Li ta 14 yuʼun marso ta 2015, nel yuʼunik li chanun 138 li ta Chanob vun sventa Vivlia ta Galaad ti jaʼ te echʼ yuʼunik li ta smeʼ chanubtasel yuʼun li stestigotak Jeova ta Patterson (Nueva York). Oy mas ta 14 mil li buchʼutik laj yilik li kʼusitik echʼe, te tsakal skʼoplal li buchʼutik laj yilik ta Internete. Kʼalal skʼan toʼox xlik echʼuk li mantaletike, laj yakʼik ta aʼiel chanib achʼ sonetik ti jaʼ la skʼejintaik ta tsʼakale. a

Li Geoffrey Jackson ti ch-abtej ta Jtsop Jbeiltasvanej yuʼun Stestigotak Jeovae jaʼ laj yichʼ ta venta li tsobajele. Kʼalal la slikese, laj yal ti skʼan skoltaik-o yantik skotol li kʼusi la xchanik li jchanunetike, ti mu jaʼuk noʼox xuʼunin stukike (2 Timoteo 2:2).

Li ermano Jacksone laj yalbe skʼoplal li kʼusi la spas j-alkʼop Moisese. Te van kʼuk sjalil ti jaʼ te laj yichʼik ta mukʼ Jeova j-israeletik li ta skarpanae. Pe kʼalal tsuts spasel li axibalnae, jaʼ xa te lik yichʼik ta mukʼ li Diose, maʼuk xa li ta skarpana Moisese. Yaʼeluke mu xuʼ x-och li ta Batsʼi Lekil Chʼul Kuarto ti te oy ta yutil to axibalnae; yuʼun jaʼ noʼox xuʼ x-ochik li mero bankilal paleetike. Pe muʼyuk bu lik skʼan parte Moises ta skoj ti laj yichʼ jelele. Yuʼun ta sjunul yoʼonton la skolta Aaron kʼalal laj yichʼ yabtel ta mero bankilal palee (Éxodo 33:7-11; 40:34, 35). ¿Kʼusi xuʼ jchantik yuʼun? Xi laj yal li ermano Jacksone: «Epuk sbalil xavil li kʼusi la-akʼbatike, pe mu xavuʼunin atukik».

«¿Mi ta jlik noʼox yanal teʼ chaxiʼik yuʼun?» Jaʼ jech sbi li mantal laj yetʼes ermano Kenneth Flodin ti jaʼ yajkoltaobba li Komite sventa Chanubtasel yuʼun Jtsop Jbeiltasvaneje. Laj yalbe jchanunetik ti yikʼaluk van oy kʼusi tsots snuptanik ta jelavele, xuʼ van staik kontrainel o xuʼ van oy kʼusitik vokol chaʼiik spasel. Vaʼun laj yalbe skʼoplal jaypʼel kʼop li ta Levítico 26:36, laj yal ti akʼo jechuk xilik kʼuchaʼal jlik takin yanal teʼ li vokoliletik tsnuptanike, maʼuk ti mu xa stakʼ tsalel chilike. Laje laj yalbe skʼoplal li jtakbol Pablo ti tsal yuʼun epal vokoliletik ta skoj ti la spat yoʼonton ta stojolal Jeovae (2 Korintios 1:8, 10).

«¿Kʼusi chasaʼik?» Li Mark Sanderson ti ch-abtej ta Jtsop Jbeiltasvaneje jaʼ xa lik sjelubtas li yan mantale. Laj yalbe skʼoplal li beiltasel ta Proverbios 13:12 ti xi chale: «Me mu jtatic ta ora li cʼusi ta jmalatique ta xloʼilaj coʼntontic». Oy kʼusi muʼyuk lek tspas li krixchanoetike, yuʼun jaʼ snutsojik li kʼulejale xchiʼuk ti x-ojtikinatik leke, pe muʼyuk xmuyubajik ta skoj ti muʼyuk staojike.

Li ta skʼakʼalil Jesuse, oy onoʼox jlom krixchanoetik ti jelel kʼusi snopojik ta stojolal li Juan J-akʼ-ichʼvoʼe (Lukas 7:24-28). Yuʼun yalojik mi jaʼ jfilosofo ti oy kʼusi chakʼ ta chanel ti mu masuk jamal smelolale. Mu jechuk kʼot ta pasel kʼuchaʼal snopojike, yuʼun jamal ta aʼibel smelolal li kʼusi melel laj yakʼ ta chanel li Juane. Oy van jlom xtoke yalojik ti skʼuʼ jkʼulej tslape, pe abol noʼox sba li skʼuʼ la slape. Pe li buchʼutik smalaojik xa onoʼox jun j-alkʼope kʼot ta pasel li kʼusi xchʼunojike, yuʼun jaʼ la sjambe tal sbe Mesias li Juane, maʼuk noʼox jun j-alkʼop (Juan 1:29).

