Li Harold Corkern ti jaʼ yajkoltaobba Komite sventa Vunetik li ta Jtsop Jbeiltasvaneje la sjelubtas jun mantal ti xi sbie: «Abtejkutik ti bu kʼalal xuʼ kuʼuntike». Nopajtik onoʼox chkʼot ermanoetik sventa sjelubtasik mantal ti tstijbe yoʼonton li buchʼutik ch-abtejik tee.

Li sakil lonae jaʼ chkoltavan sventa mu xlajik ta sik ta invierno kʼalal ch-abtejike. Te chkom li kosinae, li veʼebale, li enfermeriae xchiʼuk ti bu chchukʼik kʼuʼile.

Chaʼvoʼ j-abteletik ti chlik xa stikʼbeik skavleal luse. Stikʼojik xa mas ta 12 mil metro skavleal lus ta skotol Residencia. Lik xa onoʼox stikʼbeik skavleal lus kʼalal jaʼ toʼox tajek laj yichʼ manel li osile, vaʼun jaʼ to tstsuts stikʼel yuʼunik mi tsuts li abtelal tee.

Jun j-abtel tspakʼbe jtos sinta li ventana yoʼ to mu xakʼbeik li kʼusi mu x-och-o voʼe. Li ta sventanail ta slajeb pisoe yakʼojbeik polimetilmetacrilato (PMMA) ti lek xkuch yuʼun voʼe xchiʼuk ti mu jaluk ta pasele.

Jun ermano xchiʼuk stseb ti tsmeltsanik luse yakal stsʼakik kavleetik sventa oyuk lus li ta jujun kuartoe.

J-abteletik ti te chveʼik li ta veʼebal ti kʼuk noʼox sjalil te chkome. Mas ta chaʼmil buchʼutik tsmakʼlinik te jujun kʼakʼal.

Tstikʼbeik svariyail li kuarto ta yut balumil ta mukʼta na sventa mantenimiento.

Skarta kʼoxetik sventa chalbeik koliyal li buchʼutik chkoltavanik ta svaʼanel li Betele. Muʼyuk jal chbat koltavanikuk li jlom j-abteletike. Te van 500 achʼ j-abteletik chkʼotik jujun xemana. Li ta fevreroe abtejik te van 2,500 j-abteletik skotol kʼakʼal.

Tsutsem xa 60% li abtelale. Li ta enero kʼalal ta avril ta 2015, tsuts yuʼunik svaʼanel stakʼinaltak xchiʼuk yoyaltak li residencia A, B, C, D xchiʼuk Ofisinaetik xchiʼuk snail kʼusitik chtun yuʼun li jbetelitaetike. Vaʼun kʼalal tsutsem xa yuʼunik taje, lik spakʼbeik meskla li mukʼta na sventa mantenimientoe, tspasbeik xa sbelel jujun residencia xchiʼuk tsmeltsanik ti bu oy li tsʼantsʼan voʼ ta Sterling Forest (Blue Lake).

Liʼe jaʼ slokʼol jun storreal li eskaleraetike. Yan j-abteletik ay svaʼanbeik stakʼinaltak li torre ti voʼob piso stayleje, vaʼun jaʼ xa la spakʼbeik meskla li ermanoetik ti te ch-abtejike.

Oy jayvoʼuk j-abteletik yakal tstikʼbeik svariyail li ta baʼyel piso kʼalal jaʼo oy tajek sike. Te van 127 sentimetro yal taiv ta Warwick li ta enero kʼalal ta marsoe. Ta skoj taje, oy jayvoʼ j-abteletik ti jaʼ laj yabtelanik sbekʼel lokʼel taiv li yoʼ bu yakal abtele, jech xtok oy jun yavil yuʼunik ti bu xuʼ xbat xkʼixna sbaike.

Chakʼbeik slaminail sjol li naetike. Ta slajebaltik avrile tsuts xaʼox yuʼunik yakʼbel slaminail jutuk mu skotoluk ti bu chkom li kuartoetike. Te van batel ta 15 yuʼun junioe tsuts yuʼunik yakʼbel sjol li residencia B.

Laj yichʼ lokʼtael ta jun mukʼta grúa, jaʼ jkʼelojtik yalel li residencia B.

J-abteletik (plomeros) ti yakal tskʼelik planoetike. Skʼan oyuk 3,400 splanoal ta sjunul li abtelal ti kʼelbiluk lek skʼoplale.

J-abteletik ti chpixik ta lona jpʼej na sventa mu soke, muyemik ta jun elevador. Baʼyel chchapanatik lek sventa mu kʼusi snuptanik kʼalal tstunesik li elevador xchiʼuk li yan kʼusitike. Chchanubtasatik ta stunesel li elevadore, li xchukobilik sventa mu xpʼajike, tstojobtasatik ta yan kʼusitik xuʼ spasik, chchanubtasatik stunesel li kʼusi chichʼik-o ikʼe xchiʼuk ti xtojobikuk spasel senyail sventa tsjelbeik batel yavil li kʼusitik chkuchike.

Li ta lokʼole jaʼ jkʼelojtik batel smaleb Kʼakʼal ti bu chkom li kuartoetike. Ta slajebaltik avrile tsuts spasel li abtelaletik sventa stikʼel tuvoetik xchiʼuk kavleetik li ta Residencia A, B xchiʼuk D. Li Residencia C (mu xvinaj li ta lokʼole), lik xa spakʼbeik yeso li ta spakʼbale, lik xa sbonik xchiʼuk tspakʼik xa li asulejoe.

Chaʼvoʼ j-abteletik muyemik ta elevador, oy kʼusi chakʼbeik ta spat na sventa mu xjelav li sjob kʼusitike. Te van chibuk u chlaj yakʼbeik ta jujupʼej Residencia.

Oy jayvoʼ alvanil yakal tsvaʼanik na ta ton. Te taje te chvul li kʼusitik chichʼ manele xchiʼuk yan kʼusitik.

Laj yichʼ tojel jun vinik sventa oy kʼusi x-och sjel li ta tsʼantsʼan voʼe. Ta skoj li kʼusi la sjele, jaʼ xa noʼox oy kʼusi tsnetʼik sventa mu xnojik ta voʼ mi tal tsatsal ikʼaloʼe.