Li matanal takʼine ta jtuneskutik sventa li kʼusi ta jpas ta jrelijionkutike xchiʼuk ta skoltael li yantike. Li kʼusi mas tsots skʼoplal chkaʼikutike, jaʼ ti xkʼotik ta yajtsʼaklom Kristo li krixchanoetike (Mateo 28:19, 20).

 Muʼyuk bu ta jtuneskutik li matanal takʼin sventa oyuk buchʼu spas ta jkʼulej kuʼunkutike. Mi junuk stestigo Jeova chichʼ stojol kʼalal chchol mantal ta naetike o kʼalal chchanubtasvan ta tsobobbaile. Jech xtok, muʼyuk chichʼ stojolik li buchʼutik chtunik ta Betel, ta Smeʼ nail abtelal, mi jaʼuk li Jtsop Jbeiltasvanej yuʼun li stestigotak Jeovae.

•   Spasel vunetik: Jujun jabil ta jelubtaskutik ta yantik kʼop li Vivliaetik xchiʼuk li vunetike, ta jpaskutik imprimir xchiʼuk ta smiyonal xa noʼox ta jpukutik ta moton. Jech xtok, li vunetik tajek xuʼ te jtatik ta moton li ta jpajinakutik ta Internet ta jw.org xchiʼuk li ta aplikasion JW Library®. Li ta aplikasione muʼyuk kʼusi chichʼ pukbel skʼoplal sventa xichʼ pasel kanal takʼin.

•   Svaʼanel xchiʼuk smeltsanel li kʼusitik tsoke: Ta spʼejel balumil ta jvaʼankutik bu xuʼ xkichʼkutik ta mukʼ Dios ti lekik noʼox sbae xchiʼuk ta jmeltsankutik li kʼusitik tsokanuke. Koliyal taje xuʼ te xichʼ ichʼel ta mukʼ li Diose. Jech xtok, ta jmeltsankutik Beteletik, ofisinaetik bu chichʼ jelubtasel kʼop xchiʼuk ta jkʼelkutik ti lekuk oye. Li ermanoetik ti chkoltavanike muʼyuk chichʼik tojel, jaʼ yuʼun muʼyuk mas ep chlaj takʼin.

•   Skʼelel li kʼusitik chtune: Li matanal takʼin chichʼ akʼel ta sventa li abtelal ta spʼejel balumile chtun sventa spas yabtel li jkʼelvanejetik ta sirkuito, li abtelaletik chichʼ pasel ta smeʼ nail abtelal, ta Beteletik xchiʼuk ta ofisinaetik ti bu chichʼ jelubtasel kʼope.

•   Li xcholel mantale: Mi junuk stestigo Jeova chichʼ tojel kʼalal chchol mantale o kʼalal chchanubtasvan ta Skʼop Diose (2 Korintios 2:17). Pe junantik yajtsʼaklom Kristo ti chanubtasbilik leke xchiʼuk ti chcholik mantal skotol kʼakʼale, chichʼik saʼbel yun nailik xchiʼuk chichʼik akʼbel li kʼusitik chtun yuʼunik jujun kʼakʼal. Taje, jech onoʼox laj yichʼ pasel ta baʼyel sigloe (Filipenses 4:16, 17; 1 Timoteo 5:17, 18).

•   Li chanubtasel chkichʼkutike: Li asambleaetik xchiʼuk li mantaletik ta audio xchiʼuk videoe chichʼ pasel-o xchiʼuk li matanal tak‘ine. Jech xtok, chichʼ chapanel chanob vunetik sventa xichʼik chanubtasel li moletik ta tsobobbail xchiʼuk li buchʼutik tspasbeik yabtel Dios ta tsʼakal ora sventa masuk lek spas li yabtelike.

•   Skoltael li buchʼutik chil svokolike: Chichʼik akʼbel sveʼelik, yaʼalik, bu xuʼ xnakiik li buchʼutik chil svokolik ta nikel, ta nojelal ta voʼ o yan kʼusitik o kʼalal oy kʼusi tspas li krixchanoetik ti chakʼbe svokol li yantike. Li kʼusitik chichʼ pasele tstabeik sbalil ek li buchʼutik maʼuk stestigotak Jeovae (Galatas 6:10).