Li ta 14 yuʼun septiembre ta 2013 ayik jutuk mu 10,500 krixchanoetik kʼalal nel yuʼunik li chanun 135 li ta Chanob vun sventa Vivlia ta Galaad yuʼun Watchtower, jaʼ te kʼot ta pasel ta smeʼ chanubtasel yuʼun li stestigotak Jeova ta Patterson (Nueva York). Taje jaʼ sventa tskolta li stestigotak Jeova ti lek xa chanemik sventa masuk to xtojobik ta spasbel yabtel li Jeovae.

Jaʼ la slikes tsobajel li ermano Guy Pierce ti jaʼ jun li ta Jtsop Jbeiltasvanej yuʼun Stestigotak Jeovae. Li kʼusi laj yale te la slokʼes ta Mateo 28:19, 20, ti bu xi chale: «Batanic me; bat pasic ta jchʼunolajel cuʼun li cristianoetic ta jujun banamile. [...] Chanubtasic lec ta xchʼunel scotol li jmantaltac laj calboxuc avaʼyique».

Li ermano Pierce laj yal ti jaʼ tijbat-o yoʼonton krixchanoetik li kʼusi laj yal Jesuse xchiʼuk jaʼ jech tstij koʼontontik li avi eke. Li yajtsʼaklomtak Cristoe chchanubtasvanik ti skʼan xchʼunbeik smantaltak li Jesuse, ti te kapal skʼoplal ti xichʼ cholel ta spʼejel Balumil «li Lequil [Aʼyeje]» (Mateo 24:14). Vaʼun chkʼotik ta jcholmantaletik xchiʼuk ta jchanubtasvanejetik ta sventa Ajvalilal yuʼun Dios li achʼ jchʼunolajeletike. Jaʼ jech kʼuchaʼal chal li ermano Pierce, kʼalal jaʼ jech chichʼ pasele koʼol ch-epaj echʼel xchiʼuk jnaklejetik li buchʼutik chkʼotik ta yajtsʼaklomtak Cristoe.

«Maʼuk noʼox laj yakʼik ti kʼu yepal xuʼ yuʼunike.» Li ermano Thomas Cheiky ti chtun ta Komite sventa Betel ta Estados Unidose laj yetʼes jun mantal ti te lokʼem ta 2 Corintios 8:1-4. Manchuk mi toj povreik li ermanoetik ta Macedonia ta baʼyel sigloe laj yalik ti oy tajek ta yoʼonton tskʼan tskoltaik li ermanoetik ti chil svokolik ta Jerusalene. Jaʼ jech toj lek yoʼonton yakʼojik ta ilel xchiʼuk ti muʼyuk chkʼuxubin sba stukik ek li jchanunetik ta Galaade.

Akʼo mi toj lek yoʼonton koltavanik li yajtsʼaklomtak Cristo ta Macedoniae, ta melel muʼyuk bu la sten li yutsʼ yalalike xchiʼuk li yabtelik ta stojolal Diose. Jaʼ yuʼun, li buchʼu yakal chetʼes mantale laj yalbe jchanunetik ti akʼo xchanbeik stalelal li ermanoetik ta Macedoniae, ti oyuk noʼox smelolal ti kʼusi tspasike.

«Tsuts li chanune.» Yan ermano ti jaʼ jun li ta Jtsop Jbeiltasvanej ti Samuel Herd sbie laj yalbe jchanunetik ti akʼo svules ta sjolik ti kʼalal echʼik li ta Chanob vun ta Galaade. Laj yal ti xkoʼolaj la kʼuchaʼal kʼupil sba son ti chkaʼitik sjunul kʼakʼal li kʼusitik alakʼik sba la xchanike, jaʼ yuʼun kʼalal tsvules ta sjolik li kʼusitik kʼupil sba la xchanike jaʼ chpatbat-o yoʼontonik ta sjunul xkuxlejalik.

