Li Daiane jaʼ jun stestigo Jeova ta Brasil ti jaʼ prekursorae. Jun kʼakʼal kʼalal jaʼo yakal chchol mantal ta telefonoe, la xchiʼin ta loʼil jun nupultsʼakal ti kerem tsebik to xchiʼuk ti lek laj yaʼiik li kʼusi chal Vivliae. Pe albat ti chbat nakliikuk ta jun bikʼit jteklum ti nom to bu chʼikile xchiʼuk ti chʼabal slusik xchiʼuk internet tee. Jech xtok, muʼyuk junuk stestigo Jeova te nakal. Li nupultsʼakale laj yakʼbeik snumeroal telefono te ta jteklum li Daiane yoʼ xkʼoponatik echʼele. Laj yalik kʼusi ora xuʼ skʼopon sbaik yan velta sventa xalbeik skʼoplal li Vivliae.

 Li Daiane kʼopoj batel ti kʼusi ora kom skʼoplal yuʼunike. Vaʼun, takʼbat yuʼun li nupultsʼakale. Oxib to velta la xchiʼin sbaik ta loʼil ta chib noʼox xemana.

 Akʼo mi jech, kʼalal echʼ li chib xemanae muʼyuk xa takʼavik yan velta li nupultsʼakale. Pe li Daiane muʼyuk lubtsaj, yuʼun jech˗o oxib velta ta xemana la skʼopon. Vaʼun, lik xcholbe mantal buchʼuuk noʼox stakʼ li telefonoe. Ta tsʼakale, li Daiane lik yakʼ jayibuk chanubtasel ta Vivlia.

 Jun velta kʼalal jaʼo kʼalal chchanubtasik ta Vivlia jun kerem li Daiane xchiʼuk smalale, jun jnitvanej ta relijion ti laj yaʼi li kʼusi yakal chalbeik skʼoplale nopaj talel yoʼ bu oy li kerem sventa xaʼi leke. Li vinike laj yal ti tskʼan chchiʼin ta loʼil li Daiane xchiʼuk smalale. Te laj yalbe ti lek laj yaʼi li kʼusi la sloʼiltaike xchiʼuk ti tskʼan chchan Vivlia eke.

 Ta tsʼakale, li Daiane xchiʼuk smalale lik yakʼbeik chanubtasel ta Vivlia vakvoʼ krixchanoetik ti te nakalik li ta jteklum ti nom to bu chʼikile, te tsakal skʼoplal ek li jnitvanej ta relijione. Junantike stsakanoj xa sbaik ta tsobajel xchiʼuk jaʼ stunesojik li telefono te ta jteklume. Jun yajchanunike la spas jkot vanka sventa xuʼuk te xchotiik kʼalal chichʼik chanubtasel ta Vivliae.

 Li Daiane xchiʼuk smalale xmuyubajik tajek ti xuʼ xcholik mantal li ta jteklum liʼe akʼo mi nom to bu chʼikil. Xi chale: «Li Jeovae jaʼ chkoltavan sventa xaʼiik lekil aʼyejetik skotol li krixchanoetik akʼo mi nom to bu nakalik».