Li Elisa ti jaʼ stestigo Jeovae chchanubtas ta Vivlia jun ants, jaʼ toe oy buchʼu te kʼot ta vulaʼal ta sna li antse jaʼ jun pale xchiʼuk yajnil. Li Elisae laj yaʼi ti achʼ to xchamel li jun yuni keremike.

Kʼalal laj yal Elisa ti kʼux chaʼibe li svokolike te lik okʼuk li pale xchiʼuk yajnile. Xi xkapet xa sjol laj yale: «Mu xkaʼibe smelolal kʼu yuʼun jech la spasbun li Diose. ¿Kʼu xa noʼox chal ti laj yikʼbun batel li jun kuni kereme? ¿Mi jaʼ jech tstojbun ti oy xa ta 28 jabil chkichʼ ta mukʼ xchiʼuk ti muʼyuk chopol kʼusi ta jpase? ¿Kʼu yuʼun ti la smilbun li kuni nichʼone?».

Li Elisae laj yalbe ti maʼuk laj yikʼ batel Dios li xnichʼone. La sloʼiltabe ti cham ta jkojtik li Jesuse, ti oy chaʼkuxesel ta tsʼakale xchiʼuk laj yalbe ti kʼu yuʼun yakʼoj to permiso Dios ti jech chkʼot ta pasele. Li pale xchiʼuk yajnile laj yalbeik Elisa ti takʼbatik xa yuʼun Dios li kʼusi la skʼanbeike.

Kʼalal echʼ jun xemanae, li pale xchiʼuk yajnile sutik batel ta sna li antse, li Elisae xchiʼuk antse jaʼo yakal chchanik li kapitulo 7 li ta livro Kʼusi chchanubtasvan li Vivliae, ti xi sbie. Chchaʼkuxi li animaetike, li pale xchiʼuk yajnile toj lek laj yaʼi li kʼusi chchanike, yuʼun te tstakʼilan ek.

Ta mas tsʼakale, batik ta asamblea yuʼun stestigotak Jeova ta Tiflis (Georgia) toj lek laj yil ti skʼanojan sbaik li ermanoetike xchiʼuk ti jmoj tsobolike, li ta xchʼulna toʼoxe ta epal jabil yakʼojik persa ti jechuk skʼan sbaike, pe muʼyuk bu pasem-o yuʼunik.