Li Yanmeie jaʼ jun stestigo Jeova ta Asia ti la skolta ta xtuchʼel jun kaye jun ants ti maʼsat ti Kailan sbie. a Xi laj yal li Kailane: «Kolaval tajek, akʼo yakʼbot bendision li Diose». Vaʼun, li Yanmeie la sjakʼbe Kailan mi oy van bu xuʼ sta sbaik sventa xalbeik skʼoplal li Vivliae. Ta mas tsʼakale, li Kailane laj yalbe Yanmei ti yakal tskʼanbe Dios jujun kʼakʼal ti xbeiltasat batel li ta melel relijione. Pe ¿kʼu yuʼun ti jech ta skʼanilane?

Li Kailane laj yal ti ta 2008 ikʼat batel ta stemplo jun yamiga ti maʼsat eke, li ants taje ta skolta li krixchanoetik ti oy svokolike. Kʼalal laj yaʼi li mantale, li Kailane la sjakʼbe pale ti kʼusi livroal la skʼele, albat ti te la slokʼes talel li ta Vivlia ti jaʼ li Skʼop Diose. Vaʼun, oy tajek ta yoʼonton ta skʼel yaʼi. Jaʼ yuʼun, la saʼ jun Vivlia ta braile chino, vaʼun ta vakib noʼox u la skʼel li 32 volumene. Kʼalal laj skʼele te laj yakʼ venta ti kʼusi chchanubtasvan ta stemplo ta sventa li trinidade mu meleluk, yuʼun oy sbi li Diose, jaʼ Jeova.

Jech xtok, laj yakʼ venta ti muʼyuk lek xkuxlejalik li buchʼutik te chkʼotik ta stemploe, yuʼun laj yakʼ venta ti muʼyuk ta xakʼ ta xkuxlejalik li kʼusi yakal tskʼel ta Vivliae. Jun skʼelobile, kʼalal ta xichʼik akʼbel yuni veʼelike, naka xa sovrail ch-akʼbat li buchʼutik maʼsatetike. Li Kailane muʼyuk lek ta xil li kʼusitik ta spasik taje, jaʼ yuʼun la saʼ yan templo ti nopol xkom ti bu nakale. Vaʼun, la skʼanbe Dios ti akʼo xkoltaat ta stael li melel yajtsʼaklomtak Kristoe.

Li kʼusi la spas Yanmei ta stojolale jaʼ tijbat-o yoʼonton, jaʼ yuʼun la xchʼam jun estudio. Ta mas tsʼakale, li Kailane ay ta sba velta li ta stsobajel li stestigotak Jeovae. Xi chal kaʼitike: «Muʼyuk ta jchʼay ta jol li baʼyel tsobajel li-aye, toj echʼ noʼox lek la xchiʼinikun ta loʼil li ermanoetike, toj lek laj kaʼi jba. Akʼo mi maʼsatun, pe laj kaʼi ti skʼanojikune xchiʼuk ti muʼyuk kʼusi chopol tsnopik ta jtojolale».

Li Kailane lik chʼiuk batel ta mantal xchiʼuk lik batuk ta skotol li tsobajeletike. Tskʼupin tajek skʼejintael li kʼejojetike, pe chʼabal li kʼejojetik li ta braile ti xtojob skʼelele. Koliyal ti koltaat yuʼun li tsobobbaile, li Kailane la spas stuk li svunal ti bu chkʼejine. Sventa stsʼiba li 151 kʼejojetike, laj yichʼ 22 ora sventa stsʼiba. Li ta avril ta 2018, li Kailane lik xchol mantal, ti kʼuxi la slikes talele te van 30 ora jujun u chcholmantal.

Sventa xichʼ koltael li Kailan yoʼ xchapan sba li ta ichʼvoʼe, li Yanmeie la spasbe gravar li sjakʼobiltake xchiʼuk li kʼusi ta xal li ta versikuloetik ti te talem li ta livro Organizados para hacer la voluntad de Jehová. Vaʼun, li ta julio ta 2018 laj yichʼ voʼ li Kailane. Xi chale: «Li kʼanelal laj yakʼbeikun ta ilel li ermanoetik li ta asamblea taje, solel kʼot ta koʼonton. Ta skoj ti ximuyubaj tajeke solel tʼom li kokʼele, yuʼun te xa oyun li ta melel relijione» (Juan 13:34, 35). Li Kailane jpʼel ta yoʼonton ti jaʼ jech chakʼbe ta ilel kʼanelal li yantik eke, jaʼ yuʼun li avie chtun xa ta tsʼakal ora.