Kʼalal laj xaʼox li chanun ti voʼob u jalije, li 48 jchanunetik li ta Chanob vun sventa Vivlia ta Galaad yuʼun Watchtowere la skʼupinik ti nel yuʼunik chanune, te la spasik ta Smeʼ Chanubtasel yuʼun stestigotak Jeova ta Patterson (Nueva York). Ayik 9,694 krixchanoetik ti jaʼ yamigotakik, yutsʼ yalalik xchiʼuk yan ermanoetik sventa chakʼik ta ilel ti xmuyubajik ta stojolal li jchanunetike.

Leʼ xa onoʼox ta 1943, mas ta vaxak mil jtuneletik ti lek xtojobike yichʼojik chanubtasel sventa xkʼotik ta misionero. Li slivroik ti mas tsots skʼoplal tstunesik li ta chanune jaʼ li Vivliae, ti jaʼ chkoltaatik sventa stsatsubtasbat xchʼunel yoʼontonik xchiʼuk ti xkoltaatik ta stsʼitesel stalelaltak yajtsʼaklom Cristo sventa xkuch yuʼunik kʼusuk snuptanik li ta misioneroale.

«Nopik lek li kʼusitik lek ilbile.» Li buchʼu la slikes yetʼesel mantale jaʼ li ermano Anthony Morris ti jaʼ jun li ta Jtsop Jbeiltasvanej yuʼun stestigotak Jeovae. Ti kʼusi laj yal ta slikebale te lokʼem ta Filipenses 4:8, ti xi chale: «Li cʼusitic lec ilbile [o li slekil oʼontonale], [...] jaʼ noʼox me xanopic o».

Li ermano Morrise laj yal ti kʼusi xuʼ skoltautik sventa junuk noʼox koʼontontik li ta balumil ti noj ta kʼusitik chopole, jaʼ ti jnoptik ta sventa li slekil oʼontonale o ti oyuk xkʼuxul koʼontontike. Ta sventa taje xi laj yale: «Teuk me asatik xchiʼuk saʼik me li kʼusitik sventa li lekil oʼontonale; jech noxtok, skʼan me lekuk avoʼontonik ek».

Ta sventa taje, jkotoltik skʼan stij koʼontontik ti jchanbetik stalelal li Jtotik ta vinajele, ti jaʼ li buchʼu mu snaʼ xakʼ ta yoʼonton li kʼusitik chopol ta jpastike (Salmo 130:3). Xi tojobtasvan li ermano Morrise: «Mu jaʼuk xavakʼ ta avoʼontonik li kʼusi chopol tspas li achiʼiltakike; jaʼ lek, lekuk me xavakʼ ta ilel atalelalik sventa skʼanikot».

«Chanik me lek, pe mu me xakuyik ti toj tukʼoxuke.» Li ermano Harold Corkern ti chtun ta Komite li ta Betel ta Estados Unidose te la slokʼes ta Eclesiastés 7:16 li mantal laj yetʼese. Akʼo mi tskʼan Dios ti jchantik mase xchiʼuk ti jtabetik sbalile, mu skʼan ti «xmuy ta joltike».

Li ermano Corkerne laj yal noxtok ti toj tsots skʼoplal li kʼanelal kʼalal oy buchʼu chichʼ albel mantale. Mu stakʼ jsuj kermanotaktik ta spasel kʼusitik lek jech kʼuchaʼal muʼyuk tsujutik li Jeovae. Xi to laj yal li ermano Corkerne: «Mi lek chatunesik li pʼijilale, li kʼusi achanojike xchiʼuk li kʼusitik avabinojbeik smelolale, jaʼ me tskʼanoxuk-o li ermanoetike».

«Mu xchʼay ta [avoʼontonik] cʼu xʼelan yabtel li Diose.» (Salmo 78:7.) Li ermano Guy Pierce ti jaʼ jun li ta Jtsop Jbeiltasvanej eke, lik yal ti jaʼ te chvinaj ta stalelal ololetik ti kʼu yelan stalelal li stot smeʼike (Proverbios 20:11). Jaʼ jech ek, li ta jtalelaltike jaʼ te chvinaj li stalelal Jeovae, li Jdiostike xchiʼuk ti jaʼ Jtotike. «Jech ta xvinaj bochʼo xnichʼnab Dios xchiʼuc bochʼo xnichʼnab pucuj. Scotol li bochʼo mu spasilanic cʼusitic tuqʼue xchiʼuc li bochʼotic muʼyuc scʼanoj xchiʼile, mu jaʼuc xnichʼon Dios.» (1 Juan 3:10.)

