KAPITULO 35

¿Kʼuxi xuʼ xkamigoin li Diose?

Kʼalal 12 toʼox sjabilal li Gabriele, laj yakʼ venta ti toj tsots skʼoplal yamigoinel Dios kʼalal iktae yuʼun stote. Xi chale: «Jun akʼobale, jal la jpas orasion xchiʼuk xivokolet la jkʼanbe Jeova ti akʼo sutuk tal li jtote».

Kʼalal tsvul tajek yoʼonton li Gabriele, lik xchan li Svivliae. Te la sta ta chanel jun versikulo ta Vivlia ti xi laj yalbe Jeova li jun jtsʼibajome: «Chtal ta atojolal li buchʼutik abol sbaike; voʼot chakolta li buchʼutik chamem stotike» (Salmo 10:14). Li Gabriele kʼot tajek ta yoʼonton, xi chale: «Kʼalal la jchane, laj kil ti yakal tskoltaun li Jeovae xchiʼuk la svules ta jol ti jaʼ jtote, ¡muʼyuk buchʼu yan totil jech!».

Xuʼ van jech chanuptan kʼuchaʼal li Gabriele, pe li Jeovae tskʼan ti xakʼot ta yamigoe, yuʼun xi chal li Vivliae: «Nopajanik ta stojolal Dios, jech chnopaj tal ta atojolalik ek» (Santiago 4:8). ¿Mi avakʼ venta? Akʼo mi mu xkiltik o mi bikʼit tajek jkʼoplaltik, ¡li Jeovae tskʼan ti xijkʼot ta yamigoe!

Sventa xkʼot ta kamigotik li Diose, oy kʼusi skʼan jpastik. Jnopbetik skʼoplal liʼe: mi oy junuk velta atsʼunoj jpetsuk nichime, skʼan xakʼuxubin, bu chatsʼun xchiʼuk ti nopajtik noʼox xamalta o ti tete noʼox asate. Jaʼ jech sventa xavamigoin li Dios eke, ¿kʼusitik xuʼ xapas sventa xakʼot ta yamigoe?

Toj tsots skʼoplal ti xijchanunaje

Sventa xamigoin sbaik li chaʼvoʼ krixchanoetike, skʼan xchiʼin sbaik ta loʼil xchiʼuk ti xchikintabe sbaike. Jaʼ jech skʼan spas li buchʼutik tskʼan chkʼot ta yamigo Diose. Pe ¿kʼuxi xuʼ jchikintabetik li Jeovae? Jaʼo kʼalal ta jchantik xchiʼuk ta jnopbetik skʼoplal li Vivliae (Salmo 1:​2, 3).

Melel onoʼox, mu toj kʼunuk chavaʼi ti xachanunaje. Xuʼ van oy kʼusi mas chakʼupin spasel, jech kʼuchaʼal skʼelel television, tajimol ta videojuego xchiʼuk ti xalokʼ ta paxyal xchiʼuk li avamigotake. Pe mi chakʼan chakʼot ta yamigo li Diose, skʼan xatsʼet chikinta li kʼusi chal ta Skʼope.

Mu xanop ti chachʼajub-o tajek xchanel li Avivliae, xuʼ me xlik akʼupin xchanel. Pe skʼan xachʼakbe yorail, xuʼ jech xapas kʼuchaʼal tspas li tseb ti Lais sbie, xi chale: «Oy lek yorail kuʼun, kʼalal chilike, ta jchan jun kapitulo li Jvivliae». Li Maria ti 15 jabil yichʼoj eke xi chale: «Jujun akʼobal ta jchan jlikeluk li Jvivliae».

¿Kʼusi ora chachan li Avivliae? Baʼyel kʼelo li rekuadro ta pajina 292. Laje, tsʼibao ta olon mi ta sob o mi ta mal kʼakʼal chachan li Avivliae akʼo mi oʼlol noʼox ora xachan.

․․․․․

Pe ti chachʼakbe yoraile jaʼ noʼox slikebal, yuʼun mi lik achan li Vivliae oy onoʼox bu mu kʼunuk chavaʼi. Xuʼ van jech chavaʼi aba kʼuchaʼal li Jezreel ti yichʼoj 11 sjabilale, xi chale: «Junantik livroetik ta Vivliae toj vokol chkaʼi». ¡Pe mu xachibaj! Vuleso ta ajol ti jaʼ yakal chachikintabe li avamigo Jeova kʼalal chachan Avivliae. Kʼalal mas chachane, mas chakʼupin xchiʼuk chatabe sbalil.

