Li ta yorail tsatsal chamel COVID 19, li stestigotak Jeovae la sjelik ti kʼu yelan chcholik mantal sventa spatbeik yoʼonton li krixchanoetike. Muyuk la xcholik mantal ti bu oy pe krixchanoetike xchiʼuk mi jaʼuk ta jujupʼej naʼ, ta telefono xchiʼuk ta karta xa noʼox la xcholik mantal. a Oy ep krixchanoetik ti ep sbalil laj chilik taje, jamal xvinaj ti akʼbatemik bendision yuʼun Jeova (Proverbios 16:3,4). Jkʼeltik avil kʼusi kʼotemik ta pasel ta jun lum ti joyol ta nabe.

 Kʼalal chʼabal toʼox li chamele, li Helene nopem xaʼi chkʼot svulaʼan jun tsebal ants. Bakʼintike, laj yalbe mi tskʼan chchan Vivlia, pe chal ti moʼoje. Kʼalal jun xa ox kʼakʼal skʼan xalik ti mu xa stakʼ xijlokʼ ta skoj li COVID-19, li Helene laj yichʼbe batel jlik Vivlia xchiʼuk li livro ¿Kʼusi chchanubtasvan li Vivliae? Li ta yorail xa chamele, li Helene la xchaʼjakʼbe mi tskʼan chchan li Vivliae, pe jaʼ noʼoxe ta telefono xa xut, laj yal ti xuʼe. Ta skoj ti tskʼupin tajeke, la skʼanbe Helen ti akʼo chanunajikuk jujun kʼakʼale. Li antse lik xchikinta ta telefono li tsobajeletik xchiʼuk lik yakʼ ta xkuxlejal li kʼusitik chchane, jech xtok, lik yalbe yantik li kʼusi yakal chchane.

 Oy jayvoʼ ermanoetik ta jun tsobobbaile la snopik stsʼibabeik batel karta li polisiaetik sventa tstojbeik ta vokol li yabtel tspasike. Labal to sba laj yilik li polisiaetike. Jun polisiae xi laj yalbe li Jefferson ti jaʼ jun mol ta tsobobbaile: «Ta jnop toʼox ti kontra chilik polisiaetik li stestigotak Jeovae». Pe li Jefferson la xchapbe smelolal taje. Li polisiaetike toj kʼupil sba laj yaʼiik li karta ti te laj yichʼ akʼel ta yochebal snail polisiaetik, yuʼun tspat oʼontonal. June xi to laj yale: «Liʼe chkoltavan sventa lekuk kʼusi snopik ta jtojolalkutik li yan krixchanoetike».

 Li Edna xchiʼuk Ednalyn jaʼik prekursor regularetik. b Ta skoj ti chʼabal Internetik ta snaike, mu stakʼ skʼelik li tsobajeletik ta videoconferenciae. Jaʼ yuʼun, la sjakʼbeik jun slakʼnaik ti maʼuk stestigo Jeova mi xakʼ permiso ti xnochʼan sbaik li ta S-internete xchiʼuk laj yalbeik ti tskolta sbaik ta stojele. Lek xi li slakʼnaike xchiʼuk muyuk la skʼanbe stojol. Vaʼun, li Edna xchiʼuk Ednalyne laj yalbeik mi tskʼan ch˗och ta tsobajele, lek laj yaʼi. Avi une, li slakʼnaik xchiʼuk jun yalab xchiʼuk chaʼvoʼ smamobtake, yakal xa chichʼik estudio xchiʼuk nopajtik chkʼotik li ta tsobajeletike.

 Junantik stestigotak Jeovae la stakik ta ikʼel slakʼnaik, xchiʼiltakik ta abtel xchiʼuk yan krixchanoetik sventa xchikintaik jun mantal ti ta videoconferencia chjelave. Jun ermana ti Ellaine sbi ti ch-abtej ta jun ospitale, la stak ta ikʼel ta tsobajel xchiʼiltak ta abtel, ta slikebale xchibet noʼox mi tstakan ta ikʼel, yuʼun tsnop ti junantik doktoretike chopol chil li stestigotak Jeovae. Pe mas to xchibet chalbe jun nupultsʼakal ti jaʼik doktoretike. Akʼo mi jech, li Ellaine laj onoʼox yalbe junantik doktoretik li ta ospitale. La spas orasion xchiʼuk kʼot ta nopel yuʼun ti ta xalbe ek li nupultsʼakale. Xi laj yal li doktorae: «¿Mi yuʼun chakʼan chi˗och ta testigo ek?». Li Ellaine laj yalbe ti buchʼuuk noʼox xuʼ xkʼot li ta tsobajeletike, maʼuk noʼox li stestigotak Jeovae. Ta yokʼomale, chʼayal to kʼot yoʼonton li Ellaine, yuʼun sob xa noʼox och tal ta tsobajel li nupultsʼakale. Li Ellaine xi laj yale: «Kʼalal muyuk toʼox chlaj li tsobajele, li doktorae la stakbun jun mensaje ti xi laj yalbune: ‹Sba to velta li˗ay li ta stsobajel stestigotak Jeovae xchiʼuk lek tajek jelav, la jkʼupin tajek. Kolaval ti la atakun ta ikʼele›».

 Li Ellaine la stak ta ikʼel 20 doktoretik li ta tsobajele xchiʼuk xmuyubaj tajek yuʼun ochik 16 doktoretik li ta tsobajele. Vul ta sjol li kʼusi laj yal jtakbol Pabloe, xi laj yal li Ellaine: «Ximuyubaj tajek, yuʼun la jta stsatsal koʼonton sventa xkalbeik lekil aʼyejetik sventa Dios li jchiʼiltak ta abtele» (1 Tesalonisenses 2:2).

 Jkotoltik laj jkil jvokoltik ta skoj li chamel coronaviruse. Pe li stestigotak Jeova ti liʼ oyik li ta lum joyol ta nabe xchiʼuk li ta spʼejel balumile ep kʼusitik spasojik sventa spatbeik yoʼonton xchiʼuk tskoltaik li krixchanoetike. Ta skoj taje xmuyubajik noʼox li ermanoetike xchiʼuk jun noʼox yoʼontonik (Echos 20:35).