Li ermano Pierce la svulesbe ta sjolik li jchanunetike ti mi laj yichʼik takel ta ikʼel li ta Chanob vun ta Galaade jaʼ ta skoj ti oy slekil talelalike, jech kʼuchaʼal, ti bikʼit yakʼoj sbaike xchiʼuk laj yalanbe ti jechuk-o bikʼit chakʼ sbaike. Li chanubtasel laj yichʼike maʼuk sventa mukʼ tajek xaʼi sbaik ta stojolal li yantike; moʼoj, jaʼ sventa jmojuk oy li ermanoetik ta spʼejel Balumile xchiʼuk ti lekuk ta chanel ti bikʼit yakʼoj sbaike (Salmo 133:1). Li ermano Pierce xi laj yale: «Li avi une, laj xa achanik mas mantal: chanik to me batel ta sventa li Jeovae xchiʼuk ojtikinik-o me batel mas jujun kʼakʼal».

«Jaʼ noʼox la jpas li cʼusi scʼoplal ta jpase.» Li ermano William Samuelson ti jaʼ sbainoj skʼelel li Departamento sventa Chanob vunetik sventa Diose, xi la sjakʼe: «¿Kʼu van yelan skʼan xkaʼi jbatik mi laj kichʼtik akʼbel junuk abtel ti mu jkʼan jpastike?». Jkʼeltik kʼusi xuʼ xchanubtasutik li kʼusi chal Lucas 17:7-10: «Me laj achʼunic scotol cʼusitic chayalboxuc Diose, tscʼan jech chavalic: ‹Li vuʼune muʼyuc cʼusi xuʼ cuʼun, yuʼun jaʼ noʼox la jpas li cʼusi scʼoplal ta jpase, scʼan xachiic›». Yuʼun onoʼox melel ti ‹mu kʼusi xuʼ kuʼuntik› kʼalal ta jkoʼoltas jbatik xchiʼuk li Kajvaltik Jeovae.

Oy jayibuk xemana chanunajik ta jun salon sventa chanob vun li jchanunetike. Li jlome mu kʼunuk laj yaʼiik. Xi laj yal li ermano Samuelsone: «Pe la spas skotolik li kʼusi skʼan spasike. Jaʼ yuʼun li avie, kʼalal chilbeik sbalile, tstsatsub li xchʼunel yoʼontonike.» Xi la stsutses li mantale: «Jaʼuk me jun matanal xavilik ti chatunik ta stojolal li Kajvaltik ta sjunul vinajelbalumil kʼuchaʼal tukʼil jchabiej nae».

«Vuleso me ta ajolik li kʼusitik yaloj tspas Jeova kʼalal chavil tsots avokolike.» Li ermano Sam Roberson ti jaʼ jun jkoltavanej yuʼun li Departamento sventa Chanob vunetik sventa Diose, laj yalbe jchanunetik ti ta onoʼox xat yoʼontonik bakʼintike. Jaʼ yuʼun laj yal ti akʼo xchaʼkʼelbeik skʼoplal yajtuneltak Jeova ta Vivlia ti koltaatik yuʼun Diose. Jech kʼuchaʼal liʼe, li Moisese xi laj yalbe li Josuee: li Jeovae «jaʼ chaxchiʼinot o scotol cʼacʼal. [...] Jaʼ yuʼun mu me xaxiʼ; mu me xastsalot li xiʼele» (Deuteronomio 31:8). Kʼalal poʼot xaʼox xcham li Josuee, xi laj yale: «Icʼot ta pasel scotol li cʼusi yalojboxuc Mucʼul Dios cuʼuntique» (Josué 23:14).

Li Jeovae xi onoʼox chalbe li yajtuneltake: «Muʼyuc chaquictaot, muʼyuc chajcomtsanot» (Hebreos 13:5). Yaloj onoʼox ti jaʼ jech tspas ti kʼusi skʼan xal li sbie («Jaʼ Tspas akʼo Kʼotuk ta Pasel»), ti tspas ti kʼusi chtun chil sventa tskolta li yajtuneltake. Xi la spat oʼontonal li ermano Robersone: «Mu xa chibajik, mu xa lubtsajik, mu xavakʼ abaik ta tsalel. Vuleso ta ajolik ti muʼyuk tsloʼlaoxuk ta j-echʼel li Jeovae».

«Li scʼopique puquem batel ta sbejel banamil.» (Romanos 10:18.) Li ermano Mark Noumair ti jaʼ jun ti buchʼu chchanubtasvane, laj yetʼes jvokʼ mantal sventa xalik junantik o xakʼik ta ilel kʼusitik kʼot ta pasel kʼalal la xcholik mantal te ta Patterson li jchanunetik ti likemik talel ta yantik lumetike. Jech kʼuchaʼal liʼe, jun nupultsʼakal ta Sudáfrica la skʼupinik xcholbel mantal oxvoʼ antsetik ti jmoj slumal xchiʼukike ti chkʼopojik ta zulú xchiʼuk xhosa kʼope. Jech xtok, jun nupultsʼakal ta Sri Lankae la xcholbeik mantal jun vinik ti likem ta Indiae, yan li yajnil xchiʼuk stsebe te nakalik ta Sri Lanka. Li vinike muʼyuk bu yiloj-o junuk Vivlia, jaʼ yuʼun ta slekil yoʼontonik laj yakʼbeik komel li yuʼunike.