Jechuk-o me xapasilan orasion

Li orasione jaʼ jun mukʼta matanal ti yakʼojbutik Jeova sventa xuʼ jkʼopontike. Nopo noʼox avaʼi, xuʼ xakʼopon Jeova ta kʼusiuk noʼox ora, mi ta kʼakʼaltik o ta akʼobaltik. Yuʼun oy tajek ta yoʼonton chchikintabot. Jaʼ yuʼun, li Vivliae xi chale: «Li kʼusi chavul-o avoʼontonike, ta sjunul avoʼontonik xakʼanik vokol xchiʼuk tojik ta vokol kʼalal chapasik orasione» (Filipenses 4:6).

Jaʼ xkaltik ti xuʼ xachapbe Dios li kʼusi chavul-o avoʼontone o li avokoltake. Pe lek xtok ti xatojbe ta vokole, yuʼun kʼalal tskoltaot li avamigotake ta onoʼox xatojbe ta vokol. Pe mas to ep kʼusi spasoj ta atojolal li Jeovae (Salmo 106:1).

Tsʼibao li kʼusitik xuʼ xatojbe-o ta vokol li Jeovae.

․․․․․

¿Mi oy junuk velta ti mu xa xanaʼ kʼusi chapas ta skoj ti tslubtsanot xa livul oʼontonale? ¿Kʼusi xuʼ xapas? Xi chal li Vivliae: «Akʼbo sbain Jeova li avikatse, vaʼun jaʼ chikot. Mi jaʼuk onoʼox chakʼ yaluk ta lum li buchʼu tukʼe» (Salmo 55:22).

Tsʼibao liʼ ta olon li kʼusi chavul-o avoʼonton ti chakʼan chaval ta a-orasione.

․․․․․

Oyuk kʼusi xachan ta sventa li kʼusi anuptanoje

Oy yan kʼusi skʼan xatsak ta venta yoʼ xuʼ xavamigoin li Diose. Li Davide la stsʼiba jun kʼejoj ti xi chale: «Pasik preva, vaʼun chavilik ti toj lek li Jeovae» (Salmo 34:8). Jaʼo la stsʼiba kʼalal jutuk xa ox mu laj yichʼ milel yuʼun li ajvalil Saule. Vaʼun, ay snakʼ sba yoʼ bu oy li yajkontratak ti jaʼ li jfilisteaetike. Ta kʼelele te xa chcham-o, pe muʼyuk jech kʼot ta pasel, ¿kʼusi laj yut? La spʼis sba ta chuvaj (1 Samuel 21:10-​15).

Muʼyuk la snop David ti jaʼ ta skoj spʼijil ti muʼyuk xchame. Yuʼun xi la stsʼiba li ta slikeb kʼejoje: «Oy kʼusi la jkʼanbe li Jeovae, vaʼun la stakʼbun. Jaʼ la skoltaun lokʼel ta sventa li kʼusitik ta xixiʼoe» (Salmo 34:4). Ta skoj li kʼusi la snuptan ta xkuxlejale, xi laj yale: «Pasik preva, vaʼun chavilik ti toj lek li Jeovae».

Nopbo skʼoplal kʼuxi la xchabiot li Jeova kʼalal oy kʼusi la anuptane xchiʼuk tsʼibao kʼusi kʼot ta pasel. Mu persauk jaʼ li kʼusi labal xa tajek sbae, xuʼ jaʼ li kʼusi mu masuk tsots skʼoplal yilele.

․․․․․

Ta jujuntal oy kʼusi skʼan jpastik sventa lekuk xkamigoin jbatik xchiʼuk li Diose akʼo mi la xchanubtasutik li jtot jmeʼtik ta sventa li kʼusi chchanubtasvan li Vivliae. ¿Mi oy xa kʼusi yakal chapas sventa xavamigoin li Diose o mi muʼyuk to? Li kapitulo liʼe chaskoltaot sventa xlik apas. Vaʼun, li Jeovae chakʼbot sbendision, yuʼun xi chal li Vivliae: «Kʼanilanik, vaʼun cha-akʼbatik; saʼilanik, vaʼun chataik» (Mateo 7:7).

