Kʼalal laj yoʼontonik ti tsots chanunajik ti jalij voʼob ue, kʼot skʼakʼalil ti nel yuʼunik li chanun 136 li ta Chanob vun sventa Vivlia ta Galaad ta sabado 8 yuʼun marso ta 2014. Taje jaʼ sventa tskolta li stestigotak Jeova ti lek xa chanemik sventa masuk to xtojobik li ta cholmantale xchiʼuk ti tstsatsubtasbeik li xchʼunel yoʼonton yermanotakike. Ti kʼu yepal kʼotik li ta tsobajel taje jaʼ 11,548 krixchanoetik. Ep buchʼutik te noʼox laj yaʼiik mantal li ta smeʼ chanubtasel yuʼun li stestigotak Jeova ta Patterson (Nueva York), li yantike la stsob sbaik ta Canadá, Estados Unidos, Jamaica xchiʼuk Puerto Rico sventa tskʼelik ek.

«Jechuc me avoʼntonic jech chac cʼu chaʼal yoʼnton li Cristo Jesuse.» Li ermano David Splane ti jaʼ jun li ta Jtsop Jbeiltasvanej yuʼun Stestigotak Jeovae, jaʼ laj yal ti buchʼutik chetʼesik mantale. Li kʼusi lik yale jaʼ te la slokʼes ta Filipenses 2:5-7, ti xi chale: «Jechuc me avoʼntonic jech chac cʼu chaʼal yoʼnton li Cristo Jesuse». Li kʼusi mas tsots skʼoplal laj yaʼi li Jesús kʼalal ay ta Balumile, jaʼ ti bikʼituk xakʼ sbae xchiʼuk ti spasbe li yabtel Jeovae, maʼuk ti tsotsuk skʼoplal x-ilbat yabtel yuʼun li krixchanoetike.

Jech kʼuchaʼal liʼe, kʼalal akʼat ta preva oxib velta ta takixokol balumil yuʼun Diablo li Jesuse, xi la stakʼe: «Jech tsʼibabil» xchiʼuk laj yal xtok li kʼusi laj yalbe j-israeletik li Moisese (Mateo 4:4, 7, 10; Deuteronomio 6:13, 16; 8:3). Ti yuʼunuk jech tskʼane xuʼ ox la spas sba ta mantal stuk, yuʼun jaʼ li Xnichʼon Diose xchiʼuk jaʼ li Mesiase. Pe bikʼit laj yakʼ sba, yuʼun laj yakʼ ta ilel ti tstsakbe ta mukʼ li yabtel Moisese. Jaʼ me jech skʼan jpastik ek, ti oyuk sbalil xkiltik li kʼusi xtojob spasel yantike xchiʼuk ti nopolikuk noʼox jkʼupil kʼoptatik ta sventa li yabtelike.

Laj yalbe smelolal ti kʼu yelan toj lek laj yakʼ ta ilel stalelal Jesús kʼalal muʼyuk xaʼox jal liʼ oy ta balumil sventa oy kʼusitik xchane. Xi laj yalbe Stot ta jun orasione: «Li vuʼune laj xa cacʼot ta ichʼel ta mucʼ liʼ ta banamil, yuʼun laj xa jpas li cabtel laj avacʼbun jpase. Jaʼ yuʼun Tati, acʼbun xa yan velta jlequilal cutsilal te ta atojol jech chac cʼu chaʼal jlequilal cutsilal te ta atojol ti cʼalal muʼyuc toʼox li banamile» (Juan 17:4, 5). Li Jesuse maʼuk tskʼan akʼbel mas tsots yabtel kʼalal mi sut ta vinajele. Li kʼusi noʼox tskʼane jaʼ ti x-akʼbat yan velta li yabtel ta slikebale, jaʼ xkaltik, li kʼusi onoʼox tspas ta voʼnee. Li buchʼutik nel yuʼunik li chanune jaʼ me yakal chchanbeik stalelal Jesús mi jaʼ chakʼ ta yoʼontonik li yabtelik ta stojolal Jeovae ti maʼuk ti tsotsuk skʼoplal x-ilatike. Mi jech la spasike jaʼ me jech xmuyubajik noʼox mi sutik batel ti bu toʼox oyike, akʼo mi mu masuk tsots yabtel x-akʼbatik.

