Li ta Chilee, li ermano Osman, li yajnil xchiʼuk li stsebike yakal chcholik mantal ta karrito te ta spat mukinal. Jaʼ toe, kʼotik epal krixchanoetik xchiʼuk yakal tstijik batel vob, yuʼun te xkuchoj echʼel yanimaik. Junantik li buchʼutik te oy ta muklomajele yalojik mi jaʼ spastorik li Osmane, jaʼ yuʼun bat smeyik xchiʼuk xi laj yalbeike: «Kolaval ti latale, pastor. Jmalaojotkutik xa onoʼox».

Li Osmane laj yal ti maʼuk li spastorike, pe muʼyuk xaʼiik ta skoj ti xvochlajetik tajeke. K’alal ochik xa ox batel ta mukinale, xi sut yalbeik junantike:«Pastor, yakal me jmalaotkutik».

Vaʼun, k’alal chʼan xiik likele, jaʼo laj yal Osman buchʼu jaʼ xchiʼuk ti k’u yuʼun te la staike. Kap sjol li krixchanoetik ta skoj ti muʼyuk xkʼot li spastorike. Laje, xi laj yalbeik li Osmane: «¿Mi xa-abolaj xavalbunkutik jpʼel chaʼpʼeluk kʼusi chal li Vivliae?». «Lek», xi li Osmane.

K’alal skʼan to’ox xkʼotik ti bu chichʼ mukel li yanimaike, li Osmane lik sjakʼbe skʼoplal li buchʼu chameme xchiʼuk lik snop kʼusitik teksto xuʼ xalbe skʼoplal. K’alal kʼote, laj yal kʼusi sbi xchiʼuk ti chchol lekil aʼyejetik ta skoj ti jaʼ stestigo Jeovae.

La skʼel Apokalipsis 21:3, 4 xchiʼuk Juan 5:28, 29. Vaʼun, lik yalbe smelolal ti mu jechuk tskʼan Dios ti chijchamutike. Laj yal xtok ti poʼot xa xchaʼkuxes animaetik li Diose xchiʼuk ti chak’ kuxikutik sbatel osil ta balumile. K’alal laj yoʼontone, ep buchʼutik bat smeyik li Osmane xchi’uk xi laj yalbeike:«Kolaval ti laj avalbunkutik li lekil aʼyejetik yuʼun Jeovae». Laje, sut xchol mantal li ta karritoe.

Junantike batik ta karrito k’alal laj yoʼontonik ta muklomale xchiʼuk oy kʼusitik lik sjakʼbeik Osman xchiʼuk yuts’ yalal ta sventa li Vivliae. Jal loʼilajik xchiʼuk jutuk xa mu xokol laj yiktaik li karrito k’alal batike.