KAPITULO 8

¿Kʼu yelan skʼan stalelal li lekil amigoile?

«Mi kapem jole, ta jkʼan buchʼu ta jchapbe. Mi ta jvul koʼontone, ta jkʼan ti oyuk buchʼu xalbun ti chchapaj li jvokole. Ti mi xijmuyubaje, ta jkʼan oy buchʼu chkalbe. Chkaʼi voʼone, toj tsots skʼoplal ti oyuk kamigotake»  (Brittany).

LI OLOLETIKE tskʼanik ti oyuk buchʼu xchiʼinik ta tajimole, li kerem tsebetike tskʼanik ti oyuk yamigotakike. Pe ¿kʼusi sjelbenal taje?

Li jun jchiʼiltik ta tajimole naka noʼox ta xchiʼinvan.

Jun amigoile tstsakvan ta venta xchiʼuk chkoltavan.

Li Vivliae chal ti jun «melel amigoile skotol ora chakʼ ta ilel ti chkʼanvane xchiʼuk jaʼ jchiʼiltik ta vokʼel chkʼot kʼalal oy jvokoltike» (Proverbios 17:17). Li amigoiletik taje, mas to lek xil sbaik ti mu xkoʼolaj li xchiʼiltak ta tajimol jun olole.

Ti melel xkaltike, ti yakal xa chachʼi batele, skʼan oyuk avamigotak...

1)... ti lekuk ta chanbel stalelalike.

2)... ti lekuk kʼusi tspasike.

3)... ti lekuk tskoltaot ta akuxlejale.

Jaʼ yuʼun, skʼan xanopbe skʼoplal mi jaʼ jech stalelal li avamigotake. Ta jkʼeltik batel ta jujutos kʼusi smakoj taje.

Baʼyel: Lekuk ta chanbel stalelalik

Li kʼusi skʼan xanaʼe. Skotol li buchʼutik avamigotak avaloje, mu skotoluk jaʼ ta melel. Xi chpʼijubtasvan li Vivliae: «Oy bochʼo lec coʼol coʼnton jchiʼuctic [o kamigo jbatik] ti ta jliquel noʼox xuʼ ta jcontrain [jbatike]» (Proverbios 18:24, Xchʼul Cʼop Jtotic Dios, ta skʼop Chenalhó). ¿Mi jech van ta melel taje? Nopbo avaʼi skʼoplal liʼe: ¿Mi oy van junuk avamigo ti lek xa tskʼoponot yilele, pe ti jaʼ noʼox ta skoj oy kʼusi tskʼanbote? O ¿mi oy van junuk avamigo ti oy kʼusi chopol laj yalbe yantik ta atojolale? ¿Mi mu jechuk ti xuʼ van mu xa lekuk xkil jbatik xchiʼuk ta skoj taje? * Jaʼ yuʼun, jaʼ mas tsots skʼoplal ti oyuk jlekil amigotaktike, akʼo mi uni jayvoʼ noʼox.

Kʼusi stakʼ xapas. Jaʼuk xamigoin li buchʼutik lek ta chanbel stalelale.

«Li kamiga Fionae lek chalbeik skʼoplal, ta jkʼan ti jaʼuk jech jkʼoplal eke. Lek ta chanbel stalelal chkil» (Yvette, 17 sjabilal).

Paso liʼe:

1. Kʼelo Galatas 5:22, 23.

2. Xi xanopbe skʼoplale: «¿Mi jaʼ jech stalelal kamigotak kʼuchaʼal chal chʼul espiritue?».

3. Tsʼibabo sbi li buchʼutik lek tajek xavil aba xchiʼuke. Te ta xokon li sbie tsʼibao li stalelal ti mas lek chavile.

Sbi

․․․․․

Stalelaltak

․․․․․

Tojobtasel: Mi jaʼ noʼox chtal ta ajol li xchopol talelaltake, xuʼ van jaʼ skʼan xal ti skʼan xajel li avamigotake.