Taje jaʼ la stunes li ermano Sandersone sventa xalbe jchanunetik ti skʼan lekuk kʼusi oy ta yoʼontonike. Laj yalbe xtok ti skʼan mu snopik ti tsots xa skʼoplal x-ilatik ti bu chtakatik batele, yuʼun skʼan skoltaik li ermanoetik ta sventa li kʼusi la xchanike, skʼan xakʼbeik xchan li kʼusi la xchanik ta Galaade, skʼan stsatsubtasbeik li xchʼunel yoʼontonike xchiʼuk ti skʼanik li ermanoetike. Xi laj yal li ermano Sandersone: «Bikʼituk me xavakʼ abaik ta stojolal li avermanotakike, akʼik persa spasel li kʼusi tskʼan yoʼonton Jeovae, vaʼun bi chkʼot ta pasel li kʼusi anopojike».

«Makʼlinik li buchʼutik chviʼnajike.» Taje jaʼ jech sbi li mantal la sjelubtas li James Cauthon ti jaʼ jchanubtasvanej li ta Departamento sventa Chanob vunetik sventa Diose. Li ermano Cauthone laj yal ti skʼanik kʼuxubinel xchiʼuk kʼanel skotol li krixchanoetike. Jaʼ jech laj yaʼi sba li Jesus eke, jaʼ yuʼun albat yuʼun Jeova ti kʼanbil kʼalal laj yichʼ voʼe (Mateo 3:16, 17).

Ti kʼu yelan spasojutik li Jeovae xuʼ jtsatsubtastik yantik xchiʼuk xuʼ jpatbetik yoʼontonik ta jkʼopojeltik, jech oxal oy ta yoʼonton ti jechuk jpastike (Proverbios 3:​27). Xi laj yal li ermano Cauthone: «Jaʼ kʼelik lek li slekil talelalik o li kʼusi xtojobik spasel li yantike, vaʼun albeik me». Kʼalal ta slekil koʼonton chkalbetik yantik li kʼusi spas yuʼunike, jaʼ chakʼik-o venta ti ep sbalil li kʼusi tspasike.

«Akʼik persa ti bu kʼalal xuʼ avuʼunike.» Laje jaʼ lik sjelubtas mantal li Mark Noumair ti jaʼ yajkoltaobba li Komite sventa Chanubtasele. Li ermanoe laj yalbe skʼoplal ti ta sjunul yoʼonton la skolta yantik li Pabloe, vaʼun la stijbe yoʼonton jchanunetik ti akʼo yakʼik persa spasel ti bu kʼalal xuʼ yuʼunike. Laj yalbe ti jaʼ to chmuyubajik ta melel mi ta sjunul yoʼonton tskoltaik yantik jech kʼuchaʼal la spas li Pabloe (Filipenses 2:17, 18).

Li Pabloe muʼyuk laj yikta-o sba akʼo mi laj yil svokol. Yuʼun laj yakʼ-o persa spasel ti bu kʼalal xuʼ yuʼun jaʼ to ti kʼuxi chame. Jech oxal xi laj yale: «Tsutsem xa kuʼun li anilajele» (2 Timoteo 4:6, 7). Li ermano Noumaire laj yalbe jchanunetik ti akʼo spasbeik yabtel li Ajvalilal yuʼun Dios buyuk xbatik sventa xchanbeik stalelal li Pabloe.

Sloʼil xkuxlejalik. Li Michael Burnett ti jaʼ yan jchanubtasvanej li ta Chanob vun ta Galaade jaʼ la sbain li yan parte ti bu laj yakʼik ta ilel kʼusi kʼot ta pasel yuʼunik ta cholmantal jlom jchanunetik ti kʼu sjalil ayik ta Pattersone.

Jech xtok, lek kʼusi kʼot ta pasel yuʼunik ta skoj ti te satik butik xuʼ xcholik mantal li jchanunetike xchiʼuk ti oy ta yoʼontonik chalbeik skʼoplal li kʼusi melel chal Vivlia li ta sbatsʼi kʼop krixchanoetike. Yuʼun oy jun jchanune laj yaʼi ti ep buchʼutik chkʼopojik ta español ti bu chbat xchol mantale. Jaʼ yuʼun kʼalal skʼan toʼox xlokʼ ta cholmantale, la stunes li aplikasion JW Language sventa xchan jaypʼeluk kʼop li ta españole. Li kʼusi ora la xchan jaypʼel kʼop ta españole, jaʼo la sta ta kʼoponel jun vinik ti ta español chkʼopoje. Akʼo mi jpʼel chaʼpʼel xchanoj li españole, lik xchiʼin ta loʼil li vinike. Li avi une chchanik xa Vivlia xchiʼuk chanvoʼ yutsʼ yalal.

Jakʼbat sloʼilik. Li William Turner ti jaʼ yajkoltaobba li Komite sventa Cholmantal yuʼun Jtsop Jbeiltasvaneje la sjakʼbe sloʼil chanvoʼ jchanun. La sjakʼbe kʼusi kʼot ta pasel yuʼunik kʼalal skʼan toʼox xkʼotik ta Galaade xchiʼuk ti kʼusi la xchanik li ta chanob vune.

