Jun veltae, jaʼo tsots tajek ikʼaloʼ li ta Alberta (Canadá), chakʼ tajek sik xchiʼuk tsots tajek ikʼ. Jun vinik ti Bob sbie anil ta jmoj tstsʼot batel skarro (100 kilómetro por hora), vaʼun tʼom jpʼej syantail li skarroe. Ta skoj ti muʼyuk yakʼ venta li Bobe, la stsʼot-o batel skarro akʼo mi skʼan toʼox 5 kilometro xkʼot ta sna.

Li Bobe la stsʼiba ta jlik karta li kʼusi kʼot ta pasele, vaʼun la stak batel ta Salon sventa Tsobobbail ti bu nakale. Xi laj yale: «La staun ta be jkot karro ti te tikʼil tal voʼob kerem tsebetike xchiʼuk nopajik tal ta xokon jkarro. La syales li sventanaike xchiʼuk laj yalbeikun ti muʼyuk lek jpʼej syantail li jkarroe. Lipajkutik ta xokon be, vaʼun la skoltaikun. Mu xvul ta jol mi te jkuchoj yan jyanta xchiʼuk li kʼusitik chtun sventa jeltae. Kʼalal yakal tsaʼik li kʼusitik chtun xchiʼuk ti lik sjeltaik li yantae, voʼone te noʼox chotolun ta jsiya de rueda jkʼelojik. Toj echʼ noʼox sik li vaʼ orae xchiʼuk chyal taiv. Akʼo mi lek slapoj batel skʼuʼ spokʼ li kerem tsebetike, ta slekil yoʼontonik la skoltaikun. Ti manchukuk la skoltaikune, naʼtik kʼusi la jpas».

Xi to laj yal li Bobe: «Ta jtojbeik tajek ta vokol li voʼob testigoetik ti la skoltaikune. Li kerem tsebetik taje jaʼo yakalik ta cholmantal. Ta melel, chakʼ ta xkuxlejalik li kʼusi chakʼik ta chanele. La skoltaikun spasel li kʼusi mu spas kuʼun jtuk jechuke. Batsʼi kolavalik tajek. Xkoʼolaj ti takbilik tal yuʼun Dios li kerem tsebetik taje, yuʼun muʼyuk jnopoj ti jech tskoltaikune.