«Mu me xakʼuxubin aba atukik.» Li ermano William Malenfant ti tskolta li Komite sventa Chanubtasel yuʼun li Jtsop Jbeiltasvaneje, la stijbe yoʼonton li jchanunetik ti akʼo xchanbeik stalelal li jtakbol Pabloe, ti muʼyuk la xkʼuxubin sba stuk sventa tspasbe li yabtel Diose. Li Pabloe muʼyuk la snaʼ sutel li kʼusi laj yiktae. Yuʼun xi laj yale: «Jaʼ ta jchʼay ta coʼnton li cʼusi icom xa ta jpate, jaʼ xa noʼox chcacʼ persa snutsel batel li cʼusi muʼyuc to jtaoje» (Filipenses 3:13, 14).

Mi muʼyuk chkʼuxubin sba stukik li buchʼutik nel xa yuʼunik li chanune, jaʼ me yakal chchanbeik stalelal li yajtuneltak Dios ta voʼnee xchiʼuk li avi kʼakʼale. Li ermano Malenfant laj yalbe skʼoplal jun ermana ti Clara Gerber Moyer sbi ti lik tunuk ta stojolal Dios kʼalal uni bikʼit tseb toʼoxe. Xi la stsʼiba li ermanae: «Jaʼ jun muyubajel chkaʼi ti ta jnopbe skʼoplal ti oy xa ta 80 jabil ti chitun talel ta stojolal Jeovae, mi jsetʼuk bu chopol chkaʼi ti jech tunemun tale. Ti xuʼuk xikuxi yan veltae jaʼ onoʼox jech ta jpas».

«Jmojuk me xacholik mantal xchiʼuk li anjeletike xchiʼuk jechuk me xacholik mantal kʼuchaʼal tspasike.» Li ermano Gerrit Lösch ti jaʼ jun li ta Jtsop Jbeiltasvaneje, oy kʼusi chaʼtos laj yakʼbe snop li jchanunetik ti jaʼ noʼox xuʼ staik li jcholmantaletike. Baʼyuke jaʼ ti chcholbeik skʼoplal li lekil aʼyejetik sventa li Ajvalilal yuʼun Dios jech kʼuchaʼal tspasik li anjeletike, yuʼun li kʼopetik chichʼ alel ta griego xchiʼuk ta hebreo ti «anjel» xie, jaʼ skʼan xal «j-al-aʼyej». Ta xchibale jaʼ ti jaʼ tsbeiltasik cholmantal li anjeletike, jech kʼuchaʼal la sbeiltasik li yajtsʼaklom Cristo ti Felipe sbie (Hechos 8:26-35).

Vaʼun laj yal ermano Lösch li kʼusitik snuptanojik ta cholmantal li ermanoetike. Laj yalbe skʼoplal Gabino, jun stestigo Jeova ta México ti nopem xaʼi ti jun o chib velta noʼox tskʼojilan li tiʼ nae. Pe kʼalal kʼot ta jpʼej nae, la skʼojilan chanib velta. Te lokʼ talel jun vinik, vaʼun xi laj yale: «¿Mi xavil li chʼojon leʼ jokʼole? Kʼalal la akʼojilan ta xchanibal velta li tiʼ nae ta jnukʼ xaʼox oy li chʼojone. Pe la jlokʼes sventa xtal jam li tiʼ nae. Kolaval ti ep ta velta laj akʼojilane, yuʼun laj xa jmil jba ti jechuke».

Xuʼ van ta jech noʼox ta jnuptantik li kʼusitik chkʼot ta pasel taje, pe ep ta velta ti mu jecheʼuk noʼox ta jnuptantike. Yuʼun jaʼ chakʼ ta ilel ti yakal tsbeiltasik li abtelal ta cholmantal ta spʼejel Balumil li anjeletike (Apocalipsis 14:6).