«Lec chapalutic ta spasel scotol lequil abtel.» Li ermano Gene Smalley ti jaʼ jun li buchʼu chkoltavan li ta Komite sventa Stsʼibael vunetike, la sjakʼbe sloʼil chib nupultsʼakal ti jaʼ to nel yuʼunik chanune. Jun nupultsʼakal ta Sierra Leonae laj yal ti skotol kʼakʼal skʼan xbat slup tal yaʼalike. Pe ta skoj ti tskʼupinik tajek li matanal staojik ti chakʼik 50 chanubtaseletik ta Vivliae maʼuk vokolil chaʼiik. Li nupultsʼakaletik taje la stojik ta vokol li chapanel laj yichʼike, yuʼun jaʼ sventa xchanubtasatik «ta spasel scotol lequil abtel» ta tsʼakal (2 Timoteo 3:16, 17).

«Kuchuk avuʼunik kʼalal to ta slajebal xchiʼuk li ta mas tsʼakale.» Li ermano Gerrit Lösch ti jaʼ jun li ta Jtsop Jbeiltasvaneje, jaʼ laj yetʼes li mantal ti mas tsots skʼoplale. Jaʼ lik yalbe smelolal ti buchʼutik tslikesik li anilajele skʼan mu toj aniluk o mu toj kʼunuk xbatik sventa lek stsuts yuʼunik. Li ta batsʼi anilajele jaʼ noʼox jun li buchʼu tspas kanale, pe li anilajel tspas yajtsʼaklom Cristoe skotolik tspasik kanal jaʼ noʼox venta mi kʼotik ti bu skʼan xkʼotike.

Ti chkuch kuʼuntik li yajtsʼaklomutik Cristoe te smakojbe skʼoplal ti chijtun-o ta stojolal li Jeovae, ti mu xkakʼtik ti oyuk kʼusi smakutik ta bee, li nutsele, li prevaetike o li kʼusi chopol chkʼot ta pasel ta jtojolaltik ti jaʼ chakʼ ti muʼyuk xa spatobil koʼontontike. Xi laj yal li Jesuse: «Li bochʼo ta xcuch yuʼun cʼalal to ta slajebe jaʼ ta xcol» (Mateo 24:13). ¡Toj ep tspat koʼontontik ti jnaʼojtik ti ep sbalil chilik Jeova xchiʼuk Jesús mi chkuch kuʼuntike! Ta mas tsʼakale li ermano Lösche xcholet xa laj yalbe skʼoplal yan kʼusitik ti tskoltautik sventa xkuch kuʼuntik akʼo mi ep jvokoltike. Chkalbetik skʼoplal junantik:

• Kʼopono li Diose, yuʼun jaʼ «chijyacʼbutic smucʼul coʼntontic», ti «ta jujun cʼacʼal jaʼ chixcuchbutic li quicatstique» (Romanos 15:5; Salmo 68:19).

• Jpʼeluk me ta koʼontontik ti tukʼ chkakʼ jbatike, «yuʼun li Diose mu snaʼ sjel yoʼnton o, jech mu xacʼ taluc ta atojolic tsots preva ti me mu xa stsʼic avuʼunic chile. Jech noxtoc cʼalal oyoxuc ta prevae, jaʼ chacʼ avilic cʼu xʼelan xuʼ chacolic loqʼuel, yuʼun jech chcuch avuʼunic» (1 Corintios 10:13).

• Tsotsuk-o me li spatobil koʼontontike. Xi chal Vivlia ta sventa Jesús ti jaʼ ta jchanbetik stalelale: kuch yuʼun «li bochʼo laj yichʼ vocol ta cruze [o jtel teʼ], [...] yuʼun la snaʼ ti xcuxet noʼox yoʼnton ta tsʼacale» (Hebreos 12:2).

Li ermano Lösche laj yal ti mu stakʼ xijlubtsaj avi ti nopol xa tajek skʼan xijkʼot li bu ta jkʼan chijkʼote. «Junuc coʼntontic acʼo cacʼtic persa batel li canilajebtic ti jtamojtic xae.» (Hebreos 12:1.)

Jun li buchʼu nel yuʼun chanune, toj lek la stsutses kʼalal la skʼel jlik karta ti bu chal ti tstojik ta vokol skotol jchanunetik li lekil chanubtasel laj yichʼike. Te chal ta skartaik ti maʼuk noʼox laj yaʼibeik lek smelolal li kʼusitik tskʼan tspas Dios kʼalal toj lek xcholet laj yichʼ chanbel smelolal li Skʼop Diose, moʼoj, yuʼun tsatsub-o lek xchʼunel yoʼontonik xtok. Xi to chal li kartae: «Jpʼel ta koʼontonkutik ti chkakʼ ta jkuxlejalkutik skotol li kʼusitik lek la jchankutike».