kʼusitik laj achanike». Xi to laj yale: «Mi jech chanopik kʼuchaʼal Jeovae, jaʼoxuk jun bendision».