Li ermanoe laj yal xtok ti muʼyuk spajeb snopben li Jeovae. Yuʼun yakʼojbe sbi skotol li kʼanaletik ta sjunul vinajel ti ta sbiyonaltak xa noʼox oye, pe mi jpʼejuk bu chchʼay ta sjol li Jeovae (Salmo 147:4). Jaʼ jech muʼyuk bu chchʼay ta sjol xtok ti toj ep chanunajik li jchanunetike. Te oy ta snopben Jeova li kʼusitik kʼupilik sba la spasik ta jujuntal li jchanunetike, muʼyuk buchʼu xuʼ xelkʼan xkaltik li kʼupil sba kʼulejal te oy ta vinajele (Mateo 6:20).

Jaʼ yuʼun chaʼa, mi te oy ta snopben Jeova ti tsots laj yakʼbeik yipal li jchanunetike xchiʼuk ti laj yakʼik ta ilel ti skʼanojike, muʼyuk me bu chopol ti xmuyubaj xa tsvules ta sjolik li kʼusitik kʼupil sba la xchanike. Xi laj yalbe jchanunetik li Samuel Herd: «Kʼalal xamuyubaj xa chavules ta ajolik li kʼusitik kʼupilik sba achanojike, naʼik me ti jaʼ yakʼojboxuk li Jeovae, tojbeik me ta vokol. Mu me xachʼay ta ajolik li kʼusitik lekike, vaʼun jaʼ me jech mu xchʼay ta ajolik li bendisionetik xtoke».

«Pato avoʼontonik ti tskoltaoxuk li sjuʼel Jeova ti muʼyuk spajebe.» Li ermano Sam Roberson ti jaʼ jun jchanubtasvanej li ta chanob vun taje laj yalbe jchanunetik ti akʼo spat yoʼontonik ta sjuʼel Jeova kʼalal tsnuptanik achʼ vokolile, ti mu spat yoʼonton ta yip stukike. Xi chal Efesios 3:20 ta sventa li Diose: «Echʼem to jech tspas jech chac cʼu chaʼal ta jnoptic, o ta jcʼanbetique». Toj echʼem xa noʼox xuʼ yuʼun sventa tskoltautik ti mu xa noʼox xnop kuʼuntike. Kʼalal «echʼem to jech tspas jech chac cʼu chaʼal ta jnoptic» ti xie, mi jaʼuk onoʼox chalbe skʼoplal ti kʼu to yepal sjuʼel li Jeovae, yuʼun li versikulo taje chakʼ ta ilel ti muʼyuk spajeb li kʼusi tspase.

Chakʼbe yajtsʼaklomtak Cristo li sjuʼel ti muʼyuk spajeb li Jeovae. Kʼalal chkil jvokoltike, li Jeovae jaʼ «jech chac cʼu chaʼal jun mucʼta vinic ti mu stacʼ tsalele» o «jun jʼacʼ-leto [ti] mu tsalbaj[uke]» (Jeremías 20:11, Xchʼul Cʼop ti Jtotic Diose, ta skʼop Chamula). Li buchʼu chetʼes mantale laj yalbe jchanunetik ti ta onoʼox xkoltaatik yuʼun Jeova kʼalal tsnuptanik vokolile.

«Oyuk me avutsil alekilalik ti chatunik yuʼun li Ajvalilale.» Yan jchanubtasvanej ti William Samuelson sbie laj yalbe smelolal ti jaʼ ch-akʼbat-o yutsil slekilalik ti chtunik ta stojolal li Ajvalilale. Chaʼtos ti kʼu yelan ch-akʼbat yutsil slekilalike, june jaʼ ti yakʼojik ta ilel ti staik-o ichʼel ta mukʼ kʼalal skʼan toʼox xtalik ta chanune xchiʼuk ti kʼalal lokʼik ta chanune. Li yane jaʼ ti jaʼik yajkʼopojel li ajvalilal ti mas tsots skʼoplal ta sjunul vinajelbalumile: li Ajvalilal yuʼun Diose. Vaʼun jaʼ ch-ichʼatik-o ta mukʼ xchiʼuk tstaik-o yutsil slekilalik.

