Jecheʼ loʼil: Li stestigotak Jeovae muʼyuk tspasbeik skʼinal Svokʼel Ninyo (Navidad), yuʼun muʼyuk xchʼunojik ti oy Jesuse.

Li kʼusi melele: Jaʼunkutik yajchankʼop Kristo xchiʼuk jchʼunojkutik ti jaʼ noʼox ta stojolal xuʼ xichʼ tael li kolebale (Echos 4:12).

Jecheʼ loʼil: Kʼalal chchanubtasvanik stestigotak Jeova ti mu stakʼ pasel Navidade, chchʼakik li utsʼ alaliletike.

Li kʼusi melele: Toj tsots skʼoplal chkilkutik ti lekuk oy li utsʼ alaliletike, yuʼun ta jtijbekutik yoʼontonik ti akʼo yakʼ ta xkuxlejalik li mantaletik ta Vivliae.

Jecheʼ loʼil: Muʼyuk ta skʼupinik li skʼinal navidade, muʼyuk chakʼ ta ilel slekil yoʼontonik, muʼyuk jun yoʼontonik ti jaʼo yorail lek snaʼ xakʼ kʼusitik oy yuʼunik li krixchanoetike.

Li kʼusi melele: Chkakʼkutik persa yakʼel ta ilel slekil koʼontonkutik skotol ora (Proverbios 11:25; Romanos 12:18). Muʼyuk ta jkʼankutik takʼin ta jtsobajelkutik xchiʼuk muʼyuk ta jkʼan jtojolkutik kʼalal ta jcholkutik mantale, yuʼun ta jchʼunkutik li kʼusi laj yal Jesus liʼe: «Ta moton la-akʼbatik, jaʼ jech ta moton xavakʼik ek» (Mateo 10:8). Jech xtok, chkalbekutik batel skʼoplal li Ajvalilal yuʼun Dios ti jaʼ noʼox stuk xuʼ xichʼ talel li jun oʼontonale (Mateo 10:7).

• Li Jesuse muʼyuk laj yal ti jpasbetik skʼinal svokʼele, yuʼun jaʼ noʼox laj yal ti jvules ta joltik li slajele (Lukas 22:19, 20).

• Li jtakboletike muʼyuk bu la spasik li navidade mi jaʼuk li baʼyel yajtsʼaklomtak Kristoe. Li New Catholic Encyclopedia, xi chale: «Li baʼyel skʼinal Navidad laj yichʼ pasele, jaʼ ta sjabilal 243 ta jkʼakʼaliltik». Taje echʼem xa ox mas ta 100 jabil xchamel li slajeb jtakbole.

• Chʼabal sprevail ti vokʼta 25 yuʼun disiembre li Jesuse, yuʼun muʼyuk bu chal Vivlia kʼusi ora vokʼ.

• Jchʼunojkutik ti muʼyuk lek chil Dios li skʼinal Navidade, yuʼun te likem tal ta jecheʼ kostumbreetik xchiʼuk ta stojolal jeche’ jchʼunolajeletik (2 Korintios 6:17).

Ep krixchanoetike tspasik li Navidad akʼo mi snaʼojik ti ta jecheʼ kostumbreetik likem tale, yu’un tsnopik ti muʼyuk la toj chopole xchiʼuk ti mu la persauk ti jkontraintik li kʼusi tspasike.

Li Vivliae chalbutik ti ak’o xijtojubutik lek snopel sventa jnop jtuktik li kʼusi ta jpastike (Romanos 12:1, 2). Jech xtok, chchanubtasutik yoʼ oyuk sbalil xkiltik li kʼusi melele (Juan 4:23, 24). Ta jtsakutik ta venta li kʼusi tsnopik ta jtojolalkutik li yantike, pe muʼyuk chkikta jbakutik ta xchʼunel li beiltaseletik ta Vivlia ta skoj ti ja’ no’ox ta jpaskutik li kʼusitik tspasik yantike.

Melel onoʼox ti muʼyuk ta jpaskutik li skʼinal Navidad li voʼonkutike, pe ta jujuntal ta jnoptik mi ta jpastik o mi muʼyuk. Jaʼ yuʼun, muʼyuk buchʼu ta jsujkutik sventa mu spasik li Navidade.