Li stestigounkutik Jeovae lek chkaʼikutik xchiʼinel ta loʼil skotol li krixchanoetik ta sventa li kʼusi chal Vivliae. Jech xtok, ta to jchiʼinkutik ta loʼil li buchʼutik yalojbunkutik xa ti mu skʼan xchikintaike. ¿Kʼu yuʼun? Yuʼun jkʼanojkutik li Diose xchiʼuk li jchiʼiltakutike (Mateo 22:37-39). Li kʼanelal oy kuʼunkutik ta stojolal Diose jaʼ tstij koʼontonkutik ti lek tsʼakal xkalbekutik skʼoplal mantal, jech kʼuchaʼal laj yal komel Jesus ti skʼan pasele (Echos 10:42; 1 Juan 5:3). Jaʼ yuʼun, jech-o chkalbekutik lekil aʼyejetik ta Vivlia li krixchanoetik jech kʼuchaʼal la spasik li j˗alkʼopetik ta voʼnee (Jeremias 25:4). Xchiʼuk li kʼanelal chkaʼikutik ta stojolal li yantike jaʼ tstij koʼontonkutik sventa xkalbekutik li lekil aʼyejetik ta sventa li Ajvalilal yuʼun Diose. Chkalbekutik ek li buchʼu mu skʼan xchikintaike, yuʼun xuʼ sta˗o skolelik (Mateo 24:14).

 Jech xtok, kʼalal chisutkutik ta sna yan velta li buchʼu mu skʼan xchikintaike, ep ta velta jaʼ xa te ta jtakutik li buchʼu oy ta yoʼonton chchikintae. Jkʼeltik oxib srasonal ti kʼu yuʼun chichaʼsutkutike:

•   Tsjel snaik li krixchanoetike.

•   Junantik yutsʼ yalal li yajval nae lek chaʼiik.

•   Xuʼ sjel snopben li krixchanoetike. Ta skoj li kʼusitik chkʼotanuk ta pasel ta spʼejel balumile xchiʼuk li kʼusi tsnuptan ta jujuntal li krixchanoetike, xuʼ xakʼik-o venta ti chtun yuʼunik «li beiltasel chakʼ Diose» xchiʼuk xuʼ x-ayan ta yoʼontonik snaʼel li kʼusi chal Vivliae (Mateo 5:3). Akʼo mi spʼajojik tajek mantal li krixchanoetike, xuʼ me sjel snopbenik kʼuchaʼal la spas li jtakbol Pabloe (1 Timoteo 1:13).

 Akʼo mi tsut jvulaʼankutik li krixchanoetike, muʼyuk ta jsujkutik sventa xchikintabunkutik (1 Pedro 3:15). Jnaʼojkutik ti ta jujuntal skʼan jnoptik li kʼusi ta jchʼuntike (Deuteronomio 30:19, 20).