¿Kʼuxi xuʼ oyuk-o yutsil slekilalik? Albatik yuʼun ermano Samuelson ti akʼo yalbeik smukʼulal li Jeovae xchiʼuk ti akʼo yichʼik ta mukʼ li yantike. Jaʼ jech laj yichʼ ta mukʼ krixchanoetik li Jesuse, yuʼun laj yichʼ ta mukʼ xtok li buchʼutik la stojobtase xchiʼuk ti la stukʼibtase. Jaʼ jech laj yakʼ ta ichʼel ta mukʼ yabtel ta stojolal Dios li jtakbol Pabloe, maʼuk laj yakʼ sba ta ichʼel ta mukʼ stuk (Romanos 11:13). Mi jaʼ jech tspasik li jchanunetike jaʼ me jech ch-ayan-o mas yutsil slekilalik.

«Li caʼetique oy svuʼel ta yeic.» Yan jchanubtasvanej ta Galaad ti Michael Burnett sbie laj yalbe smelolal ti ta jkolta jbatik sventa xkʼot ta pasel li kʼusi chal Apocalipsis 9:19. ¿Kʼuxi? Jaʼ ti oy lek yip li kʼusi chkaltik ta cholmantal kʼalal ta jtabetik lek sbalil li kʼusi ta jchantik ta tsobajeletike. Laj une laj yakʼ jelavuk jayvoʼuk jchanunetik sventa xalik o ti xakʼik ta ilel ti kʼu yelan la xcholik mantal kʼalal jaʼo yakalik ta chanune. June xi la sjakʼbe jun vinik ti ch-abtej ta gasolinerae: «¿Kʼusi ora lik xchiʼuk kʼusi ora tstsʼaki yorail ti akʼbil li jyanlumetike?» (Lucas 21:24). Kʼalal bat skʼel ta yan velta li vinike, te la skʼelbeik stakʼobil ta kapitulo 4 ta Daniel xchiʼuk li ta apendise li ta livro ¿Kʼusi chchanubtasvan ta melel li Vivliae?

«Tsatsubtasbil lek li avoʼontonike.» Jun ermano ti Adrián Fernández sbi ti chtun ta Komite sventa Betel ta Estados Unidos eke, la sjakʼbe sloʼil chib nupultsʼakal ti te oyik ta chanune. Li ermano Helge Schumi sbie laj yalbe smelolal ti skʼan nopajtik noʼox xichʼ vulesbel ta sjolik ta Galaad ti toj tsots skʼoplal ti skʼan bikʼit xakʼ-o sbaike, yuʼun chal Vivlia ti oy yajtuneltak Dios ti lik stoy sbaik kʼalal akʼbat smotonik ta mantale (2 Crónicas 26:16). Oy jun ermano ti Peter Canning sbie, jaʼ jechtik laj yal ek kʼalal laj yalbe skʼoplal ti skʼan xichʼ chanel yan kʼope: «Mu me xatoy abaik, oyuk ta avoʼonton ti xavakʼ abaik ta kʼexlale». La stoj ta vokol xchanvoʼalik ta sventa li kʼusi la staik ta chanob vune: la sta stsatsal xchiʼuk yipal yoʼontonik sventa spas li yabtelike (Hebreos 13:9).

«Jaʼ cuxetuc avoʼntonic ti te xa tsʼibabil abiic ta vinajele.» (Lucas 10:20.) Li mantal ti mas tsots skʼoplale jaʼ laj yetʼes li ermano Geoffrey Jackson ti jaʼ jun li ta Jtsop Jbeiltasvaneje. Laj yal ti oy xa ta sjayibal jabil ti muʼyuk xa bu toj nom chtakatik batel jlom misioneroetike o ta junuk lum ti muʼyuk bu cholbil-o mantale. ¿Kʼu van yelan skʼan xaʼiik taje?

