Oy toʼox kʼusitik lek yuʼunik li Madián xchiʼuk Marcela ti te nakalik ta Medellín (Colombia). Li Madiane lek toʼox tajek chichʼ tojel, jaʼ yuʼun te toʼox nakalik ta jpʼej na ti lek kʼupil sbae. Pe oy kʼusi kʼot ta pasel ti jaʼ jelbat-o li xkuxlejalike. Ta skoj ti jaʼik stestigotak Jeovae ayik li ta asamblea espesial li ta 2006 ti xi sbie: «Lekuk noʼox me li jsatike». Xi laj yalike: «Li mantaletik jelave laj yal ti toj tsots skʼoplal ti lekuk noʼox sba jkuxlejaltik sventa jaʼuk mas xijtun ta stojolal Diose. Kʼalaluk laj li asambleae, laj kakʼkutik venta ti jaʼ mas ta jtsobkutik li kʼusitik x˗ayan kuʼunkutike. Muʼyuk spajeb chimanolajkutik xchiʼuk ep tajek kilkutik».

 Li asambleae tijbat yoʼontonik li Madián xchiʼuk Marcela sventa sjutukajesik li kʼusitik oy yuʼunike. Xi chalike: «La jtsʼin jtakʼinkutik. Libatkutik ta naklej ta jpʼej bikʼit na. La jchon jkarrokutik xchiʼuk la jmankutik jkot moto». Pe maʼuk noʼox, yuʼun muʼyuk xa xbatik xtok li ta mukʼtik tiendaetik sventa mu epuk kʼusitik smanike. Jech xtok, la snopik ti jaʼ mas jal chcholik mantal xchiʼuk laj yamigoinik junantik prekursor espesialetik a ti ta sjunul yoʼontonik chtunik ta stojolal Jeovae.

 Mu ta sjaliluke, li Madián xchiʼuk Marcelae la snopik ti chtunik mas ta stojolal Jeovae xchiʼuk batik ta jun bikʼit tsobobbail ti bu chtun tajek koltaele. Pe sventa spasik jeche, li Madiane laj yikta li yabtele. Li smeʼ ajvale laj yal ti lik xchuvaj li Madiane. Jaʼ yuʼun, li Madiane laj yal ti kʼu yuʼun jech la snope. Xi la sjakʼbe li smeʼ ajvale: «Li voʼote ep chapas kanal takʼin, pe ¿mi xamuyubaj yuʼun?». Li smeʼ ajvale laj yal ti muʼyuk xmuyubaje, yuʼun ep svokoltak ti muʼyuk chapajem-o yuʼune. Jaʼ yuʼun, li Madiane xi laj yalbee: «Maʼuk xijmuyubaj-o yuʼun mi ep ta jpastik kanal takʼine, jaʼ xijmuyubaj yuʼun li kʼusitik ta jpastike. Li kʼusi chakʼ xkuxetel koʼontonkutik li kajnil xchiʼuk voʼone jaʼ ti ta jchanubtaskutik krixchanoetik ta sventa Diose, jaʼ yuʼun ta jkʼankutik ti oyuk mas yorail kuʼunkutik sventa jpaskutik taje».

 Xmuyubajik tajek li Madián xchiʼuk Marcelae, yuʼun jaʼ mas tsots chil ta xkuxlejalik ti xtunik ta stojolal Diose. 13 jabil xa chtunik ta tsobobbailetik te ta snoroesteal Colombia ti bu chtun tajek koltaele xchiʼuk avie jaʼik xa prekursor espesialetik.