JCHOLVANEJETIK. Li jcholvanejetike jaʼ sventa tskoltautik, jaʼ yuʼun jchʼuntik kʼalal chalbutik ti bu skʼan jkotan jkarotike. Jchʼuntik li kʼusi chalik kʼalal chijxanav ta yut salone, sventa li smakel chotlebaletike xchiʼuk ta yan kʼusitik.

ICHʼVOʼ. Li chotlebaletik ta yeloval plataformae chichʼ makel sventa li buchʼutik chichʼik voʼe, mi oy kʼusi jele, te chichʼ alel. Skʼan xa noʼox te xchotiik li buchʼutik chichʼik voʼ kʼalal mu to chlik li mantal ta sob savadoe. Jech xtok, skʼan xichʼ batel stoayaik xchiʼuk skʼuʼik ti lek noʼox sba ta kʼelele.

MATANAL TAKʼIN. Ep takʼin chlaj sventa oyuk ep lekil chotlebaletik, oyuk lek sonido, video xchiʼuk yan kʼusitik ti chtun yoʼ jkʼupintik li asambleae xchiʼuk ti xijnopaj-o mas ta stojolal Jeovae. Kʼalal chakolta abaik ta takʼine, chtoj li kʼusitik taje xchiʼuk jech chijkoltavan ta sventa li abtelal ta spʼejel balumile. Jech oxal, oy kajaetik ta sjunul salon sventa asamblea yoʼ xkakʼtik li matanal takʼine. Jech xtok, xuʼ xavakʼik matanal takʼin ta Internet ta donate.pr418.com. Ta jtojkutik tajek ta vokol ti chavakʼik matanal takʼine. Li Jtsop Jbeiltasvaneje tskʼan tstojboxuk ta vokol ek, yuʼun li atakʼinike jaʼ chkoltavan ta spasel li kʼusitik sventa Ajvalilal yuʼun Diose.

DEPARTAMENTO SVENTA BUCHʼUTIK CH-IPAJIK TA ANIL. Li departamento liʼe ja’ no’ox me sventa mi oy k’usi k’ot ta pasel ta anile.

LI KʼUSITIK CHʼAYEME. Mi oy kʼusi la ata ti chʼayeme, xuʼ xbat avakʼ li ta Departamento de Objetos Perdidos. Pe mi jaʼ oy kʼusi chʼay avuʼune, xuʼ xbat akʼel li ta departamento taje. Jech xtok, xuʼ te xichʼ ikʼel batel li ololetik ti chʼayemike, pe maʼuk me skʼan xal ti jaʼ xa te chchabiik li ololetike. Jaʼ yuʼun, avokolikuk teuk me asatik li ta avalab anichʼnabik ta skotol orae.

SMAKEL CHOTLEBALETIK. Ta jkʼanbotkutik jun mukʼta vokol, tsako me ta venta li yantike. Vuleso ta ajol ti jaʼ noʼox xuʼ xamakbe xchotleb li buchʼutik jmoj akaroalike, li avutsʼ avalale o li buchʼu chavakʼbe chanubtasel ta Vivliae. Mu me xavikta kʼusitik ta chotlebal mi muʼyuk buchʼu chchoti tee.

LI BUCHʼUTIK TSKʼAN CHKOLTAVANIKE. Mi chakʼan chakoltavan ta jtosuk abtelal li ta asambleae, xuʼ xabat li ta Departamento de Información y Servicio Voluntario.