Mantaletik ti stuk noʼox jech ti kʼot kʼalal to ta namal Balumile

CHICHʼ TIJEL TA

Li ta sabado 5 yuʼun oktuvre ta 2013 laj yichʼ pasel li tsobajel ti chichʼ onoʼox pasel jujun jabil numero 129 li ta Watch Tower Bible and Tract Society of Pennsylvania. Ti kʼu yepal jmoj la skʼupinik ta yaʼiel li mantale jaʼ: 257,294 krixchanoetik ta 21 lumetik. Jaʼ juteb noʼox ti te laj yaʼiik ti bu echʼ li mantaletike, li yepale ta Internet la skʼelik. Jech xtok, ep stestigotak Jeova la skʼelik xchiʼuk laj yaʼiik ta mas tsʼakal li mantaletike, yuʼun laj to xchaʼetʼesik. Ti kʼu yepal la stsob sbaik ta skotol xae jaʼ: 1,413,676 krixchanoetik ta 31 lumetik. Jaʼ ti bu mas ep la stsob sbaik li stestigotak Jeova ti muʼyuk jech kʼotem-o ta pasele. Ti bu mas ep la stsob sbaik xtok li stestigotak Jeovae jaʼ li ta tsobajel ti stuk noʼox jech echʼ ta 28 yuʼun avril ta 2013. Yuʼun la stsob sbaik 1,327,704 krixchanoetik ti te echʼ ta México xchiʼuk ta Centroamericae.

Li stestigotak Jeova ta sjabilal 1920 kʼalal ta 1930, ta xa onoʼox sjelubtasik batel ta yan lumetik ta telefono xchiʼuk ta radio li mantaletik chetʼesike. Pe ta skoj ti oy xa li Internet avie, xuʼ xa skʼelik ta mas tsʼakal jutuk xchiʼuk xaʼiik li mantaletik ti bu to chalik tale, akʼo mi nom to tajek oyik li yan ermanoetike. Li William ti jaʼ jun stestigo Jeova ti laj yil ta Internet li mantaletik chichʼ pasel jujun jabile, oy xa onoʼox jech yaʼioj ta telefono ta 1942 li mantaletik laj yichʼ jelubtasel batel ta yantik lumetike. Jaʼ te laj yaʼi ta Richmond (Virginia, Estados Unidos). Xi chale: «Muʼyuk kʼusi xuʼ jkoʼoltastik-o. Yuʼun mas ta jkʼupintik yaʼiel li mantaletik kʼalal ta xkil ta jsatike».

Kʼalal laj yichʼ chapanel sventa xichʼ etʼesel ta Internet li mantaletike, jalij mas ta jun jabil. Jal abtej ermanoetik ta Beteletik sventa xichʼ etʼesel li mantaletik ta Internete. Te to la skʼelik talel ta Brooklyn (Nueva York) ti kʼu yelan ch-echʼ li mantaletike. Kʼalal poʼot xa xlik li mantale oy jayvoʼuk teknikoetik tsots abtejik sventa lekuk xvinaj ta yantik lumetik skotol li mantaletik ch-echʼe, akʼo mi oy voʼlajuneb ora sjelbenal li ta jlom lumetik bu echʼe. Li Ryan ti la skolta sba ta sventa li abtel taje, xi chale: «Jutuk li vaykutik, pe kʼalal laj kaʼikutik ti ep buchʼutik la stabeik sbalil li tsobajel taje, te laj kakʼkutik venta ti mu jecheʼuk laj kakʼ jvokolkutike».

Ti kʼusitik chichʼ pasel sventa xichʼ etʼesele

Li kʼusi chichʼ pasel ta slikebale, oy jayib kamaraetik ta slokʼta li kʼusi yakal ch-echʼ sventa tstak batel ta jun makina ti mezclador sbie, taje jaʼ jun makina ti bu xuʼ xichʼ tʼujel li kʼusitik laj xa yichʼ lokʼtaele. Ti kʼu yepal yakal chichʼ lokʼtaele te chichʼ takel batel ti bu tskʼelik ti kʼu yelan chichʼ etʼesel li mantale, ti jaʼ te tspasik ti mu toj masuk lekuk ta kʼelele, ti lektik sba ta kʼelele xchiʼuk ti solel lek tajek ta kʼelele.

Li oxtos ti kʼu yelan laj yichʼ chʼakel taje, ta xichʼ takel batel ta jun komputadora sventa chchʼak ta lajlajuneb segundo, taje jaʼ sventa xichʼ takel batel ta jun komputadora ti mas mukʼe. Li butik ch-echʼ li tsobajele oy jun komputadora sventa tsyales li kʼusitik te oy ta mukʼta komputadorae, vaʼun te tskʼej ta buffer skotol li videoetike, vaʼun kʼalal te xa oy skotole jaʼ sventa mu xtuchʼ ta jujulikel. Jaʼ yuʼun li kʼusitik chichʼ aʼiel o kʼelele, xuʼ van komem 30 o 60 segundo.

¿Pe kʼusi van chkʼot ta pasel mi lik sokuk li Internet ta junuk lum ti bu ch-echʼ li mantale? Sventa mu xtuchʼ ta be li mantal yakal ch-echʼ kʼalal tsok li Internete, jaʼ mu xa toj lekuk xvinaj li videoe. Pe kʼalal tsta yav li Internete mas xa lek xvinaj. Manchuk onoʼox mi xtuchʼ ta be ta jyalel li Internete xvinaj to li videoe, yuʼun te to kʼejel ta buffer li kʼusitik ch-echʼe. Mi mu jaluk soke muʼyuk onoʼox bu chakʼik venta mi bat Internet li buchʼutik te chaʼiik mantale. Ta skoj ti ep kʼusitik xuʼ sok kʼalal jaʼ jech chichʼ jelubtasel li mantaletik ta Internete, tskʼejik li kʼusi yakal ch-echʼe.

Yakal tskʼelik mantal ch-echʼ ta Katherine ta snorteal Australia

KʼUSITIK CHKʼOT TA PASEL