Li Virginia, ti jaʼ testigo Jeovae tsakbil ta jtos chamel ti síndrome del enclaustramiento o cautiverio sbie. Mu xbakʼ sjunul sbekʼ tal, mi jaʼuk stakʼ xkʼopoj xchiʼuk xveʼ jaʼ noʼox xuʼ x-ilvan, xaʼi kʼoponel, sjam xchiʼuk smutsʼ sat xchiʼuk sbakʼes jutuk sjol. Pe li Virginiae, lek toʼox xchiʼuk ep toʼox kʼusitik tspas. Pe li ta 1997, oy kʼusi la snuptan, ta sob noʼox lik avanuk tajek li spat sjole mu x-echʼ yuʼun. Vaʼun ikʼat batel ta ospital yuʼun li smalale li vaʼ akʼobale chamem xa kom yilel. Kʼalal echʼ xa ox chib xemana ti bu chabibil tajeke julav, pe mu xa xbakʼ xchiʼuk tsakal ta jun makina sventa xichʼ ikʼ. Oy jayibuk kʼakʼal ti chʼay-o snopbene mi jaʼuk sna buchʼu jaʼ.

 Xi chal Virginia li kʼusi kʼot ta pasel ta tsʼakale: «Ta kʼunkʼun vul ta jol li kʼusitike. La jkʼopon li Jeovae yuʼun mu jkʼan xicham xchiʼuk ti stuk xkom li kuni kerem ti baluneb sjabilale. Sventa oyuk kipal xchiʼuk ti mu xkat tajek koʼontone laj kakʼ tajek persa ti bu kʼalal xuʼ kuʼun sventa jvules ta jol versikuloetik ta Vivliae.

 »Ta tsʼakale, lilokʼ ti bu chabibilun toʼox tajeke. Kʼalal echʼ xa ox vakib u xital xibat ta ospitaletik xchiʼuk ti bu la skʼelikun sventa xbakʼ yan velta li jbekʼtale, la stakikun sutel ta jna, pe mu xbakʼ-o li jbekʼtale xchiʼuk ta jkʼan ti skoltaikun-oe. Solel laj vul tajek koʼonton yuʼun laj kaʼi ti mu xa kʼusi stakʼ jpas ta stojolal Jeova xchiʼuk mu xa xuʼ jkolta li yantike, jech xtok la jvul tajek koʼonton ti mu xa xkʼel kuʼun li kuni kereme.

 »Lik jkʼelbe sloʼil xkuxlejal yan stestigotak Jeova ti jechtik tsnuptan svokolik kʼuchaʼal voʼone xchiʼuk labal sba laj kil li kʼusitik spas yuʼunik ta stojolal Jeovae. Jech oxal, jaʼ laj kakʼ ta koʼonton li kʼusi spas kuʼun sventa ximuyubajuk noʼoxe. Olon tal toʼoxe muʼyuk to’ox lek yorail kuʼun sventa jchan Jvivlia, jcholmantal xchiʼuk jpas orasion. Avie, oy xa lek yorail kuʼun skotol kʼakʼal, jech oxal jaʼ chkakʼ ta koʼonton spasbel yabtel Jeova skotol ora maʼuk xa chbat ta koʼonton li vul oʼontone.

 »La jchan stunesel jun komputadora, jech xtok la jtunes un programa ti jaʼ la skoltaun sventa xitsʼibaj ti jaʼ noʼox ta jbakʼes li jole. Akʼo mi chilub yuʼun, koliyal li tecnologiae jaʼ skoltaojun sventa xuʼ jchan Jvivlia, jtsʼiba karta o korreo sventa xkalbeik yantik ta sventa li spatobil koʼontontike. Sventa xchiʼin kuʼun ta loʼil li buchʼu chkʼot skʼelikune jaʼ ta stunesik li abecedario ti te oy kuʼune. Kʼalal tsbisik li jujun letrae mi jaʼ li bu ta jkʼane ta jmutsʼ li jsate yan mi maʼuke ta jvikʼ lek li jsate jech ta jpasulankutik jaʼ to me la snaʼik kʼusi ta jkʼan chkale. Li ermanaetik ti nopajtik noʼox chkʼot skʼelikune laj xa xchanik lek stunesel li tavlae xchiʼuk tsnaʼik xa noʼox li kʼusi ta jkʼan chkale, pe kʼalal mu jechuk chalik li kʼusi chkale chitseʼinkutik yuʼun.

 »Lek chkaʼi chikoltavan kʼalal oy kʼusi tspas li tsobobbaile. Akʼo mi ta videoconferencia noʼox chi-ochilaj li ta tsobajeletike, kʼalal ta jkʼan chkakʼ jloʼile baʼyel ta jtsʼiba li kʼusi ta jkʼan chkale, vaʼun yan xa buchʼu tskʼel batel kʼalal yorail chakʼ sloʼilike. Jech xtok, jujun u ta jtsob jba xchiʼuk jun uni bikʼit grupo sventa jmoj jkʼelkutik li JW Broadcasting. a

 »23 xa jabil stsakojun li síndrome del enclaustramientoe. Bateltike ta jvul koʼonton, pe kʼalal ta jpas orasion, ti ta jtsob jba xchiʼuk li ermanoetike, ti oy kʼusi ta jpas ta sventa li Jeovae jaʼ tskoltaun sventa mu jechuk xkaʼi jba. Ti skoltaojikun tal li ermanoetik ta tsobobbaile tunemun xa talel mas ta vakib jabil ta prekursora auksiliar. Kakʼoj persa ti oyuk kʼusi lek xchan ta jtojolal li jkerem Alessandroe, ti nupunem xae xchiʼuk ti mol xa ta tsobobbaile. Jech xtok, chtunik ta prekursor regular xchiʼuk li yajnile.

 »Ta jnopilanbe tajek skʼoplal li kʼusitik xuʼ jpas li ta paraisoe. Li kʼusi baʼyel ta jpas kaʼie jaʼ ti jtunes li yechʼomal ke sventa xkalbe skʼoplal li Jeovae. Ta jkʼan chixanav ta osiltik ti bu chjelav jun beoʼ xchiʼuk ti jkʼupin skʼelel li osiltike. Oy xa ta 20 jabil ti mu stakʼ jxax li jveʼele jaʼ yuʼun ta tuvo tstikʼbikun ochel, jech oxal li ta paraisoe ta jkʼan ta jtul jpʼejuk mantsana ta steʼel xchiʼuk ti jechʼ ta loʼele. Ta skoj ti likemun ta Italiae ta jkʼan ta jmeltsan li veʼliletik ti nopem xkaʼikutik slajesel liʼe, ¡jech kʼuchaʼal li pizzae!

 »Li ‹spatobil oʼontonal sventa kolebale› jaʼ xchabiojbun li jnopbene (1 Tesalonisenses 5:8). Avie, mu kʼusi stakʼ mas jpas ta skoj ti ipune, pe jpatoj koʼonton ti jutuk xa skʼan xilekube. Jaʼ yuʼun, ximuyubaj kʼalal ta jnopbe skʼoplal ti te xa oyun ta achʼ balumile. Oy xa tajek ta koʼonton ti ‹jkʼupin li batsʼi mero kuxlejale› ti yaloj onoʼox Jeova ti chakʼbutik ta stojolal li Ajvalil yuʼune» (1 Timoteo 6:19; Mateo 6:9, 10).