Ta sjabilal 2005, jun ants ta India ti jaʼ sbi Sowbhagya cham smalal. Li vinik taje lek la xchabi li yajnile xchiʼuk jun stseb ti oxib sjabilal ti Meghana sbie. Li avi une, vokol chaʼi stabel stojol li kʼusi chtun yuʼun jujun kʼakʼale.

 Mas to tsatsaj svokol li Sowbhagyae yuʼun laj yichʼ pʼajel yuʼun yutsʼ yalal. Albat skʼoplalik ti jaʼik noʼox jkʼan limoxnaetik xchiʼuk ti jaʼ noʼox tskʼanik makʼlinele. Tskʼan patbel yoʼonton li Sowbhagyae, jaʼ yuʼun bat ta jun chʼulna ti te oy ti bu noʼox nakale, pe li krixchanoetik te xtoke pʼajvanik ta skoj ti abol sbae. Jech xtok, lik saʼ yabtel sventa smakʼlin sba, pe muʼyuk bu la sta.

 Xi chale: «Ta skoj ti mu xa jnaʼ kʼusi ta jpase, la jnop ta jmil jba. Pe jnaʼoj xtok ti ta xil svokol mi stuk ikom li kuni tsebe, jaʼ yuʼun la jnop ti jaʼ lek ti xicham jchaʼvoʼalkutike». Ta skoj ti muʼyuk spatobil yoʼonton li Sowbhagyae, lokʼ saʼ veneno.

 Kʼalal tsut batel ta snae la stsak jun tren, vaʼun te lik chiʼinatuk ta loʼil yuʼun jun stestigo Jeova ti Elizabeth sbie. Li Sowbhagyae laj yal ti chʼabal yabtele. Li Elizabethe laj yal ti ta skoltae xchiʼuk laj yalbe ti chbat yakʼ jun chanubtasel ta Vivliae. Li Sowbhagyae toj labal tajek laj yaʼi, yuʼun manchuk mi oy xa kʼotem ta jayibuk relijionetik muʼyuk˗o xaʼibe skʼoplal ti oy chanubtasel ta Vivliae. Li Elizabethe laj yalbe ti mi tskʼan to chchan ta sventa li Vivliae, akʼo bat kʼelatuk ta sna.

 Kʼalal kʼot ta snae li Sowbhagyae jech˗o ta snop ti ta smil sbae, pe jaʼo chʼabal te li stsebe, yuʼun ikʼbil lokʼel yuʼun jun yutsʼ yalal. Jaʼ yuʼun, la snop ti tsmala sut talel stseb sventa spas li kʼusi snopoje.

 Yoʼ to tsmala tsut tal li stsebe, bat svulaʼan li Elizabeth ti lek tajek chʼamee. Akʼbat yil li livro ¿Kʼusi chchanubtasvan ta melel li Vivliae? Li Sowbhagyae lek tajek laj yil li kapitulo ti bu chalbe skʼoplal «¿Bu oy li animatike?», yuʼun mu to ta sjaliluk ti cham li smalale. Jech xtok, li vaʼ kʼakʼale la xchʼam jun chanubtasel ta Vivlia.

 Li Elizabethe jun xa ox xemana skʼan yuʼun sventa x˗echʼ li s˗asambleae, jaʼ yuʼun la stak ta ikʼel li Sowbhagyae. Li kʼusi laj yaʼi tee kʼot tajek ta yoʼonton, jaʼ yuʼun la snop ti tskʼan chkʼot ta stestigo Jeova eke. Pe maʼuk noʼox taje, yuʼun kʼalal sut ta snae la sta yabtel.

 Li Sowbhagyae jech-o la xchʼam chanubtasel ta Vivlia xchiʼuk muʼyuk xa tskʼan ta smil sba yuʼun oy xa sbalil chaʼi li xkuxlejale. Ta tsʼakale, li Sowbhagyae laj yichʼ voʼ xchiʼuk ta mas jelavele laj yichʼ voʼ li stseb eke, li Meghanae. Xchaʼvoʼalik jaʼik prekursora regularetik, li Meghanae ta sna to tskolta talel li ofisina sventa jelubtasej kʼop ta Indiae.

 Tstojbeik tajek ta vokol Elizabeth ti la xchiʼin ta loʼil Sowbhagya kʼalal jaʼo te oy ta trene, yuʼun kʼuxubaj ta yoʼonton xchiʼuk la xcholbe mantal. Pe li buchʼu mas ta stojbeik ta vokole jaʼ li Jeovae. Xi chal li Meghanae: «Ti muʼyukuk laj kojtikinkutik mantale voʼne xa jchamelkutik jechuke. Pe avie, ximuyubajkutik tajek. Oy xa tajek ta koʼontonkutik ta jmeykutik li jtote, ti xojtikin li Jeovae xchiʼuk ti xkalbekutik kʼu yelan la spojunkutik li Jeovae».