Li ermano Bryn ti te nakal ta Carolina del Norte (Estados Unidos), jaʼ jun li ta Komiteetik ti Tsbeiltasvan batel ta Ospitaletik li ta lum taje. Li komiteetike jaʼ tskoltaik li stestigotak Jeova ti te tikʼajtik ta ospitale.

 Ta skoj li coronaviruse, epal ospitaletike mu xakʼ ti akʼo svulaʼanik li buchʼutik te tikʼajtik ta ospitale. Jaʼ yuʼun, li Bryn la skʼopon batel ta telefono jun direktor ta ospital ti jaʼ sbainoj tskʼopon pastoretik ta yan relijion yoʼ ba svulaʼanik li jchameletike. Yuʼun li Bryne tskʼan tsnaʼ kʼuxi xuʼ skolta li stestigotak Jeova ti te tikʼilik ta ospitale.

 ¿Buchʼu la stakʼ li yamadae? Jaʼ li yajkoltaobba direktore. Jaʼ yuʼun, li Bryn la skʼanbe snumerotak ermanoetik ti te tikʼajtik ta ospitale. Akʼo mi mu stakʼ svulaʼan li ermanoetike, pe xuʼ skʼoponan echʼel ta telefono. Lek laj yaʼi li yajkoltaobba direktore.

 Li Bryn xtoke laj yalbe skʼoplal li j-abteletik ta ospitale. Laj yal ti tstojbe ta vokol li yabtelike xchiʼuk tsmala ti lek la oyike. Jech xtok, laj yalbe ti oy bu xchanoj ti skotol li krixchanoetik ta spʼejel balumile tsvul yoʼontonik ti sujomik xchiʼuk ti mu xa snaʼ kʼusi tspasik ta skoj li chamele (estrés), mas to li buchʼutik te ch-abtejik ta ospitale.

 Li yajkoltaobba direktore laj yal ti jaʼ jeche xchiʼuk li ta ospitale solel sujomik tajek xchiʼuk mu xa snaʼ kʼusi tspasik ta skoj li coronaviruse.

 Vaʼun, li Bryne xi laj yalbee: «Sventa stsal kuʼuntik ti sujomutik xchiʼuk ti mu xa jnaʼ kʼusi ta jpastike, xuʼ te jtatik koltael li ta jpajinakutik ta Internete. Mi la-och li ta jw.org xchiʼuk mi la atsʼiba sujomutik xi li ta saʼobile, te chata vunetik ti xuʼ xkoltaatik li buchʼutik te ch-abtejik ta ospitale».

 Kʼalal yakalik ta loʼile, li yajkoltaobba direktore och li ta jpajinatik ta Internete. La stsʼiba li jpʼel kʼop sujomutik li ta saʼobile, te laj yil vunetik ti jaʼ chalbe skʼoplale. Xi laj yale: «Labal tajek sba, chkakʼbe yil li direktore, liʼe chkoltaatik li j-abteletik ta ospitale xchiʼuk li yan krixchanoetike. Ta jlokʼes jaylikuk kopia, vaʼun ta jpuk».

 Kʼalal echʼ jayibuk xemanae, li Bryne la skʼopon li direktore. Li direktore laj yal ti och li ta jpajinatik ta Internete xchiʼuk la slokʼes jaylikuk kopia ti jaʼ chalbe skʼoplal ti bu sujomutik xchiʼuk ti mu xa jnaʼ kʼusi ta jpastike xchiʼuk yan vunetik ti jaʼ te chalbe skʼoplal eke. Laj yal ti laj yakʼbe li enfermeraetike, enfermeroetik xchiʼuk li yan j-abteletik te ta ospitale.

 Xi chal li Bryne: «Li direktore la stoj tajek ta vokol li kabtelkutike xchiʼuk li vunetik ti lek meltsanbile, laj yal ti la stabe tajek sbalile».