Li ta savado 1 yuʼun marso ta 2014 oy 823 stestigotak Jeova ti xkuxet noʼox yoʼontonik te la stsob sbaik ta Salon sventa Asamblea li ta jteklum Benín ta Nigeria ti stuk noʼox jech echʼe. Kʼalal la xchapanik ta sjabilal 1999 ti chichʼ vaʼanel Salonetik li ta lumetik ti bu chʼabal lek stakʼinike, li avie yichʼoj xa vaʼanel oxmil Salonetik sventa tsobobbail li ta Nigeriae.

Kʼalal la stsob sbaike, te laj yalik ti kʼu yelan lik abtejikuk li ta sjabilal 1920 ta Nigeria sventa oyuk bu xichʼik ta mukʼ Jeova li tsobobbailetike.Ta slikebale tstsob toʼox sbaik ta jpʼejuk na o chchʼamunik noʼox. Oy jun vun chal ti bu lik stsob sbaik ta slikebale, jaʼ ta jun salon ti laj yichʼ vaʼanel ta 1935 li ta jteklum Ilesha ta Nigeriae. Li ta 1938 kʼalal ta 1990 epaj tajek li tsobobbailetike, yuʼun kʼajomal toʼox 14, pe ta tsʼakale kʼot ta 2,681 tsobobbailetik. Jaʼ yuʼun jutuk mu skotoluk tsobobbail vokol chaʼiik bu xuʼ tstsob sbaik. Li ta junantik Salone vakib to tsobobbailetik te tstsob sbaik. Ta junantik salonetike bikʼit tajek, yuʼun mu x-ochik-o, jaʼ yuʼun te vaʼal chkomik ta pana jlomuk xchiʼuk te chnachʼiik ta ventana sventa xaʼiik li mantale. Yantik tsobobbailetik xtoke tstsob sbaik ta jpʼejuk na o ta eskuelaetik.

Li ta 1990, li Betel yuʼun stestigotak Jeovae laj yakʼbe xchʼamun takʼin li tsobobbailetik ti tsobbil sventa chichʼ vaʼanel salonetik sventa tsobobbaile. Jaʼ yuʼun li ta 1997, li Komiteetik sventa Svaʼanel Salonetik ta jujuvokʼ lumetike skoltaoj xaʼox 105 tsobobbailetik ta svaʼanel salonetik o ti jaʼ noʼox chchaʼmeltsanike. Li ta 1997 kʼalal ta 1999 laj yichʼ vaʼanel 13 Salonetik sventa tsobobbail. Taje ta 7 o 15 kʼakʼal noʼox tstsuts yuʼunik jujupʼej.

Ta anil noʼox tstsuts yuʼunik svaʼanel jujupʼej li salonetike, akʼo mi jech mu onoʼox x-ochik-o, yuʼun epajik tajek li stestigotak Jeova ta Nigeriae. Jaʼ yuʼun li ta avril ta 1998, li Betele laj yal ti skʼan vaʼanel 1,114 salontik ta sjunul li lum taje.

Li ta tsobajel la spasik ti toj tsots skʼoplal ti te echʼ yuʼunik ta jteklum Benín, xi laj yal li Don Trost ti jaʼ Komite sventa Svaʼanel Salonetik li ta Nigeriae: «¡Toj ep to abtelal skʼan xichʼ pasel! kVaʼun xi la jnopkutike: ‹¿Kʼusi van xuʼ jpastik sventa spas kuʼuntik li abtelale?›». Te la stabeik stakʼobil ta 1999 kʼalal lik skoltaik tsobobbailetik li Jtsop Jtuneletik ta Svaʼanel Salonetik sventa tsobobbail ti oy ta vakvoʼ o vaxakvoʼ ch-abtejik jujutsop li ta lum taje. Ta skoj ti maʼuk ta lujo la svaʼanike, ta jujun ue te van 17 salonetik la svaʼanik li ta slajebaltik talel 14 jabile.

Kʼalal laj xaʼox yal li Don Trost ti toj lek yabtelike, laj yal ti oy to ep abtelal skʼan xichʼ pasele. Epaj tajek stestigotak Jeovae li ta Nigeriae, yuʼun li ta 2013 oy xaʼox mas ta 8,000. Li Don Trost xi to laj yale: «Ta tsʼakale ta xtun kuʼuntik ep salonetik, jaʼ yuʼun skʼan xichʼ vaʼanel 100 Salonetik sventa Tsobobbail jujun jabil». Li ta 2013 oy xaʼox 351,000 stestigotak Jeova li ta Nigeriae xchiʼuk oy xaʼox mas ta 5,700 tsobobbailetik.