Li ta 2017, li ta Costa de los Mosquitos, ti Mosquitia sbi xtoke ti te xkom ta Nicaraguae, oy 12 stestigotak Jeova ti lokʼik batel ta jkot varko ti Sturi Yamni sbie. Li Stephen ti te bat li ta varko eke, xi chvul ta sjole: «Li kʼusi oy ox ta koʼontonkutike jaʼ ti xbat jvulaʼankutik jtsop stestigotak Jeova ti nom tajek bu nakalike sventa jpatbekutik yoʼontonik xchiʼuk ti jkoltakutik ta cholmantal li ta sterritorioike».

Li 12 testigoetike te likik batel ta Laguna de Perlas, laje batik ta Río Grande ta Matagalpa jaʼ to ti kʼuxi kʼotik li ta jteklum La Cruz ta Río Grande, ta skotole 200 kilometro xanavik li ta varkoe. Li vaʼ orae, mu toʼox snaʼik ti tsots skʼoplal chil krixchanoetik ti te nakalik ta ti ukʼum li smelolal sbi varko ti «lekil aʼyejetik» skʼan xal li ta misquitoe. 12 ora xanavik ta varko, muʼyuk bu xpajik sventa xvayik, vaʼun kʼotik ti bu tskʼan chbatike. Ta sjunul yoʼonton la xchʼamik ermanoetik li vakvoʼ testigoetik ti te nakalike.

Li vaʼ akʼobale, oy kʼusi toj tsots kʼot ta pasel. Tal jun chaukil voʼ ti noj yuʼun li Río Grande ta Matagalpae. Ta jayib noʼox orae, lokʼ talel yok li ukʼume. Vaʼun, ta chib noʼox kʼakʼale mas to noj talel li voʼe. Noj ta voʼ xtok li Salon sventa Tsobobbail xchiʼuk epal naetik li ta jteklum La Cruze. Li ermanoetik ti jaʼo te talemik ta vulaʼale la skoltaik li yan krixchanoetik sventa xlokʼik batel li ta snaike. Jutuk mu skotolikuke te komik chib akʼobal ta xchibal piso sna jun ermana.

Kʼalal yoxvoyal xa oxe, li alkalte ta jteklum La Cruz la skʼanbe koltael li stestigotak Jeova ti kʼotik ta varkoe. Ta skoj ti lek to tsots li varko Sturi Yamnie, jaʼ noʼox stuk ti xuʼ xanav batel li ta ukʼum ti tsots tajek yoke. Jaʼ yuʼun, li alkaltee laj yalbe ermanoetik ti akʼo xikʼik batel jayvoʼuk krixchanoetik ti bu chbat li yok ukʼume sventa xbat skoltaik junantik parajeetik ti nojik ta voʼ eke. Ta sjunul yoʼonton koltavanik li ermanoetike.

Ta yokʼomale, oxvoʼ testigoetik bat xchiʼinik li buchʼutik bat koltavanikuke. Xi chal li Stephene: «Xibal sba ta jmoj ti chibatkutik ta varkoe, yuʼun li ukʼume xkuchoj batel mukʼtik teʼetik, stsʼototet tajek li voʼe xchiʼuk tsots ta jyalel yok li ukʼume, yuʼun 18 kilometro ta ora stsatsal». Akʼo mi vokol tajek laj yaʼiik, kʼotik ta oxib parajeetik.

Li jnaklejetik tee tskʼanik tajek patbel yoʼontonik, jaʼ yuʼun li oxvoʼ testigoetike la spatik oʼontonal. La spukik komel li revista ¡Despertad! ta 2017 ti xi sbie: «Cuando golpea un desastre. Qué hacer para sobrevivir». Li kʼusi chal li revistae jaʼ li kʼusi chtun tajek yuʼunike.

Li krixchanoetik taje la stojik tajek ta vokol ti laj yichʼik koltaele xchiʼuk ti patbat yoʼontonik ta Vivlia yuʼun li stestigotak Jeovae. Junantike xi laj yalike: «Ta sjunul yoʼonton la skoltaunkutik kʼalal tsots chkil jvokolkutike». Yantik xtoke, xi laj yalike: «Ta melel, skʼanojik li yantike». Kʼalal laj yilik ti la skolta yermanotakik li testigoetike xchiʼuk li yan krixchanoetike, mas xa oy ta yoʼonton chchikintaik kʼusi chal Vivlia li krixchanoetik teye.