Xchibal: Lekuk kʼusi tspasik

Li kʼusi skʼan xanaʼe. Kʼalal solel chakʼan tajek chata avamigotake, xuʼ van buchʼuuk xa noʼox xlik avamigoin, mu xa ventauk mi lek o muʼyuk. Jech xtok, mu me xchʼay ta ajol li pʼijubtasel ta Vivlia liʼe: «Li buchʼu jaʼ chchiʼin li buchʼutik bolike muʼyuk kʼusi lek chkʼot ta stojolal» (Proverbios 13:20). Kʼalal «bol» xi liʼe, maʼuk skʼan xal ti mu xtojobik ta chanun o ti mu masuk pʼijike, moʼoj, jaʼ chalbe skʼoplal li buchʼutik jaʼ noʼox tspasik kʼusitik chopole o ti tstoy sbaike. ¿Mi mu jechuk ti mu xakʼan avamigotak jech kʼuchaʼal taje?

Kʼusi stakʼ xapas. Tʼujo lek li avamigotake, mu buchʼuuk noʼox xachʼam (Salmo 26:4). Taje maʼuk skʼan xal ti jaʼ xa noʼox chavamigoin li buchʼutik koʼol ajabilalik xchiʼuke o ti koʼol kʼusi chakʼupinike, ti jaʼ chapʼaj li yantike. Moʼoj, jaʼ skʼan xal ti chakʼel o chavakʼ venta «ti mu koʼoluk li buchʼu tukʼe xchiʼuk li buchʼu toj chopole, li buchʼu chtun ta stojolal Diose xchiʼuk li buchʼu muʼyuk chtun ta stojolale» (Malakias 3:18).

«Ximuyubaj ti la skoltaikun jtot jmeʼ sventa jta jlekil amigotake, ti koʼol jabilalkutike xchiʼuk ti lekik ta mantale» (Christopher, 13 sjabilal).

Takʼo li sjakʼobiltak liʼe:

¿Mi chaxiʼ ti sujikot avamigotak ta spasel kʼusi chopole?

□ Tana

□ Muʼyuk

¿Mi mu van xakʼan xavakʼbe yojtikin atot ameʼ ta skoj ti xuʼ van mu lekuk xilike?

□ Tana

□ Muʼyuk

Tojobtasel: Mi «tana» xachie, jaʼ lek ti xasaʼ avamigotak ti lekuk stalelalike, jech kʼuchaʼal li ermanoetik ti yijik ta mantale.

Yoxtosal: Lekuk tskoltaot ta akuxlejal

Li kʼusi skʼan xanaʼe. Li Vivliae jamal chal ti «tsokes jlekil talelaltik li xchiʼinel chopol krixchanoetike» (1 Korintios 15:33). Xi chal li kʼusi la snuptan li Laurene: «Oy ta koʼonton ti lek xilikun li jchiʼiltak ta chanune. Pe sventa jechuk taj une, skʼan jpas li kʼusi chalike. Ta skoj ti jtuk chkaʼi jbae, lik jchanbe stalelalik sventa lekuk xilikun». Ti melel xkaltike, mi jaʼ la apas li kʼusi tskʼan li avamigotake, jech kʼuchaʼal la spas li Laurene, chakʼot xa ta smosoik. ¿Mi ta melel jaʼ jech chakʼan taje?

Kʼusi stakʼ xapas. Mu xa xachiʼin li buchʼu ta sujot ta spasel kʼusitike xchiʼuk ti tskʼan ti jaʼ xa xachanbe stalelale. Xuʼ van muʼyuk xa ep avamigotak chkom, pe mas jun avoʼonton chavaʼi aba. Xchiʼuk xuʼ xatʼuj alekil amigotak ti xuʼ skoltaikot sventa lekuk atalelale (Romanos 12:2).

«Jun ti buchʼu lek xkil jba xchiʼuke jaʼ li Clinte. Yuʼun lek xtojob snopel xchiʼuk xaʼibe smelolal ti kʼu yelan chkaʼi jbae» (Jason, 21 sjabilal).

Takʼo li sjakʼobiltak liʼe:

¿Mi chajel ti kʼu yelan chalap akʼuʼ, kʼu yelan chakʼopoj o ti kʼu yelan atalelal sventa lek xilikot li avamigotake?

□ Tana

□ Muʼyuk

Akʼo mi muʼyuk lek ti bu chbat li avamigotake, ¿mi chabat ek ta skoj noʼox ti te chbatike?

