Mi laj yiktaik xcholel mantal xchiʼuk mi muʼyuk xa chbatik ta tsobajeletik li buchʼutik yichʼojik xa voʼe, muʼyuk chkiktakutik xchiʼinel. Yuʼun chkakʼkutik persa sventa jkoltakutik ta mantal xchiʼuk ti akʼo sut talele.

Kʼalal tsots tspas smul li buchʼu yichʼoj xa voʼe, xuʼ van xichʼ lokʼesel li ta tsobobbaile. Pe mu ta aniluk noʼox ta xichʼ lokʼesel. Jaʼ to mi nopem xa xaʼi ti mu stsak ta venta li mantaletik ta sventa talelal chal Vivliae xchiʼuk mi muʼyuk la sutes yoʼontone, chichʼ lokʼesel. Vaʼun, muʼyuk xa ta jchiʼinkutik ta loʼil. Xi jamal chal li Vivliae: «Lokʼesik ta atojolalik li buchʼu toj chopole» (1 Korintios 5:13).

Mi laj yichʼ lokʼesel ta tsobobbail li malalile, pe ti jaʼik to stestigotak Jeova li yajnil xchiʼuk xnichʼnabe. ¿Kʼusi chkʼot ta pasel? Akʼo mi muʼyuk xa jmoj chtunik ta stojolal li Jeovae, pe ti kʼu yelan tskʼel yajnil xchiʼuk xnichʼnabtake, muʼyuk chjel.

Li buchʼutik yichʼojik lokʼesel ta tsobobbaile xuʼ xbatik li ta jtsobajelkutike, jech xtok, xuʼ skʼanbeik koltael ta mantal li buchʼu chtun ta mol ta tsobobbaile. Taje jaʼ sventa xlik spasik yan velta li kʼusitik chichʼ kʼanel yoʼ xkʼotik yan velta ta stestigo Jeovae. Ti mi la spʼajik li kʼusitik ibalik sba xchiʼuk mi ta sjunul yoʼonton chakʼ ta xkuxlejalik li beiltaseletik ta Vivliae, xuʼ sutik talel li ta tsobobbaile.