«Ta xichʼik bendision li buchʼutik kajal skʼoplale.» Li Michael Burnett ti jaʼ jun jchanubtasvanej li ta Chanob vun ta Galaade, laj yalbe stalelal Jabes ta snitilulal Judá ta sventa li mantal laj yetʼese. Xi chal li Vivlia ta sventa li Jabese: «Stuc noʼox ti cajal scʼoplale, mu sta ti xchiʼiltac ta voqʼuele». Jun veltae, la skʼanbe Dios ti akʼo x-akʼbat bendisione, ti akʼo xmukʼib li yosilale xchiʼuk ti akʼo xkoltaat ta sventa li kʼusitik chopole (1 Crónicas 4:9, 10, Xchʼul Cʼop ti Jtotic Diose, ta skʼop Chamula).

¿Kʼuxi xuʼ xchanbeik stalelal Jabes li jchanunetike? Jaʼ ti jamaluk skʼanbeik Dios li kʼusi tskʼanike. Jtos ti kʼusi xuʼ skʼanbeike jaʼ ti xkʼot ta pasel yuʼunik ti kʼu yuʼun chanunajike. Li kʼusi xuʼ skʼanik xtoke jaʼ ti akʼo xkoltaatik ta sventa li kʼusi chopole, pe maʼuk ti tskʼanbeik ti mu xa kʼusi chopol snuptanike, moʼoj, li kʼusi tskʼanbeike jaʼ ti akʼo x-akʼbat yipalik sventa xkuch yuʼunik li at-oʼontone xchiʼuk ti xkuchuk yuʼunik li vokoliletike. Jech kʼuchaʼal aʼibat s-orasion li Jabese, jaʼ jech ch-aʼibat s-orasion li jchanunetik ta Galaad eke.

«Mu me xavakʼik xtupʼ li kʼokʼe.» Jaʼ jech sbi li mantal laj yetʼes li ermano Mark Noumair ti jaʼ jchanubtasvanej li ta Chanob vun sventa Vivlia ta Galaad xchiʼuk ti tskolta li Komite sventa Chanubtasele. Li kʼusi tekstoal mas laj yalbe skʼoplale jaʼ li 1 Tesalonicenses 5:16-19. Oy la kʼusi oxtos skʼan sventa mu xtupʼ li kʼokʼe: siʼ, ikʼ xchiʼuk akʼal sventa mu xtupʼ. Jaʼ jech li jchanunetik eke, oy oxtos kʼusi skʼan yuʼunik sventa xmuyubajik noʼox xcholik mantal.

Li kʼusi baʼyel chtun yuʼunike jaʼ li xkuxetel oʼontonale. Xi chal li 1 Tesalonicenses 5:16: «Cuxetuc o me avoʼntonic». Sventa xkuxet noʼox yoʼontonike skʼan snopilanbeik skʼoplal ti kʼusi sbalil staojik ti lek ch-ilatik yuʼun Dios li jchanunetike. Li siʼ laj kalbetik skʼoplale xkoʼolaj xchiʼuk li xkuxetel oʼontonal ti jaʼ chakʼ ti xmuyubajikuk noʼoxe. Li xchaʼtosal kʼusi skʼane jaʼ li orasione. Li ta versikulo 17 xi chale: «Cʼopanic Dios scotol cʼacʼal». Yuʼun li orasione xkoʼolaj kʼuchaʼal li ikʼ sventa xichʼ jubel-o li kʼokʼe. Toj lek ti jal jpastik orasione xchiʼuk ti nopbiluk lek li kʼusi chkaltike, sventa xkalbetik li kʼusi oy ta koʼontontik li Jeovae. Li yoxtosal kʼusi skʼane jaʼ li kʼusi chal versikulo 18: «Tojbeic ta vocol Dios scotol». Li akʼal sventa mu xtupʼ-o kʼokʼ laj kaltike, jaʼ skʼoplal ti jtojtik ta vokol sventa xijmuyubajuk noʼoxe. Kʼalal jnaʼ jtojtik ta vokole jaʼ me tskoltautik sventa mu sikub ti kʼu yelan lek xkil jbatik xchiʼuk Jeova xchiʼuk li kermanotaktike. Li ermano Noumair xi laj yalbe li jchanunetike: «Mu me xchʼay ta ajolik ti xamuyubajik noʼox chatojik ta vokole. Yuʼun mi jech chapasike, muʼyuk me kʼusi chachopol kʼoptaik».

