Naka to la 6:45 ta sob xchiʼuk lek yox li vinajel ta Tuxedo (Nueva York). Te chkʼot vinik antsetik ti slapoj skʼuʼik sventa abtelal ta jun na ti chankoj spisoal ti te oy ta xokon tsʼantsʼan voʼ ti oy jutuk staivale. Sob lokʼ tal ta snaik o li bu xchʼamunoj svayebike. Jlome nopol noʼox bu likemik tal, pe li yantike nom to bu likemik tal li ta yosilal Nueva Yorke, jech kʼuchaʼal ta Patterson, Wallkill xchiʼuk Brooklyn ti te van 80 kilometrouk snamale.

Jutuk mu skotolikuk maʼuk te likemik ta Nueva York, yuʼun likemik tal li ta lumetik ti nom bu chʼikajtik ta slumal Estados Unidose xchiʼuk ta yan lumetik. Naka noʼox chkoltavan skotolik. Junantike jun noʼox xemana te chkomik, jlome vakib xemana, li yantike mas to jal chkomik. La stoj tal stuk spasajeik xchiʼuk muʼyuk chichʼ stojolik. Akʼo mi jech, xmuyubajik tajek ti tal koltavanikuke.

Li avie talemik 120 j-abteletik, pe li uetik chtale mas to ch-epaj. Lek xcholet ch-ochik li ta veʼebale, lajunvoʼ yajval li mexa bu chveʼike xchiʼuk tsaʼ skafeik. Kʼalal jech taje xmuet xa chaʼiik li ton kaxlan ta tosino ti chchʼilik tal ta kosinae. Vaʼun kʼalal tsta vukub ora ta sobe chichʼ chanbel skʼoplal jun teksto ta Vivlia ti tskʼelik ta televisione. Kʼalal 7:15 xaʼoxe ch-echʼ yakʼik veʼlil li meseroetike. Pe maʼuk noʼox chakʼik li ton kaxlan ta tosinoe, chakʼik pan xchiʼuk avena xtok. ¡Solel oy maʼ veʼlile!

Kʼalal mi laj xaʼox spasik orasione chbat slikes yabtel skotolik. Li buchʼutik ch-abtejik ta smeltsanel naetike xmuyubaj noʼox chloʼilajik kʼalal yakal tslap skaskoik, slenteik, xchalekoik xchiʼuk ti chchuk ta xchʼutik li yabtejebike.

¿Kʼusi yakal tspasik? Chachʼubtasik li smol nail spasobil vun International Paper Company sventa jaʼ xkʼot ta snail ti bu tskʼelik kʼusitik chtun ta svaʼanobil li smeʼ nail abtelal yuʼun stestigotak Jeova ti te tsvaʼanik ta Warwicke. Li kʼusitik chichʼ vaʼanel li ta Tuxedoe jaʼ: vayebaletik, ofisinaetik, tayeretik xchiʼuk snail skʼejobil kʼusitik. Li ta martes 12 yuʼun marso ta 2013, li j-abteletik yuʼun ajvalil ta Tuxedoe laj yalik ti lek li bu snopoj tsvaʼanike.

¿Kʼu yelan chchʼamik li buchʼutik oy noʼox kʼuk sjalil chbat koltavanikuke? William ti likem ta Nueva Jersey ti te akʼbil svayeb li ta naetik ti jaʼ yuʼunik li stestigotak Jeovae, xi chale: «Kʼalal chijkʼote, li ermanoetik ti chchʼamvanike chalik ti bu li kuartoe, bu xkom li kʼusitike, ti kʼuxi ta tunesel li yaveetike... xchiʼuk skotol li kʼusi skʼan jnaʼtike. Toj echʼ noʼox lek yoʼontonik. Kʼalal kʼotemot xaʼox ta Tuxedoe, chbat avojtikin li buchʼu oy ta sba li abtelal bu ataoje, vaʼun chalbot kʼusi skʼan xapas».

¿Kʼu yelan li abtelale? Li Yajaira xchiʼuk smalal ti likemik tal ta Puerto Ricoe jaʼ tspakʼik li yeso ta nae. Xi chale: «La 4:30 ta sob chilikutik. Ta jchʼubakutik komel li jkuartokutike, chkuchʼ jkafekutik, vaʼun ch-echʼ yikʼunkutik jkot karo sventa jmoj xibat ta kabtelkutik. Solel lubemunkutik xa chisutkutik tal. Pe mu ventauk, yuʼun litseʼinkutik sjunul kʼakʼal. Ximuyubajkutik noʼox skotol ora».

Zach xchiʼuk Beth ti jaʼ jun nupultsʼakal ti likemik ta s-estadoal Minnesotae chkoltavanik ta xchʼubael li osil ta Warwick ti oy steʼtikale. Kʼalal chichʼik jakʼbel ti kʼu yuʼun tal koltavanikuke, xi chal li Bethe: «Stuk noʼox jech slekil ti chijtun ta stojolal Jeovae. Oy ta koʼonton ta jtuneskutik ta yabtel Dios li kʼusi xitojobkutik spasele».