Li jchanunetike laj yalik kʼusitik la xchanik ti jtunel yuʼunike. Oy jun jchanune laj yal ti oy kʼusi la xchan li ta Lukas kapitulo 10. Xmuyubajik tajek sutel li 70 yajchankʼoptak Jesus ti la stak batel ta cholmantale, yuʼun lek kʼusi kot ta pasel yuʼunik. Muyubaj li Jesus eke, pe laj yalbe yajchankʼoptak ti maʼuk noʼox skʼan xmuyubajik-o ti lek kʼusi kʼot ta pasel yuʼunike, ti skʼan jaʼuk mas xmuyubajik-o ta skoj ti lek laj yil Dios ti laj yakʼik persa bat xcholik mantale. Taje chakʼ kiltik ti jaʼ skʼan xijmuyubaj-o ti lek chilutik li Jeovae, maʼuk ta skoj ti kʼusi chkʼot ta pasel kuʼuntike.

Li ermano Turnere laj yalbe jchanunetik ti chkʼot ta pasel ta stojolalik li kʼusi chal Filipenses 1:6, laj yalbe ti slikesoj xa «jun lekil abtelal» ta stojolalik li Jeovae xchiʼuk ti jech chkoltaatik-o batele.

«Teuk-o asatik ta stojolal li Jeovae.» Li Samuel Herd ti ch-abtej ta Jtsop Jbeiltasvaneje jaʼ la sjelubtas li mantal mas tsots skʼoplal echʼ ta tsobajele. Laj yal ti mu onoʼox xkiltik ta melel li Jeovae. Vaʼun chaʼa, ¿kʼuxi ti skʼan teuk-o jsatik ta stojolal li Jeovae?

Jtos ti kʼuxi teuk-o jsatik ta stojolal li Jeovae jaʼ ti jkʼelbetik lek li yabteltak skʼobe, yuʼun jaʼ chakʼ kiltik kʼu yelan li Diose. Jech xtok, sjamoj jnopbentik li Jeovae (Efesios 1:​18). Mas to chkojtikintik Jeova kʼalal mas ta jkʼeltik li Vivliae. Vaʼun mas to chijnopaj ta stojolal kʼalal mas to chkojtikintike.

Skʼan jaʼ mas jkʼelbetik skʼoplal li evanjelioetike, yuʼun li kʼusitik la spas Jesus xchiʼuk li kʼusitik laj yale jaʼ chakʼ kiltik lek kʼu yelan li Diose. Jaʼ jech tajek stalelal echʼ ta Balumil Jesus kʼuchaʼal li stalelal Stote, jaʼ yuʼun xi laj yale: «Yiloj xa Totil ek li buchʼu yilojune» (Juan 14:9).

Li ermano Herde laj yalbe li buchʼutik te oyik ti akʼo yakʼ ta xkuxlejalik li kʼusi chchanike, maʼuk noʼox ti skʼan teuk-o satik ta stojolal Jeova ta skoj li stalelal Jesuse. Jtos ti kʼusi la spas li Jesuse jaʼ ti la smakʼlin li yantike, jech skʼan tsots xij-abtej ek sventa jchʼakbetik batel yantik li veʼlil ta mantal kichʼojtike.

Mi te-o jsatik ta stojolal li Jeovae, xuʼ xi jpat lek koʼontontik kʼuchaʼal laj yal li jtsʼibajom yuʼun salmoe: «Scotol ora liʼ oy o ta jtojol li Mucʼul Diose, jech muʼyuc bochʼo xuʼ chisjipun ta lum, yuʼun liʼ oy ta jbatsʼicʼob[e]» (Salmo 16:8).

Stsutsebal. Laj yichʼ sdiplomaik li jchanunetike, vaʼun la skʼel jlik kʼupil sba karta jun jchanun ti la stsʼiba ta skotolik sventa tstojik ta vokol li kʼusi la xchanike. Laje li ermano Jacksone laj yalbe jchanunetik ti mu snopik ti skʼan achʼ to o ti vokol ta aʼibel smelolal li kʼusi chakʼik ta chanel li bu chbatike, yuʼun jutuk mu skotoluk snaʼojik xa onoʼox ermanoetik maʼ taje. Jech xtok, laj yal ti tsots skʼoplal bikʼit xakʼ sbaike. Li jchanunetike maʼuk skʼan xalbe sba skʼoplal stukik o li kʼusi la xchanik ta Galaade, jaʼ mas skʼan xalbeik skʼoplal li Vivliae xchiʼuk li vunetik lokʼemik ta Vivliae. Laj yal xtok ti mu xchibajesbeik yoʼonton li ermanoetik ti mu xuʼ yuʼun xbatik ta Galaade, skʼan skoltaik sventa stabeik sbalil li yan chanubtasel ti xuʼ staike. Solel xmuyubajik tajek skotolik kʼalal tsuts yuʼunik li tsobajele xchiʼuk oy ta yoʼonton tskoltaik li yermanotakike.