Li stestigounkutik Jeovae lek chkaʼikutik xchiʼinel ta loʼil sventa Vivlia li krixchanoetik ti yan-o srelijionike, pe muʼyuk bu jmoj xa ta jtsob jbakutik sventa koʼol xkichʼkutik ta mukʼ li Diose. Li Vivliae chal ti melel yajtsʼaklomtak Kristoe skʼan jmoj tsobolik, sventa jech taje, skʼan koʼoluk li kʼusitik xchʼunojike (Efesios 4:16; 1 Korintios 1:10; Filipenses 2:2). Mu baluk noʼox ti koʼol xa kʼusitik ta jpastik ta skoj ti tsots skʼoplal chkiltik ti xijkʼanvane, ti oyuk xkʼuxul koʼontontike, ti xij˗akʼvan ta pertone o yan talelaletik ti oy sbalile. Li kʼusi jchʼunojkutik li stestigounkutik Jeovae jsaʼojbekutik lek skʼoplal ta Vivlia, ti muʼyukuke, muʼyuk sbalil jechuk li kʼusi jchʼunojkutike (Romanos 10:2, 3).

 Li Vivliae chal ti jun yajtsʼaklom Kristoe ‹mu xuʼ spas ta jun xchiʼuk li buchʼu mu koʼoluk kʼusi xchʼunoje› (2 Korintios 6:14-17). Mi la spas sbaik ta jun xchiʼukike, xuʼ me mu xa tukʼuk xakʼ sba li jun yajtsʼaklom Kristo ta skoj ti jelel li kʼusitik xchʼunojike. Jaʼ yuʼun, li Jesuse laj yalbe li yajtsʼaklomtak ti mu stsob sbaik xchiʼuk li buchʼutik mu koʼoluk kʼusi xchʼunojike (Mateo 12:30; Juan 14:6). Jech xtok, li Diose laj yalbe Mantal li j˗israeletik ta stojolal Moises ti mu stakʼ spas ta jmoj sjolik xchiʼuk li yan lumetik ti chichʼik ta mukʼ yan diosetike (Eksodo 34:11-14). Ta mas tsʼakale, li j˗israeletike ep-o sbalil laj yilik li Mantal akʼbatike, yuʼun muʼyuk la xchʼamik li koltael akʼbatik yuʼun li jteklumetik ti te noʼox nopajtik oye. Yuʼun mi jech la spasike, koʼol xa kʼusi tspasik xchiʼuk li yan krixchanoetik ti mu koʼoluk kʼusi xchʼunojike (Esdras 4:1-3).

 Tana, ta jchiʼinkutik ta loʼil skotol li krixchanoetike akʼo mi jelel li srelijionike. Li ta sjabilal 2023, xi sjalil la jchiʼinkutik ta loʼil li krixchanoetike: 1,791,490,713 oraetik. Jech kʼuchaʼal la spas li jtakbol Pabloe, chkakʼkutik persa ta yaʼibel smelolal ti kʼu yelan tsnopike xchiʼuk li kʼusi xchʼunojik sventa xojtikinik li kʼusi melele (1 Korintios 9:19-22). Kʼalal ta jchiʼinkutik ta loʼil li krixchanoetike, ta jtsakutik ta venta li kʼusi xchʼunojike, jech kʼuchaʼal chal li Vivliae (1 Pedro 3:15).