¿Kʼusi li matanal mas lek xuʼ xavakʼbe li avalab anichʼnabike? Ep kʼusitik ti chtun yuʼunike, taje te tsakal skʼoplal ti xakʼanike, ti xabeiltasike xchiʼuk ti xachabiike. Akʼo mi jech, li yojtikinel Jeova xchiʼuk li kʼusitik melel ta Skʼope, li Vivliae, jaʼ li matanal ti mu kʼusi xkoʼolaj-o ti xuʼ xavakʼbeike (Juan 17:3). Li yojtikinobil taje jaʼ chkoltaatik sventa skʼanik mas Jeova xchiʼuk ti ta sjunul yoʼonton chtunik ta stojolale, yuʼun ta sbikʼtalik noʼox xuʼ jech xlik spasik (Mateo 21:16).

 Ep totil meʼiletik yiloj stukik ti mas xaʼibeik smelolal ololetik kʼalal yichʼoj talel li kʼusitik xuʼ xchanik xchiʼuk li kʼusitik xuʼ xapasik ti komik noʼoxe. Jaʼ yuʼun ximuyubaj chkalbotkutik ti laj yichʼ lokʼesel li foyeto Kʼusitik chlik jchan ta Vivlia ti xi sbie. Li kʼusitik yichʼoj talel ti kʼunik ta aʼibel smelolale jaʼ chkoltaatik-o totil meʼiletik sventa xchanubtasik li yalab xnichʼnabike. Li lokʼoletik yichʼoj talele xchiʼuk li yaʼyejal te talemike, laj yichʼ nopel ta sventa li ololetik ti oxib sjabilalik o mu stae. Jech xtok, te talem li kʼusitik xuʼ xapasike. Li foyeto liʼe maʼuk me yixtol ololetik. Moʼoj, yuʼun laj yichʼ pasel sventa jmoj xachanik xchiʼuk avalab anichʼnabik, vaʼun tskoltaoxuk sventa mas xachiʼin abaik ta loʼil.

Li foyeto liʼe, jnaʼojkutik ti tskoltaoxuk sventa xachanubtas avalab anichʼnabik ta sbikʼtalik noʼox ta sventa li mantale (2 Timoteo 3:14, 15).

Avermanotakik,

Li Jtsop Jbeiltasvanej yuʼun li Stestigotak Jeovae