Jujun kʼakʼal epal krixchanoetik ti tikʼilik ta chukel ta Estados Unidose tstsʼibajik batel ta snail jtsʼibajometik yuʼun stestigotak Jeova sventa tskʼanik koltael ta mantal.

Jaʼ yuʼun, chichʼik kʼanbel li tsobobbailetik ti te nopol oy ta chukinab sventa xbat svulaʼanik li jchukeletike xchiʼuk ti xchanubtasik ta Vivliae. Jech oxal chbatik ta chukinabetik, ta ospitaletik ta yut chukinab xchiʼuk ti bu chkoltavanik ta slekubtasel kuxlejale.

Li ta yantik chukinabe chichʼ pasel skotol li tsobajeletike. Jun velta kʼalal laj yichʼ jelubtasel jun Mantal sventa skotol krixchanoetik li ta xchibal yamakʼil jun chukinabe, kʼotik 32 krixchanoetik.

Toj echʼ noʼox lek kʼusitik kʼotem ta pasel. Li ta chukinab ta estado yuʼun Indianae, oy jun vinik ti albat ti te xa chcham-o ta chukinab ta skoj ti milvane, ep xa tajek la sjel li xkuxlejale, avie laj xa yichʼ voʼ kʼuchaʼal stestigo Jeova.

Jun stestigo Jeovae xi laj yalbe skʼoplal jun vinik ti la xchanubtas ta Vivlia ti tikʼil ta mukʼta chukinab ta Californiae: «Jnaʼoj lek kʼu toʼox yelan li ta voʼnee, pe li avie jnaʼoj lek ti jelel xa tajek li xkuxlejale. Ep kʼusitik la sjel ta xkuxlejal sventa xuʼ xichʼ li voʼe».

Ep buchʼutik lik xchanik li Vivliae akʼo mi snaʼojik ti chakʼ ta vokol li xkuxlejalike. Yuʼun li junantik ti tikʼilik toʼox ta jtsop pandiyae, parte chichʼik akʼel o chchʼakatik batel ta yan chukinab yoʼ mu xlajik ta milel.

Li jchabiej chukinabetike chʼayal to chkʼot yoʼontonik kʼalal chakʼik venta ti chjel xkuxlejal li jchukeletik kʼalal chchanik li Vivliae. Ti jech taje, staoj-o smotonik o ch-akʼbatik lek svunal li stestigotak Jeova ta skoj li lekil abtel tspasik li ta chukinabetike.