Kʼalal laj yoʼontonik ta cholmantal li 70 yajtsʼaklomtak Cristo ti takatik batel yuʼun Jesuse, solel xmuyubaj tajek vul yalik ti la slokʼesik pukujetik ta sbi Jesuse (Lucas 10:1, 17). Akʼo mi lek laj yaʼi li Jesuse, xi la spʼijubtase: «Mu me jaʼuc xcuxet avoʼntonic ti chʼunbil amantalic yuʼun li pucujetique. Jaʼ cuxetuc avoʼntonic ti te xa tsʼibabil abiic ta vinajele» (Lucas 10:20). Jaʼ jech jamal laj yakʼ ta aʼyel Jesús ti mu skotoluk ora lek tajek kʼusi chkʼot ta stojolal li yajtsʼaklomtake. Jaʼ yuʼun chaʼa, maʼuk me skʼan xakʼ ta yoʼontonik ti kʼusi chkʼot ta pasel yuʼunik li ta cholmantale, jaʼ mas lek ti jaʼ xakʼ ta yoʼontonik ti tukʼuk xakʼ sbaik ta stojolal li Jeovae sventa teuk «tsʼibabil [li sbiik] ta vinajele».

Xi to laj yal li ermano Jacksone: «Jaʼ jech skʼan jpastik ek kʼuchaʼal la spasik li 70 yajtsʼaklomtak Jesuse». Mu me stakʼ jnoptik ti jaʼ chakʼ xkuxetel koʼontontik kʼalal lek chbat li cholmantal ta jpastike xchiʼuk ti jaʼ svinajeb ti tukʼ chkakʼ jbatike. Yuʼun jaʼ to me xkuxet lek koʼontontik xchiʼuk tukʼ chkakʼ jbatik mi lek xkil jbatik xchiʼuk li Jeovae xchiʼuk mi chkakʼbetik yipal ti chijtun ta stojolale.

Oy kʼusitik la snuptan Jesús ti xuʼ van chibaj-o yoʼonton ti jechuke. Jech kʼuchaʼal liʼe, ta smilal noʼox krixchanoetik la stsʼakliik Jesús jun velta ta skoj ti makʼlinatik ta skʼelobil juʼele (Juan 6:10-14, 22-24). Pe kʼalal laj yaʼiik jtos chanubtasel ti laj yakʼ li Jesuse toj chopol laj yaʼiik, vaʼun muʼyuk xa bu la xchiʼinik batel. Jaʼ yuʼun ta ora chʼay batel ti xkuxet xaʼox yoʼontonik ti ep buchʼutik tskʼanik mantal yilele, yuʼun toj ep chibajik (Juan 6:48-56, 60, 61, 66). Manchuk mi jech, tukʼ yoʼonton laj yakʼ sbaik li jtakboletike, muʼyuk bu la stenik komel li Jesuse. Maʼuk laj yakʼ ta yoʼontonik li kʼusi chkʼot ta pasel yuʼunik ta cholmantale, jaʼ mas laj yakʼ ta yoʼontonik ti tukʼuk xakʼ sbaike xchiʼuk ti lekuk xil sbaik xchiʼuk li Jeovae (Juan 6:67-69).

Stsutsebal. Kʼalal laj xaʼox yichʼ li sdiplomaike la skʼel jlik karta jun jchanun ti la stsʼiba ta skotolik sventa tstojik ta vokol li kʼusi la xchanike. Li ermano Pierce laj yal ti muʼyuk skʼanojbe yajtuneltak Jeova li balumil liʼe, te kapal skʼoplalik ek li buchʼutik jaʼ to lokʼik ta chanune (Hechos 4:13; 1 Corintios 1:27-31). Pe li Jeovae stsakoj lek ta mukʼ ti kakʼoj jbatik ta stojolale xchiʼuk chakʼbutik xchʼul espiritu. Yikʼaluk van muʼyuk bu labal sba chil ti kʼu yepal chanunajemutike, pe «li kʼusi labal sba chil kʼuchaʼal laj yal li ermano Pierce jaʼ ti tukʼ koʼontontike, ti tukʼ chkakʼ jbatik xchiʼuk ti chkichʼtik ta mukʼe».