Li ta disiembre ta 2012, li stestigotak Jeova ta Tailandiae la xchapanik jun kampanya ti stuk noʼox jech sventa skoltaik li jchanunetik yoʼ stabeik sbalil li eskuelae. Jtob stestigotak Jeova ayik li ta eskuelaetik yuʼun Bangkok, la stsob sbaik xchiʼuk li direktoretik yuʼun eskuelae vaʼun laj yakʼbeik jujulik revista li maestroetik xchiʼuk li jchanunetike ti jaʼ li ¡Despertad! yuʼun oktuvre ta 2012 ti jaʼ sbi «Cómo aprovechar al máximo la escuela».

Ta skoj ti jech la spasike toj lek kʼusi kʼot ta pasel jaʼ yuʼun ta sjunul slumal Tailandia jech la spasik. Ta jun jabil xchiʼuk oʼlol, li stestigotak Jeovae ayik ta 830 eskuelaetik. Li maestroetik xchiʼuk li jchanunetike toj kʼupil laj yilik li revistae, jaʼ yuʼun laj to yichʼ pasel imprimir oxib velta ta skoj ti ep to tskʼanike. Yuʼun ta baʼyele laj yichʼ pasel imprimir 30,000 ta lik, pe ta skoj ti toj lek laj yilike laj yichʼ pukel mas ta 650,000.

Li direktoretik xchiʼuk li maestroetike ta anil laj yakʼik venta ti toj tunel li kʼusi yichʼoj tal li revistae. Jaʼ yuʼun xi laj yal jun maestrae: «Li revistae ta skolta sventa lekuk xil sbaik xchiʼuk stot smeʼik li jchanunetike xchiʼuk ti xakʼ yipalik ta stael li kʼusi oy ta yoʼontonike». Jlom eskuelaetike la stunesik sventa xchapan-o sbaik li jchanunetike, li jlom xtoke la stunesik sventa xchanik-o skʼelel lek li vune. Li jchanunetik ta jun eskuelae, la spas stareaik ti te la slokʼesik tal li ta revistae, li buchʼu lek bat yuʼunike laj yichʼ smotonik.

Jun jchanune la stoj ta vokol li revista ta skoj ti yichʼoj tal li mantal ti jaʼ sbi «Cómo ganarle la batalla a la obesidad infantil y juvenil». Laj yal ti mas xa jech tsnuptanik li avie xchiʼuk ti mu kʼunuk ta loʼiltael chaʼi li yamigotake. Xi toj laj yale: «Kolavalik ti chalokʼesik tal tojobtaseletik ti kʼunik ta aʼiel xchiʼuk ti kʼunik ta pasele».

Li totil meʼiletik eke la stojik ta vokol li revistae. Jun ants ti oy yalabe ay vulaʼanatuk yuʼun chaʼvoʼ antsetik ti jaʼik stestigotak Jeovae, li antse laj yal ti mas xa lek chchan vun li stseb ta skoj ti kʼu yelan tojobtasvan li revistae.

Jun yajkʼopojel li stestigotak Jeova ta Tailandia ti Pichai Petratyotin sbie, xi laj yale:«Li revista ¡Despertad! chakʼ iluk ti mu xchʼay sbalil li tojobtaseletik ta Vivliae, akʼo mi toj voʼne xa tsʼibabil. Li stestigounkutik Jeovae toj tsots skʼoplal chkilkutik li tojobtaseletike, jech oxal li muyubajkutik ta spukel li revistaetik ti muʼyuk tojbile».