Ep ta tos Vivlia tstunesik li stestigotak Jeova kʼalal chchanbeik skʼoplal li Skʼop Diose. Pe mas toj lek chkaʼikutik mi oy ta jkʼop jtukutik li Traducción del Nuevo Mundo de las Santas Escrituras sbie, yuʼun tstunesbe li sbi Diose, lek tukʼ jelubtasbil xchiʼuk lek jamal ta aʼiel.

• Tstunesbe li sbi Diose. Jlom li buchʼutik sjelubtasojik li Vivliae, muʼyuk yakʼojik ta ichʼel ta mukʼ li Buchʼu yakʼoj ta naʼele. Jech kʼuchaʼal liʼe, oy jlik Vivlia ti te chalbe sbi 70 ta voʼ krixchanoetik ti la skolta sbaik ta slokʼesel li Vivliae. ¡Pe la stupʼbeik skotol velta sbi li Buchʼu yakʼoj ta naʼel li Vivliae: li Jeova Diose!

  Pe li Traducción del Nuevo Mundo sbie, tstunesbe sbi Dios ti bu jech chal li ta voʼneal tsʼibetike, ti ta smilal xa noʼox te tsʼibabile. Akʼo mi jech, muʼyuk te sbiik li buchʼutik la skolta sbaik ta slokʼesel li Vivliae.

• Lek tukʼ jelubtasbil. Mu skotoluk lek tukʼ jelubtasbil li kʼusi chal Vivliae. Oy jlik Vivlia ti xi chal li ta Mateo 7:13: «Ochanik batel li ta bikʼit tiʼ nae, yuʼun toj mukʼ sbelel li kʼatinbake xchiʼuk muʼyuk bu vokol ti te chijbate». Pe li voʼneal tsʼibe ta stunes «lajelal» maʼuk «kʼatinbak». ¿Kʼu yuʼun ti jech laj yalik li buchʼutik ta sjelubtasike? Jaʼ van ta skoj ti xchʼunojik ti skʼan xbat stoj smulik ta «kʼatinbak» li buchʼutik chopolike. Pe taje mu jechuk chal li Vivliae. Jaʼ yuʼun li Traducción del Nuevo Mundo sbie, xi tsjelubtase: «Jaʼ te xa-ochik batel li ta bikʼit tiʼ nae, yuʼun li sbelel lajele lek jamal xchiʼuk lek mukʼ stiʼ xchiʼuk jaʼ mas ep ti buchʼutik te chbatike».

• Lek jamal ta aʼiel. Kʼalal oy kʼusi lek tukʼ jelubtasbile maʼuk noʼox ti lek jamal ta aʼiele, yuʼun lek kʼun ta aʼibel smelolal xtok. Jech kʼuchaʼal liʼe: li ta Romanos 12:11 xi laj yal li jtakbol Pablo kʼalal ta jelubtastik ta jujupʼele: «Chvokan li espiritue». Kʼalal jech chkaltik ta tsotsile mu xkaʼibetik smelolal, jaʼ yuʼun xi la sjelubtas li Traducción del Nuevo Mundo sventa xkaʼibetik lek smelolale: «Akʼo yakʼ atsatsalik li chʼul espiritue».

Oy to kʼusi labal sba xuʼ xkaltik ta stojolal li Traducción del Nuevo Mundo sbie, maʼuk noʼox ti tstunesbe li sbi Diose, ti lek tukʼ jelubtasbil xchiʼuk ti lek jamal ta aʼiele, yuʼun ta moton chichʼ akʼel xtok. Jaʼ yuʼun, oy ta sbatsʼikʼopik epal miyon krixchanoetik, yuʼun oy lek Svivliaik ek li buchʼutik mu xman yuʼunike.