Li Watch Tower Bible and Tract Society of Pennsylvania ti lik ta 1884 jaʼ jun organisasion ti ojtikinbil ta stojolal ajvalil ta Pensilvania (Estados Unidos), pe maʼuk sventa pasob kanal takʼin. Li Watch Tower Bible and Tract Society of Pennsylvania jaʼ jech ojtikinbilik li stestigotak Jeova sventa spas yuʼun li yabtelike, ti tslokʼesik li Vivliae xchiʼuk li yantik vunetik lokʼemik ta Vivliae.

 Jech kʼuchaʼal chal li mantaletik yuʼun ajvalile, li Watch Tower sbie jaʼ noʼox chichʼ tunesel sventa «relijion, chanubtasel xchiʼuk yan koltaeletik». Li kʼusi mas chichʼ-o tunesele jaʼ sventa xichʼ «cholel batel mantal xchiʼuk ti xichʼ albel batel skʼoplal li Ajvalilal yuʼun Dios ti jaʼ li Jesukristoe». Li buchʼutik te skʼoplalik li ta organisasion taje takbilik ta ikʼel, maʼuk ta skoj ti kʼu yepal chakʼ stakʼine. Li buchʼutik te skʼoplalik li ta organisasione xchiʼuk li buchʼutik oy ta sbaik li abtelaletik tspasike, jaʼ tskoltaik li Jtsop Jbeiltasvanej yuʼun li stestigotak Jeovae.

 Li Watch Tower Bible and Tract Society of Pennsylvania sbie maʼuk noʼox jech ojtikinbil li stestigotak Jeovae, oy to yan ti ta sienal noʼox kʼuxi ojtikinbilik xtok li ta mukʼtik lumetike. Ojtikinbilik kʼuchaʼal «Watch Tower», «Watchtower» o ti kʼutik yelan chichʼ jelubtasel ta jeltos kʼopetik li chaʼpʼel kʼop liʼe.

 Ti vaʼ yelan ojtikinbilik li stestigotak Jeovae ep kʼusitik kʼotem ta pasel. Kalbetik skʼoplal jaytosuk.

•   Stsʼibael xchiʼuk spukel vunetik. Jpukojkutik mas ta 220 miyon Vivlia xchiʼuk te van 40 mil miyon ta lik vunetik pukbil mas ta 700 jeltos kʼopetik. Jech xtok, koliyal ti chichʼ tunesel li jw.org sbie xuʼ skʼelik ta moton li Vivliae, ti oy mas ta 120 jeltos kʼopetike xchiʼuk te chichʼ takʼel li sjakʼobil liʼe: «¿Kʼusi jaʼ li Ajvalilal yuʼun Diose?».

•   Chanubtasel. Chkakʼkutik chanubtasel ta Vivlia. Jech kʼuchaʼal liʼe, li ta 1943, te lik talel li Chanob vun sventa Vivlia ta Galaad yuʼun Watchtower ti skoltaoj mas ta 8,000 stestigotak Jeova ti chtunik ta misioneroetik xchiʼuk ti chkoltavanik yoʼ mas lek xichʼ cholel li mantale. Jech xtok, ta smiyonal noʼox krixchanoetik, ti te skʼoplalik li buchʼutik maʼuk to stestigo Jeovae, staojbeik sbalil li tsobajeletik chichʼ pasel jujun xemanae. Jech xtok, oy chanun sventa skʼelel xchiʼuk stsʼibael vun xchiʼuk oy svunal kuʼunkutik ti oy mas ta 110 jeltos kʼopetike yoʼ xchanik skʼelel vun li krixchanoetike.

•   Yan koltaeletik. Chikoltavankutik kʼalal oy bu chkʼot nojelal ta voʼ, nikel o yan kʼusitik ti chkʼotanuk ta pasele. Jech kʼuchaʼal liʼe, la jkoltakutik li buchʼutik laj yil svokolik ta skoj li mukʼta milbail echʼ ta Ruanda ta 1994 xchiʼuk kʼalal echʼ li nikel ta jteklum Haití ta 2010.

 Akʼo mi lek kʼusitik kʼotem ta pasel ta skoj ti ojtikinbil ta ajvalil li stestigotak Jeovae, ta jujuntal oy ta jbakutik xcholel mantal xchiʼuk ti xkakʼbekutik yil krixchanoetik li kʼusi chal Vivliae (Mateo 24:14; 28:19, 20). Jchʼunojkutik ti tskoltaunkutik Dios li ta cholmantale xchiʼuk ti jaʼ chakʼ chʼiuk batele (1 Korintios 3:6, 7).