Li ta julio ta 2009 li stestigotak Jeovae la smanik jsep osil ti 102 ektarea smukʼul ta s-estadoal Nueva York sventa te chbat svaʼanik li ofisinaetik yuʼun li smeʼ nail abtelale. Li osil taje te van 80 kilometrouk yiloj ta snoroesteal Brooklyn ti jaʼ te ti bu onoʼox oy leʼ xa ta 1909 li smeʼ nail abtelale.

Yichʼoj alel ti te van 800 stestigotak Jeova te chnakiik xchiʼuk ch-abtejik li ta naetik chichʼ vaʼanel taje, chichʼ vaʼanel ofisinaetik, jpʼej mukʼta na sventa tskʼel li kʼusitik chtun ta Betele xchiʼuk chanib mukʼta naetik sventa kuartoetik. Jech xtok, te chichʼ vaʼanel jun museo ti lek noʼox sbae, ti chalbe skʼoplal stestigotak Jeova li ta jkʼakʼaliltike.

Li kʼusitik tsvaʼanike tsmak vaxaklajuneb ektarea osil, muʼyuk chichʼ tuchʼel li mukʼtikil teʼetike xchiʼuk te chichʼ iktael li xyaxaltak balumile. Muʼyuk xa mas chichʼ tsʼunbel xnichimal li Betele; moʼoj, jaʼ xa noʼox te chkom ti kʼu yelan xvinaj li teʼtikaltike.

Ti kʼu yelan snopoj tsvaʼanik naetik li arkitektoetike, jaʼ sventa mu epuk xlaj lus xchiʼuk yan kʼusitik. Vaʼun mu xa masuk ta x-ikʼub yuʼun li osilbalumil xchiʼuk ti mu xa epuk chlaj takʼine. Jech kʼuchaʼal liʼe, oy kʼusitik chichʼ tsʼunbel ta sjol ti lek xkuch yuʼune, ti kʼun ta kʼelele xchiʼuk ti jaʼ chuchʼ li voʼ kʼalal mi laj yakʼ voʼe, vaʼun jaʼ jech siket noʼox yuʼun li naetike. Li ta ofisinaetike chichʼ tunesel lek li sakil osile. Jech noxtok, chichʼ kʼelel ti mu masuk ep xichʼ lajesel li voʼe.

Pe ¿kʼu yuʼun te chichʼ jelubtasel batel li smeʼ nail abtelale? Oy toʼox jun imprenta ta Brooklyn ti jaʼ te tspasik Vivliaetik xchiʼuk vunetik ti tstunesik li stestigotak Jeova ta spʼejel Balumile. Pe li avie, oy xa yan Beteletik ti tskolta sbaik ta spasel li abtelal taje. Li spasel vunetike xchiʼuk li stakel batel vunetik ta Estados Unidose lik yichʼ pasel ta 2004 ta Wallkill (Nueva York), ti te van 145 kilometrouk xil ta snoroesteal li Brooklyne.

Li kʼusi yan chichʼ tsakel ta venta xtoke jaʼ ti toj ep takʼin chlaj sventa stunesel xchiʼuk skʼelel li Betel ta Brooklyne. Li kʼusi chichʼ kʼanel ta sventa ti mas bikʼit noʼoxe, jaʼ ti masuk lek xichʼ tunesel li takʼin sventa masuk xichʼ pasel li abtelal ta xchanubtasel ta Vivlia li krixchanoetike.

Yoʼ to muʼyuk albil ti oy xa lek spermisoal xichʼ vaʼanele, baʼyuk chichʼ chanbel lek skʼoplal mi toj ep chichʼ ikʼubtasel li osilbalumile. Mi lek lokʼ skotole, li abtelal taje chlik ta 2013 xchiʼuk ta chanib jabil nopbil ti tstsutse.

Jech noxtok, maʼuk noʼox li imprenta ta Wallkill oy yuʼunik li stestigotak Jeovae, yuʼun oy yuʼunik Smeʼ Chanubtasel ta Patterson (Nueva York) xchiʼuk Beteletik ta epal lumetik. Ta skotole oy vukub miyon xchiʼuk oʼlol stestigotak Jeova ta spʼejel Balumil.