Stestigo Jeova li Broke xchiʼuk te nakal ta Estados Unidos. Ep la stsʼiba karta sventa xchol mantal kʼalal jaʼo yakal li COVID˗19. Ep tajek karta la stsʼiba jujun xemana. Pe kʼalal lokʼ jun jabil xchiʼuk oʼlole, chibaj yoʼonton, yuʼun kʼajomal noʼox jun krixchano takʼbat... pe jaʼ noʼox sventa chal ti mu xa skʼan jsetʼuk li kartaetike. Vaʼun, la snop ti jecheʼ xa chakʼ yipale.

 Ta tsʼakal jutuke, oy jun stestigo Jeova ti Kim sbie laj yalbe Broke ti la xchiʼin ta loʼil jun kliente li ta vanko bu ch˗abteje. Li klientee laj yal ti laj yichʼ akʼbel jun karta ti tsʼibabil ta kʼabale, ¡taje ja’ li skarta la stak batel li Broke! K’alal echʼ jun xemanae, sut batel ta vanko li klientee. Vaʼun la sjakʼbe Kim mi xuʼ xbat li ta tsobajeletike, pe li vaʼ kʼakʼale ta videoconferencia toʼox ta x˗echʼ.

 Ta tsʼakal jutuke, jun stestigo Jeova ti David sbie laj yalbe Broke ti laj yichʼ akʼbel jlik karta ti jaʼ la spas li Broke. Solel la skʼupin tajek k’alal laj yil ti tsʼibabil ta kʼabale. Vaʼun, xi laj yale: «Ti jechuk to la yan krixchanoetik ti oy ta yoʼonton li xchiʼiltakike». Li Davide lek xa laj ya’i sventa xcholbe˗o mantal xchiʼuk la sjakʼbe mi tskʼan tskʼel jlikuk jvuntik. Vaʼun, la xchʼam li jvuntike xchiʼuk la stoj ta vokol.

 Li stestigoutik Jeovae mu onoʼox jnaʼtik bu chvokʼ li sbekʼ tsʼunobil ta jtsʼuntike (Eklesiastes 11:5, 6). Pe li kʼusi lekik kʼotanuk ta pasele te laj yakʼ venta Broke ti toj ep sbalil ti kʼu yelan la xchol mantale (1 Korintios 3:6).