Ta svukubal xa jabil akʼbatik yan velta jun vun sventa Industria Limpia li stestigotak Jeovae, taje jaʼ ta skoj li s-imprentaik ti te oy ta Mexicoe.

Ta 26 yuʼun septiembre ta 2012, li stestigotak Jeovae akʼbatik yuʼun ajvalil ta México jun vun ti tsots skʼoplale. Li vun akʼbatike, jaʼ ta skoj ti «yakʼoj yoʼontonik ta skʼelel xchabiel li jabnaltike».

Ti kʼusi oy ta oʼontonal chichʼ tael ti chakʼik li vun sventa li Industria Limpia sbie jaʼ sventa xkʼot ta yoʼontonik xichʼik mas ta mukʼ xchabiel jabnaltik li empresaetike. Akʼo mi jaʼ jun organisasion ti maʼuk sventa tspas kanal takʼin li stestigotak Jeovae, te onoʼox tikʼilik li ta programa taje. Jun yajkʼopojel li ta imprenta ta Mexicoe xi laj yale: «Sventa jtakutik li vun sventa li Industria Limpia sbie skʼan xkakʼkutik ta ilel kʼu yelan li kʼusitik ta jpaskutike xchiʼuk ti mu masuk xkikʼubtaskutik osil balumil jech kʼuchaʼal chal li smantal ajvalile, chkichʼkutik kʼelel ta vuktos kʼusitik ti jaʼik liʼe: ikʼ, voʼ, kʼaʼepetik, kʼusitik xibal sba ti chʼaybilik xae, ti mu kʼusi xibal sba xkʼot ta pasele, kʼusitik sventa lus xchiʼuk li xchanubtasel xchabiel li osil balumile. Li empresaetike muʼyuk sujbilik sventa stsak sbiik li ta programa taje. Pe li voʼonkutike chlokʼ ta koʼontonkutik spasel».

Tspasik ti bu kʼalal xuʼ yuʼunik sventa xkʼuxubinik Balumil li stestigotak Jeova ta spʼejel balumile.