Kerem tsebetik ti tskolta xchiʼilik ta chanun sventa stsal yuʼunik li ilbajinele
Achʼtik toe, li Hugo ti lajuneb sjabilale laj yichʼ akʼbel yuʼun jun organisasion ti chakʼ koltael ta Inglaterra jun premio Diana sbie. Taje jaʼ ta skoj ti la skolta xchiʼiltak ta chanun sventa stsal yuʼunik li ilbajinele.
Xi laj yal li Hugoe: «Ti la jta li jpremioe jaʼ koliyal li video Cómo defenderte sin dar un solo golpe. Koliyal ti oy kʼusi la jchan yuʼun li video ti te ta jtatik ta jw.org jaʼ skoltaojun sventa jkolta yantik ta sventa li ilbajinel ta eskuelae».
Li ilbajinel ta eskuelae «jaʼ jun vokolil ti tsnuptan skotol kʼakʼal kerem tsebetik ta spʼejel Balumile. [...] Pe oy kʼusi xuʼ xapas». (Jtuchʼ video Cómo defenderte sin dar un solo golpe)
Kʼalal laj xaʼox yakʼbe yil video smaestrotak li Hugoe, laj yichʼ kʼelel sventa x-ochik ta spajina stestigotak Jeova skotol li jchanunetike. Ep li xchiʼiltak ta chanun avi li Hugoe, ti te van vaxakib xchiʼuk lajuneb sjabilalike, ch-ochilanik xa-o li ta pajinae. Li xchiʼiltak ta chanune laj yalik ti maʼuk noʼox chkoltaatik sventa mu xichʼik ilbajinele, yuʼun koltabilik xtok sventa stabeik stakʼobil li kʼusitik mas tsotsik skʼoplal tsjakʼbe sbaike. Jech kʼuchaʼal ti kʼuxi ta tael li melel amigoiletike.
Li kʼusitik xuʼ xkoltaatik kerem tsebetik sventa stsal yuʼunik li ilbajinel ta eskuelae
Ta yan eskuela ta Inglaterrae, jun uni kerem ti vaxakib sjabilal ti Elijah sbie, laj yil ilbajinel ta s-eskuela ek. Jaʼ yuʼun la skʼelik xchiʼuk yutsʼ yalal li video Cómo defenderte sin dar un solo golpe. Kʼalal laj xaʼox skʼelike, koʼol la xchanik sventa snaʼ kʼusi chal xchiʼuk kʼusi xuʼ spas mi laj yichʼ ilbajinele. Taje jaʼ akʼbat-o stsatsal yoʼonton. Ta tsʼakale, kʼalal jaʼo yorail ti kʼusi xuʼ xichʼ pasel sventa mu xichʼik ilbajinele, skotol li jchanunetike laj yichʼik akʼbel yil yuʼun smaestroik li videoe.
Melel ti maʼuk noʼox ta Inglaterra chichʼik ilbajinel ta s-eskuelaik li ololetike, yuʼun jech chkʼot ta pasel ta spʼejel Balumil. Ep skoltaoj kerem tsebetik ta buyuk noʼox lumal li videoe.
Jun tseb ti lajuneb sjabilal ta Estados Unidos ti Ivie sbie xiʼtaoj toʼox jun xchiʼil ta chanun ta skoj ti ch-ilbajinate. Pe kʼalal laj xaʼox skʼel li video Cómo defenderte sin dar un solo golpe sbie, mas tsatsub-o yoʼonton sventa stsal yuʼun li ilbajinele. Jech xtok loʼilaj xchiʼuk smaestra, koliyal taje jaʼ koltaat stsalel li kʼusi yakal tsnuptane. Kʼanbat perton yuʼun li xchiʼil ta chanune, li avi une lek xa xil sbaik.
Li stestigotak Jeovae oy tajek ta yoʼonton tskoltaik li kerem tsebetike. Jaʼ yuʼun, jech-o tslokʼesik talel yan kʼusitik sventa skoltaik stsalel ilbajinel jujun kʼakʼal li kerem tsebetik ti tsnuptanik ta eskuelae.
Xuʼ van chakʼupin skʼelel xtok liʼe
DIVUJOETIK TA PISARRON
Xuʼ xapak akʼoplal, pe mu persauk ta majel
Kʼelavil kʼu yuʼun ch-ilbajinvanik xchiʼuk kʼuxi xuʼ xapak akʼoplal.
DIVUJOETIK TA PISARRON
Mu xapas li kʼusi chal yantike
Mi la pas li chantos liʼe jaʼ tskoltaot sventa xnop lek avuʼun li kʼusi chakʼan chapase.