«Kalbetik smukʼulal Jeova jech kʼuchaʼal tspas li vinajele.» Li Sam Roberson ti jaʼ jun jchanubtasvanej li ta chanob vun sventa Vivliae, lik yalbe skʼoplal li Kʼakʼale, li Ue xchiʼuk li kʼanaletik ti te la slokʼes ta junantik versikuloe, taje jaʼ te chal ti la skʼupil kʼoptaik li Jeovae (Salmo 19:1; 89:37; 148:3). Kʼalal laj xaʼox yal ti la skʼupil kʼoptaik Jeova ta cholmantale, li ermano Roberson laj yakʼ ta ilel li kʼusitik lekik kʼot ta pasel yuʼunike. Jech kʼuchaʼal liʼe, jun jchanun ti jaʼo yakal tstsʼot batel skaroe la spajes skaro sventa chakʼ jelavuk jun vinik ta siya de rueda, la stoj tajek ta vokol li vinike. Ta mas tsʼakal jutuke la sta sbaik yan velta, vaʼun li ermanoe la skʼupil kʼopta ti lek laj yakʼ ta ilel stalelale. Jaʼ te lik-o sloʼilik, jaʼ yuʼun li vinike la xchʼam jun chanubtasel ta Vivlia. Kʼalal chkʼot yakʼbe chanubtasel ta Vivlia vinik li jchanun ta Galaade, chcholbe mantal xtok li buchʼutik chkʼot svulaʼanik li vinik taje. La slikes vukub chanubtasel ta Vivlia li ermanoe, taje jaʼ koliyal ti lek loʼilajike.

«Akʼo abtejuk sjuʼel ta yut avoʼontonik li chanubtasel chakʼ Diose.» Li Donald Gordon ti jaʼ yajkoltaobba li Komite sventa Vunetike, la sjakʼbe sloʼil chib nupultsʼakal ti te chchanunajike. Oy jun ermanoe laj yal ti jaʼ mas laj yalbeik skʼoplal li kʼusi chal Efesios 3:16-20. Te la xchanik ti ‹ch-akʼbat sjuʼelik› yuʼun Jeova mi bikʼit chakʼ sbaike, mi lek stakʼik kʼoponele xchiʼuk mi laj yakʼik venta ti toj ep to yabtel Jeova sventa xakʼbe li yajtuneltake. Jun ermanae toj lek laj yaʼi li kʼusi la stunes ta lokʼolkʼop li jchanubtasvaneje. Laj yalbe jchanunetik ti skʼan jech xaʼi sbaik kʼuchaʼal jkot uni bikʼit choy ta jun mukʼta nab, ti mu jechuk kʼuchaʼal jkot mukʼta choy ta uni bikʼit yav choy ti bu mu xchʼie. Xi laj yal li ermanae: «Taje jaʼ laj yakʼ jchan ti skʼan jpʼeluk ta koʼonton ti bikʼit xkakʼ jba li ta s-organisasion Jeovae, yuʼun jaʼ chakʼ ti xichʼi batel ta mantale».

«Akʼo me mu xchʼayoxuk ta sjol Jeova ta skoj ti lek chatunik ta stojolale.» Li Mark Sanderson ti jaʼ jun li ta Jtsop Jbeiltasvaneje, jaʼ laj yetʼes li mantal ti mas tsots skʼoplale. Li sbi mantal laj yetʼese jaʼ li kʼusi laj yalbe Dios li Nehemiase. Xi la stsʼibae: «Dios cuʼun, mu me xachʼayun ta avoʼnton; naʼo me ti lec cʼusi la [jpase]» (Nehemías 5:19; 13:31). Taje maʼuk skʼan xal ti chiʼ mi xchʼayat ta sjol li Nehemiase xchiʼuk ti kʼu yelan tunem tal ta stojolale. Li kʼusi la skʼanbe Jeovae jaʼ ti xmuyubajuk xvulesat ta sjole xchiʼuk ti x-akʼbat bendisione.

