«Xkoʼolaj kʼuchaʼal jun kʼin kʼalal tspas jun utsʼ alalile.» Taje jaʼ li stituloal laj yakʼbe li periodiko Frankfurter Rundschau sbie. Jech chalik ek li buchʼutik ayik li ta asamblea taje.

«Ta jna xa oyun laj kaʼi jba yuʼunik», xi laj yal Karla ti likem ta Puerto Ricoe.

«Xkoʼolaj ti kutsʼ kalal la jvulaʼane, jaʼ noʼox ti ta namal lum oyike», jech laj yal Sara ti likem ta Australiae.

¿Kʼu yuʼun ti jech laj yaʼi sbaike? Yuʼun ayik li ta Asamblea Internasional yuʼun stestigotak Jeova ta estadio Commerzbank-Arena ta Fráncfort del Meno (Alemania). Li asamblea taje echʼ ta 18 kʼalal ta 20 yuʼun julio ta 2014. Jutuk mu 37 mil ayik li ta asamblea taje.

Taje jaʼ sventa chchanik kʼusi chal Vivlia li krixchanoetike. Li ta asambleae laj yichʼ kʼelel Vivlia, kʼejinik, la spasik orasion, echʼ chib drama xchiʼuk mantaletik ti ep la spat oʼontonale.

Li ta asamblea taje la stsob sbaik stestigotak Jeova ta Alemania xchiʼuk ayik van oxmil testigoetik ti likemik talel ta Australia, Estados Unidos, Gran Bretaña, Grecia, Líbano, Serbia xchiʼuk ta Sudáfrica. Ayik 234 stestigotak Jeova xtok ti likemik ta 70 lumetik ti chtunik ta jel tos abtelal ta tsʼakal orae, jech kʼuchaʼal li misioneroetike.

Junantik li mantaletike laj yichʼ jelubtasel batel ta Internet ta balunlajuneb lumetik ta yosilal Alemania. Jech xtok laj yichʼ jelubtasel batel ta Austria xchiʼuk ta Suiza. Ti kʼu yepal laj yaʼiik xchiʼuk laj yilik li kʼusitik echʼ ta asambleae jaʼ 204,046 krixchanoetik.

Li asamblea echʼ ta Francforte jelav ta alemán, inglés xchiʼuk ta griego kʼop. Li ta yantik lum ti bu echʼ li asamblea taje laj yichʼ jelubtasel ta vuklajuneb kʼopetik, li ta kʼopetik taje jaʼ ta árabe, chino, tamil, turco xchiʼuk chib ta senya kʼop.

Akʼo mi jelel li skʼopike xchiʼuk jelel li slumalike, jmoj tsobolik. Taje jaʼ ta skoj ti skʼanoj sbaike (Juan 13:34, 35). Xkoʼolaj kʼuchaʼal yermano sbaik ta melel.

«Kakʼojkutik xa venta ti oy ta spʼejel Balumil li kermanotakutike. Chʼabal kʼusi xuʼ xchʼakunkutik», xi laj yal Tobías, ta Gran Bretaña.

«Kojtikinoj xa stestigotak Jeova ta mas ta jtob lumetik. Ta melel jaʼ tsobolunkutik-o ta skoj ti jkʼanojkutik li Jeova xchiʼuk yantike», xi laj yal Davianna, ta Puerto Rico.

«Li-och ta stestigo Jeova ta jun bikʼit jteklum» —xi laj yal Malcom, ta Australia—. Ta onoʼox jkʼel revistaetik xchiʼuk videoetik ti chalbe skʼoplal li kermanotakutik ta spʼejel Balumile. Pe jaʼ toj laj kaʼibe smelolal ti kʼu yuʼun jkʼanoj jbakutik ta melel jech kʼuchaʼal jun utsʼ alalile. Tsatsub yuʼun li xchʼunel koʼontone.»

Li 58 tsobobbailetik ta Fráncfort xchiʼuk li tsobobbailetik ta sjoylebale la xchapanik matanaletik xchiʼuk kʼusitik xchʼay-o yoʼontonik li buchʼutik ayik ta asambleae.

«Lek laj yakʼ ta ilel slekil yoʼontonik ta jtojolalkutik —xi laj yal Cynthia, ta Estados Unidos— Mu xchʼay-o ta jol ti laj yakʼbeikun ta ilel ti skʼanojikune xchiʼuk ti laj yakʼbeikun ta ilel li slekil yoʼontonike.»

«Buyuk noʼox xvinaj ti jkʼanoj jbakutik ta melele xchiʼuk buyuk noʼox xvinaj ti xitseʼetkutike. Ep kʼusitik la jchanbekutik li buchʼutik ayike», xi chal Simon ti nakal ta Alemaniae.

«Li kʼusitik la xchapanik sventa jchʼay-o koʼontonkutik ta mal kʼakʼale, jaʼ chakʼ ta ilel ti maʼuk skʼan xal ti mu xa stakʼ jchʼay koʼontonkutike. Li voʼonkutike jnaʼojkutik kʼuxi xuʼ lek ta jchʼay koʼontonkutik», xi laj yal Amy ti lik talel ta Australiae.

Li asamblea internasional echʼ ta Francforte jaʼ noʼox jun li ta baluneb mukʼtik lumetik echʼ ta spʼejel Balumile.

Kʼalal laj yichʼ jakʼbel kʼu yelan laj yaʼi sba jun ti buchʼu ay li ta asambleae, xi laj yale: «Nopo noʼox ti chavojtikin jun avutsʼ avalale, jech kʼuchaʼal junuk achiʼil ta vokʼel, pe ti mu toʼox xanaʼ mi oye. Mi laj avojtikine ta sjunul yoʼonton ta xchʼamot. ¿Mi mu xamuyubajuk yuʼun taje? Nopo noʼox avaʼi kʼu to yepal xamuyubaj ti chchʼamot 37 mil stestigotak Jeovae. Ti kʼu yelan chavaʼi abae jaʼ jech chkaʼi jba ek».