□ Jech

□ Mu jechuk

Tojobtasel: Mi «tana» o «jech» xachi li ta sjakʼobiltak laj kalbetik xa skʼoplale, chiʼino ta loʼil atot ameʼ o junuk yijil krixchano ti xtojob snopel sventa skoltaot ta stʼujel avamigotak ti mu sokesote. Mi stestigoot Jeovae, xuʼ xachiʼin ta loʼil jun mol ta tsobobbail xtok.

TE CHATABE MAS YAʼYEJAL LI TA KAPITULO 9 TA VOLUMEN 2

LI TA YAN KAPITULOE

¿Mi oy buchʼu yakʼojot ta preva junuk velta o mi voʼot oy kʼusi chakʼan chapas ti anaʼoj ti chʼabal leke?

[Tsʼib ta yok vun]

BEILTASEL TA VIVLIA

«Oy jun amigoil ti mas to kʼanvanem kʼuchaʼal junuk jchiʼiltik ta vokʼele» (Proverbios 18:24).

TOJOBTASEL

Akʼo persa spasel li kʼusi leke. Li buchʼu jech tspas eke chnopaj tal ta atojolal yoʼ xamigoinot. ¡Taje jaʼ me li lekil amigoile!

¿MI ANAʼOJ XA?

Manchuk mi mu snaʼ xtʼujvan li Diose, tstʼuj li buchʼutik chamigoine (Salmo 15:1-5).

LI KʼUSI SKʼAN JPAS SVENTA JTA KAMIGOTAKE

¿Kʼusi skʼan jpas sventa jta jlekil amigotak?

Liʼe jaʼ li buchʼutik ta jkʼan ta xkojtikin ti oy xa sjabilalike: ․․․․․

¿Kʼusi ta jkʼan ta jakʼbe jtot jmeʼ ta sventa li saʼel amigoile?

¿KʼUSI CHANOP LI VOʼOTE?

● ¿Kʼu yelan stalelal chakʼan li avamigoe? Alo kʼuchaʼal.

● ¿Kʼusi to van skʼan xajel ta atalelal sventa xata avamigotake?

[Tsʼib ti mukʼtik sletraile]

«Li jtot jmeʼe laj yalbeikun ti akʼo mu xa jchiʼin jlom kamigotake. Muʼyuk lek laj kaʼi li kʼusi laj yalbeikune, yuʼun la jnop ti jaʼ noʼox stukik ti lek chkaʼi jba yuʼunike. Pe lek li tojobtasel laj yakʼbeikune, yuʼun laj kakʼ venta ti oy to yan buchʼutik mas lek ti xuʼ xkamigoane» (Carlos).

[Rekuadro]

Yan kʼusitik stakʼ xapas

Loʼilajan xchiʼuk atot ameʼ ta sventa li avamigotake. Jakʼbo kʼu toʼox yelan yamigotakik kʼalal jech toʼox sjabilalik kʼuchaʼal voʼote. ¿Mi oy chʼabal lek bat ta tʼujel yuʼun li yamigotakike? ¿Kʼu chaʼal? Jakʼbo kʼusitik xuʼ xapas sventa mu xatikʼ aba ta kʼope.

Akʼbo yojtikin atot ameʼ li avamigotake. Mi mu xakʼan xavakʼbe yojtikine, ¿kʼu chaʼal xanaʼ? Li atot ameʼe, ¿mi oy van kʼusi chopol chilbeik li avamigotake? Mi jeche, skʼan van xatʼuj lek avamigotak un bi.

Tsʼet chikintao kʼusi chal li avamigoe. Vinajuk ti chatsak ta venta li kʼusi chale xchiʼuk ti oy ta avoʼonton ti lekuk noʼox oye (Filipenses 2:⁠4).

Akʼvanan ta perton. Maʼuk me tukʼil krixchano li avamigotake, yuʼun jech kʼuchaʼal chal Santiago 3:2 «ep ta velta ta jmak kakan jkotoltik».

Mu me teuk˗o xanochʼet ta stojolal li avamigoe. Li avamigotake oy kʼusi tskʼan spasik ta stukik noʼox. Mi jaʼ amelel amigotake, ta skoltaikot kʼalal jaʼo chtun avuʼune (Eklesiastes 4:9, 10).

[Lokʼol]

Mi la apas jech kʼuchaʼal tspas li avamigotak sventa lek xayiloxuke, jaʼ xa me tspasoxuk ta mantal kʼuchaʼal xal yoʼontonike