Li ta 23 yuʼun marsoe xuʼ van xkʼotik 12 miyon li buchʼutik ta jtaktik ta ikʼel li ta Snaʼobil slajel Kristoe. Li buchʼu tsjelubtas mantale, chalbe smelolal ti kʼalal laj yakʼ li jun kʼupil sba matanal li Jeovae jaʼ sventa xichʼ pojel li krixchanoetike xchiʼuk ti jkotoltik xuʼ jtabetik sbalile (Isa 11:6-9; 35:5, 6; 65:21-23; Jn 3:16). Pe maʼuk noʼox me li buchʼu tsjelubtas mantal oy ta sba ti lekuk xaʼi sbaik li buchʼutik chkʼotik li vaʼ kʼakʼal ti toj tsots skʼoplal taje. Yuʼun xuʼ me jech jpastik ek (Ro 15:7). Jkʼeltik junantik kʼuxi ta pasel.

• Maʼuk noʼox me xbat jsaʼtik ta anil jchotlebtik xchiʼuk ti te tsʼijil jmalaojtik chlik li mantale, yuʼun xuʼ jchʼamtik li buchʼutik la jtaktik ta ikʼele xchiʼuk li buchʼutik yiktaoj sbaik ta mantale. Stseʼetuk noʼox me asat xa chiʼinan ta loʼil.

• Akʼo me ta avoʼonton li buchʼutik la atak ta ikʼele, pe teuk me asat xtok ta stojolal li buchʼutik kʼotik ta skoj ti laj yichʼik akʼbel li uni vun sventa Snaʼobil slajel Kristo kʼalal jaʼo laj yichʼ pasel li kampanyae. Xuʼ xavalbe ti jmoj xachotiike, ti koʼoluk xa kʼelik li Vivliae xchiʼuk ti jmojuk xakʼejinike.

• Kʼalal mi laj li mantale, jakʼbo mi oy kʼusi muʼyuk xaʼibe smelolal. Mi skʼan xlokʼ noʼox ta anil li atsobobbail sventa x-och li yane, chapik kʼusi ora xuʼ xa loʼilajik yan velta. Xuʼ xi xavalbee: «¿Kʼu yelan avaʼi li mantal echʼe? ¿Mi oy kʼuxi xuʼ jkʼoponot yan velta?».