Muʼyuk. Li stestigotak Jeovae muʼyuk chopol chilik li vacunae. Jujun yajtsʼaklom Kristo ta snop stukik mi chichʼik vacuna o mi muʼyuk. Epal stestigotak Jeovae kʼotem ta nopel yuʼunik ti chichʼike.

 Ta jsaʼkutik ti bu lek xuʼ xkichʼkutik poxtaele xchiʼuk ep sbalil chkilkutik ti mas xa xchanojbeik talel skʼoplal li poxiletik yoʼ mu masuk xmilvan li tsatsal chameletike. Ta jtojbekutik ta vokol ti tsots ch˗abtejik xchiʼuk ti yakʼoj ta yoʼonton yabtel li doktoretike, mas to kʼalal jaʼo oy li tsatsal chameletike.

 Li stestigotak Jeovae chchʼunbeik smantal ajvalil ta sventa ti kʼu yelan skʼan jchabi jbatike. Jech kʼuchaʼal kʼalal lik li chamel coronaviruse, li stestigotak Jeovae slokʼesojik mantaletik ta sienal xa noʼox kʼop liʼ ta Internet sventa svulesbe ta sjol li krixchanoetik ti skʼan jech˗o xchabi sbaik ti bu nakalike. Tstij oʼontonal ti akʼo mu stsob sbaik ti bu chkʼot epal krixchanoetike xchiʼuk ti xkom ta snaike. Jech xtok, chvulesbat ta sjolik ti tsots skʼoplal ti akʼo mu masuk xnopajik ta stojolal li yantike, ti akʼo spok skʼobike, ti stunesik kuvrevokae xchiʼuk ti xchʼunik li yan mantaletik yaloj ajvaliletik ti persa skʼan xichʼ pasele (Romanos 13:1, 2).

 Ta epal jabiletike, li stestigotak Jeovae tslokʼesik tal vunetik ti jech˗o chalilanik talel li beiltaseletik liʼe:

•   Ta jujuntal ta jnoptik ti kʼu yelan ta jpoxta jbatike (Galatas 6:5).

   «[Li revista liʼe] muʼyuk bu chal ti bu mas lek li poxile o junuk poxtael xchiʼuk muʼyuk chalbutik ti kʼusi mas leke. Ti kʼusi noʼoxe, jaʼ ti tsjambe mas smelolale, vaʼun jaʼ tsnop stuk li kʼusi tspas li jun krixchanoe» (¡Despertad!, li ta 8 yuʼun fevrero ta 1987).

   «Voʼoxuk chanopik ta jujuntal xchiʼuk avalab anichʼnabik mi chavichʼik vacuna o mi muʼyuk» (¡Despertad!, li ta 8 yuʼun disiembre ta 1965).

•   Ta jsaʼ jpoxilkutik yuʼun ep sbalil chkilkutik li kuxlejale (Echos 17:28).

   «Li stestigotak Jeovae tstabeik sbalil ti xchanojbeik skʼoplal poxiletik li doktoretike, yuʼun xuʼ xkoltaatik ta jtosuk xchamelik. Ep sbalil chilik li kuxlejale xchiʼuk tspasik ti bu kʼalal xuʼ yuʼunik sventa jaluk xkuxiike, pe ti mu skontrain xtok li kʼusi chal Vivliae» (La Atalaya, li ta 1 yuʼun mayo ta 1976).

   «Maʼuk chopol ti jsaʼtik junuk doktor sventa jchabi jbatike xchiʼuk ti mu xijcham ta anile. Li stestigotak Jeovae muʼyuk tspʼajik li poxtaeletike. Junantik stestigotak Jeovae jaʼik doktoretik jech kʼuchaʼal li Lukas ti kuxi ta baʼyel sigloe [...]. Li stestigotak Jeovae ep sbalil chilik ti chichʼik koltael yuʼun li doktoretik xchiʼuk tstojik ta vokol ti yakʼoj ta yoʼontonik ti chkoltavanike» (La Atalaya, li ta 1 yuʼun fevrero ta 2011).