Li ta agosto ta 2013, li stestigotak Jeova ta Filipinase tsuts yuʼunik svaʼanel jpʼej Salon sventa Tsobobbail ti stuk noʼox jeche. ¿Kʼu yuʼun ti stuk noʼox jeche? Yuʼun koliyal li jun programa xchapanoj li steklumal Jeovae, laj xa yichʼ meltsanel jmil salon li ta lum taje. Li tsobobbailetik ta Filipinas xchiʼuk li ta yantik lume chʼabal lek stakʼinik xchiʼuk muʼyuk buchʼu xchanoj lek svaʼanel salon ti bu xuʼ stsob sbaike. Jaʼ yuʼun li ta lum taje oy junantik tsobobbailetik ti jal laj yetʼes stsobajelik ta naetike o ta uni naetik ti svaʼanojik ta aje (bambú).

Li Jtsop Jbeiltasvanej yuʼun stestigotak Jeovae la slikes jun programa sventa svaʼanel Salonetik sventa Tsobobbail li ta 1999. ¿Kʼu yuʼun? Yuʼun li ta epal lumetik li vaʼ kʼakʼale yakal ch-epaj li stestigotak Jeovae, jech kʼuchaʼal li ta Filipinase. Jech oxal chtun tajek ep salonetik. Taje jaʼ sventa xichʼik koltael li tsobobbailetik ta lumetik ti abol sbaike. Li ermanoetik tee tskolta sbaik ta takʼin ti bu kʼalal xuʼ yuʼunik sventa xvaʼi li salonike, vaʼun ti kʼu xa yepal skʼane jaʼ chkoltavanik tal li ermanoetik ta yantik lume. Jech xtok, oy jayibuk grupo ermanoetik ti lek chanemik sventa xkoltavanik li ta abtele. Li ta Filipinase lik ta noviembre ta 2001 li programa sventa svaʼanel salon taje.

Oy jun stestigo Jeova ti Iluminado sbie jaʼ te stsobobbail ta Marilao (yosilal Bulacan), ti bu tsʼaki svaʼanel jmil salone. Xi chale: «Laj xa kakʼ venta ti kermano jbatik ta melele. Ep ermanoetik tal skoltaunkutik, talik viniketik, antsetik, kerem tsebetik xchiʼuk li jlome oy xa sjabilalik. Jmoj la jvel jchikʼkutik ta abtel ta skoj ti kʼixin tajek kʼakʼale. Akʼo mi solel lubemunkutik kʼalal chmal kʼakʼale, ximuyubajkutik tajek ta skoj li kʼusitik la jpaskutike».

Ti kʼu yelan tsots abtejik li buchʼutik koltavanike maʼuk noʼox labal sba laj yilik li stestigotak Jeova li ta lum taje. Yuʼun li yajval jkot mukʼta karo ti jaʼ chkuch tal jiʼ xchiʼuk gravae, xi laj yale: «Li voʼoxuke xakoʼolajik kʼuchaʼal xinichʼetik ti jmoj cha-abtejike. Muʼyuk bu xkil-o jech».

Kʼalal vaʼanbil xaʼox yoyaltake mu xa sta vakib xemana tsuts-o li salone. Ta skoj ti muʼyuk jalij li abtele, ta sjunul yoʼonton la xcholik-o batel lekil aʼyej li ermanoetik ta Marilaoe, ti jaʼ li abtelal mas tsots skʼoplale (Mateo 24:14).

Jun stestigo Jeova ti te noʼox nopol nakal ti Ellen sbie, xi chale: «Li ta baʼyel salone mu toʼox xi-ochkutik-o jkotolkutik xchiʼuk ep buchʼutik ta pana chchotiik. Pe li achʼ salone toj kʼupil sba xchiʼuk mas mukʼ. Vaʼun mas xa ta jtabekutik sbalil li mantal chjelav ta tsobajele xchiʼuk tspat koʼontonkutik».