Li jchanunetik eke xuʼ me spat yoʼontonik ti xmuyubaj chvulesatik ta sjol li Jeova mi chakʼ ta xkuxlejalik li kʼusi la xchanik ta chanune. Jtos ti kʼusi te la xchanike jaʼ ti chtunik ta stojolal Jeova ta skoj ti skʼanoj ta sjunul yoʼontonike (Marcos 12:30). Jech kʼuchaʼal li Abrahame la skʼan ta sjunul yoʼonton li Jeovae, jaʼ yuʼun toj lek ilat. Jech, kʼalal echʼem xaʼox jmil jabile, xi laj yal li Jeovae: «Li Abraham ti lec la jcʼopan jba jchiʼuque» (Isaías 41:8).

Laj yalbe jchanunetik ti skʼan skʼanik li xchiʼiltakike, pe mas to skʼan skʼanik li yermanotakike (Marcos 12:31). Jaʼ jech skʼan spasik kʼuchaʼal li lekil jsamaria vinike —ti la xkʼuxubin xchiʼil kʼalal laj ta j-elekʼe— skʼan xlokʼ ta yoʼontonik skoltael li buchʼutik tskʼanik koltaele (Lucas 10:36). Li buchʼu laj yetʼes mantale laj yalbe skʼoplal Nicholas Kovalak, ti ayem ta chanun ta Galaad ti tun ta jkʼelvanej ta distritoe, jaʼ jun ermano ti toj lek yoʼontone xchiʼuk ti toj lek snaʼ xkʼuxubinvane. Jun veltae, sventa tstijbe yoʼonton jun jkʼelvanej ta sirkuito xchiʼuk li yajnil sventa masuk xtunik ta stojolal li Jeovae, xi laj yalbee: «Kʼalal sob chalikes avabtelik ta stojolal Jeova ta jujun kʼakʼal, ta jujun u xchiʼuk ta jujun jabile lek kʼusi chkʼot ta pasel». Pe kʼalal laj xaʼox yil kʼu yelan ch-abtej li ermanae, xi laj yalbee: «Mu me xavul tajek avoʼonton ta skoj li kʼusi laj kale. Yuʼun toj ep cha-abtej chkil. Mi chayoch jutuke, mas me jal chatun li ta abtelal liʼe». Koliyal ti kʼusi laj yal ta slekil xchiʼuk ta xkʼuxul yoʼontone, oy xa ta sjayibal jabil tunem tal ta tsʼakal ora li ermanae.

Sventa tstsutses sloʼil li ermano Sandersone la stijbe yoʼonton jchanunetik ti akʼo xchanubtasik xchiʼuk xchapanik ermanoetik sventa stabeik sbalil yantik li chanun laj yichʼike (2 Timoteo 2:2). Jaʼ me jech chkʼot ta pasel yuʼunik li kʼusi sventa laj yichʼik chanubtasele: jaʼ ti tstsatsubtasbeik yoʼonton li ermanoetike xchiʼuk ti lekuk tsots ta mantal li steklumal Diose, vaʼun muʼyuk ta xchʼay ta sjol Dios ti lek la spas li yabtelike (Salmo 20:1-5).

Stsutsebal. Kʼalal laj xaʼox yichʼ li sdiplomaike la skʼel jlik karta jun jchanun ti la stsʼiba ta skotolik sventa tstojik ta vokol li kʼusi la xchanike. Ta slajebe voʼlajunvoʼ jchanunetik la skʼejintaik li kʼejoj 123 li ta livro Jkʼejintatik li Jeovae, ti xi sbie: «Nuestros pastores son un regalo de Dios».