Pakʼbat ta skʼuʼik jun triángulo ti moradoe
Jun stestigo Jeova ti Maud sbie ch˗abtej ta jun eskuela, chkoltavan ta skʼelel uni kʼoxetik ti oy svokolike. Achʼtik toe, li maestroe yakal chalbe skʼoplal ti ep buchʼutik laj yichʼik milel li ta skʼakʼalil jnazietike xchiʼuk ti ep buchʼutik laj yichʼik ikʼel batel ta spasel tsatsal abtelale. Laj yal ti jchukeletike oy kʼusi pakʼbat ta skʼuʼik, li skoloral xchiʼuk ti kʼu yelan setbile chakʼ ta ilel ti kʼuchaʼal te tikʼatik ta chukule.
Kʼalal jaʼ chalbeik skʼoplal li spakʼ kʼuʼil ti triángulo xchiʼuk ti morado sbone, xi laj yal li maestroe: «Liʼe jaʼ van ta spakʼbeik ta skʼuʼik li buchʼutik lek chil xchiʼilik ta vinikal o ta antsile». Kʼalal laj li chanune, li Maude bat xchiʼin ta loʼil li maestroe. Laj yalbe skʼoplal ti spakʼ kʼuʼil ti morado sbone jaʼ noʼox ta xichʼ pakʼbel ta skʼuʼik li stestigotak Jeovae. a Xchiʼuk laj yalbe ti xuʼ xichʼbe batel yan vunetik ti jaʼ chalbe skʼoplal taje, lek laj yaʼi li maestroe xchiʼuk laj yal ti akʼo xchapbe smelolal kʼalal jaʼo yorail chanune.
Oy yan maestra, jaʼ yakal chalbe skʼoplal li spakʼ skʼuʼik li jchukeletike. Laj yakʼ ta ilel ti triángulo xchiʼuk ti morado sbone jaʼ pakʼbat ta skʼuʼik li stestigotak Jeovae. Yan velta, li Maude laj yal ti xuʼ xichʼbe batel yan vunetik li maestrae. Lek laj yaʼi li maestrae xchiʼuk laj yalbe ti akʼo xchapbe smelolal li jchanunetike.
Li Maude chakʼ ta ilel li kʼusitik la stunese.
Ta sventa li baʼyel maestroe, li Maude la xchapan sba sventa xchapbe smelolal ta 15 minuto, pe kʼalal kʼot yoraile, albat ti xuʼ xloʼilaj jun orae. Sventa slikes sloʼil li Maude, la stunes jun video ti chakʼ ta ilel kʼu yelan laj yichʼik kontrainel stestigotak Jeova yuʼun li jnazietike. Li ta videoe vinaj kʼuxi laj yichʼik chʼakel ta stojolal stot smeʼik li vaxakib sien kʼoxetik ti jaʼik stestigotak Jeovae. Kʼalal vinaj taje, li Maude la spajes li videoe. Laj une, laj yalbe skʼoplal oxvoʼ kʼoxetik ti jech laj yil svokolike. Kʼalal laj li videoe, li Maude la skʼel jlik karta ti la stsʼiba ta 1940 li Gerhard Steinacher, jun stestigo Jeova ta Austria ti 19 toʼox sjabilale. Li karta taje la stsʼiba sventa skʼopon komel stot smeʼ kʼalal poʼot xa ox ta xichʼ milel yuʼun li jnazietike. b
Li ta xchaʼkojal xae, jaʼ jech la xchapbe smelolal xtok. Koliyal ti muʼyuk xiʼ li Maude, li chaʼvoʼ maestroetike laj yaʼibeik smelolal. Jaʼ yuʼun, kʼalal ta xalbeik skʼoplal ti ep buchʼutik laj yichʼik ikʼel batel ta spasel tsatsal abtelal li ta skʼakʼalil jnazietike, li maestroetike jaʼ xa chalbeik skʼoplal li stestigotak Jeovae.
a Li stestigotak Jeova ta Alemania ti ojtikinbilik xtok kʼuchaʼal Bibelforscher (Jchanolajetik ta Vivlia) muʼyuk la stikʼ sbaik ta spasel li kʼusitik tspas jnazietike. Jech oxal, li ta Xchibal Mukʼta Paskʼop ta spʼejel Balumile laj yichʼik takel batel ta spasel tsatsal abtelaletik.
b Li Gerhard Steinacher laj yichʼ milel ta skoj ti mu skʼan x˗och ta soltaroal li ta Alemaniae. Xi la stsʼiba komel li ta skartae: «Toj keremun to. Jaʼ noʼox chkuch kuʼun mi la skoltaun li Kajvaltike xchiʼuk jaʼ li kʼusi jkʼanojbee». Laj yichʼ milel li ta sob yokʼomale, xi tsʼibabil li ta smukinale: «Cham ta skoj slekil kʼoptael Dios».
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼusi la snuptan li stestigotak Jeova li ta Xchibal Mukʼta Paskʼop ta spʼejel Balumile?
Xuʼ van labal to chavil li stakʼobile.
KʼUSITIK TSJAKʼIK TA SVENTA VIVLIA
¿Kʼu yuʼun ep lajik ta milel li judaetike? ¿Kʼu yuʼun muʼyuk la smak ta be li Diose?
Ep buchʼutik tsjakʼbe sbaik ti kʼu yuʼun yakʼoj to permiso Dios ti oy to li vokoliletike. Te chatabe stakʼobil ta Vivlia.