Xuʼ, ta smiyonal xa noʼox li antsetik ta spʼejel balumil ti jaʼik stestigotak Jeovae chcholik li lekil aʼyeje, xi xa onoʼox albil li ta Salmo 68:11: «Jaʼ chal mantal li Jeovae; li antsetik ti tspukik batel li lekil aʼyejetike jaʼik epal soltaroetik».

Li abtelal tspasik li antsetik ti jaʼik stestigotak Jeovae, mu xkoʼolaj xchiʼuk li yan antsetik ti jaʼik jnitvanej li ta yan relijione. ¿Kʼu yuʼun?

Li antsetik ta yan relijione jaʼ chchanubtasvanik xchiʼuk jaʼ chbeiltasvanik li ta stemploik o li ta xchʼulnaike, jaʼuk li antsetik ti jaʼik stestigotak Jeovae jaʼ noʼox chchanubtasik li krixchanoetik kʼalal chlokʼik ta cholmantal ta naetik o ta buyuk noʼox staike.

Yan ti kʼusi jelel-o li stsobobbail stestigotak Jeovae jaʼ ti jaʼ noʼox viniketik xuʼ xchanubtasvanike. Jaʼ yuʼun chaʼa, li antsetike muʼyuk chchanubtasvanik ti mi oy viniketik yichʼojik voʼ li ta tsobobbaile (1 Timoteo 3:2; Santiago 3:1).

Li Vivliae chal ti jaʼ noʼox xuʼ xichʼ vaʼanel li viniketik kʼu chaʼal moletik ta tsobobbaile. Jech kʼu chaʼal liʼe, li jtakbol Pabloe laj yalbe Tito ti akʼo svaʼan moletik ta jujun jteklume. Jech xtok, laj yichʼ albel ti jaʼikuk viniketik ti muʼyukuk tikʼbilik smulike xchiʼuk ti junuk noʼox yajnilike (Tito 1:​5, 6). Li Pabloe jaʼtik jech laj yalbe batel li Timoteo eke, xi laj yale: «Mi oy junuk vinik chakʼ persa sventa xkʼot ta jkʼelvaneje, jaʼ jun lekil abtelal li kʼusi oy ta yoʼonton tstae. Jaʼ yuʼun, skʼan lekuk skʼoplal li jkʼelvaneje, junuk noʼox yajnil, [...] tojobuk ta chanubtasvanej» (1 Timoteo 3:​1, 2).

¿Kʼu chaʼal jaʼ noʼox xuʼ xkʼotik ta moletik ta tsobobbail li viniketike? Xi tstakʼ li Pabloe: «Mu xkakʼ chanubtasvanuk li antse mi jaʼuk ti tspas ta mantal li vinike, chʼan xiuk noʼox me. Yuʼun jaʼ baʼyel laj yichʼ pasel li Adane, jaʼ tsʼakal to li Evae» (1 Timoteo 2:​12, 13). Liʼe chakʼ ta ilel ti oy ta yoʼonton Dios ti jaʼuk sbeiltasik batel tsobobbail li viniketike xchiʼuk ti jaʼuk xchanubtasvanike.

Skotol li stestigotak Jeovae jaʼ jnitvanej yuʼunik li Jesukristoe xchiʼuk chchanbeik stalelal. Xi laj yal Lukas li kʼusi la spas Jesuse: «Lik xanavuk ta jujun jteklum xchiʼuk ta jujun bikʼtal lumetik, chchol batel mantal xchiʼuk chalbe batel skʼoplal li lekil aʼyejetik sventa Ajvalilal yuʼun Diose». ¿Kʼusi la spasik li jchankʼopetik kʼalal takatik batel sventa xcholik li lekil aʼyeje? «La stam batel sbeik, batik ta jujun bikʼit lumetik, la xcholik batel li lekil aʼyejetike» (Lukas 8:1; 9:​2-6).

Skotol li stestigotak Jeova avie akʼo mi viniketik o antsetik ta sjunul yoʼonton chchʼunik li kʼusi xi xa onoʼox yaloj Jesus ta Mateo 24:14: «Li lekil aʼyejetik ta sventa li Ajvalilale ta xichʼ cholel ta spʼejel balumil sventa xaʼi skotol li jteklumetike, vaʼun ta xtal li slajebe».