CHATABE MAS YAʼYEJAL LI TA KAPITULO 38 XCHIʼUK 39 TA VOLUMEN 1

LI TA YAN KAPITULOE

¿Mi vokol chavaʼi yalbel yantik ta sventa li Diose? ¿Kʼuxi xuʼ xapakbe skʼoplal li kʼusi achʼunoje?

BEILTASEL TA VIVLIA

«Xmuyubajik noʼox li buchʼutik chakʼik venta ti chtun yuʼunik li beiltasel chakʼ Diose» (Mateo 5:3).

LI KʼUSI XUʼ XAPASE

Mi chakʼel voʼob pajina jujun kʼakʼale, chlaj akʼel ta jun jabil li Avivliae.

¿MI ANAʼOJ XA LIʼE?

Ti yakal chakʼel li livro liʼe xchiʼuk ti chavakʼ ta akuxlejal li tojobtaseletik ta Vivliae, jamal xvinaj ti jaʼ jech chchiʼinot ta loʼil li Jeovae, yuʼun oy ta yoʼonton ti xakʼot ta yamigoe (Juan 6:44).

¡PASO LIʼE!

Sventa jtabe sbalil li kʼusi ta jchan ta Vivliae, xi ta jpase: ․․․․․

Sventa nopolik noʼox jpas orasione, xi ta jpase: ․․․․․

¿Kʼusi xuʼ jakʼbe jtot o jmeʼ ta sventa liʼe? ․․․․․

¿KʼUSI CHANOP?

● ¿Kʼusi xuʼ xapas sventa xakʼupin xchanel li Avivliae?

● ¿Kʼu yuʼun oy ta yoʼonton chchikinta j-orasiontik li Jeova ti chʼabal jtukʼiltike?

● ¿Kʼuxi xuʼ xlekub ti kʼu yelan chapas orasione?

[Tsʼib ti mukʼtik sletraile]

«Kʼalal mas toʼox bikʼitune, ta jchaʼalilan li j-orasione. Pe li avie, jelel xa ta skoj ti jelajtik xa jujun kʼakʼale, yuʼun jaʼ xa chkal li kʼusi lek chkʼot ta jkuxlejale xchiʼuk li kʼusi ta jnuptan jujun kʼakʼale. Jaʼ yuʼun, muʼyuk xa ta jchaʼalilan» (Eva).

[Rekuadro]

Kʼelo li Avivliae

1. Tʼujo junuk loʼil ta Vivlia ti chakʼan chachanbe skʼoplale. Sventa xavaʼibe smelolale, albo Jeova ti akʼo yakʼbot apʼijile.

2. Chʼakbo lek yorail. Mu toj sujomuk xakʼel. Nopbo lek skʼoplal kʼalal yakal chachan li loʼile. Teuk xa aviloj yilel li kʼusi yakal chkʼot ta pasele, ti tey chachikinta li kʼusi chalike, aʼio li yikʼ kʼusitike, li smuil veʼlile o yan kʼusitik. Mi jech la apase, mas xa me kuxul chavil li loʼile.

3. Nopbo skʼoplal li kʼusi la achane. Kʼalal mi tsuts xchanel avuʼune, xi xajakʼbe abae:

● ¿Kʼu yuʼun laj yakʼ Jeova ti te tsʼibabil xkom ta Vivlia li loʼil liʼe?

● Li ta Vivliae, ¿buchʼutik lek xuʼ jchanbe stalelal xchiʼuk buchʼutik ti mu stakʼ jchanbee?

● ¿Kʼusitik tojobtasel xuʼ xkakʼ ta jkuxlejal?

● ¿Kʼusi chchanubtasun ta sventa Jeova xchiʼuk li ta stalelaltake?

4. Paso orasion. Albo Jeova li kʼusi la achane xchiʼuk albo ti kʼuxi chavakʼ ta akuxlejale. Tojbo ta vokol xtok ti yakʼojbutik li Skʼope, li Vivliae.

[Lokʼol]

«Li akʼope jaʼ kʼotem ta kantil yuʼun li kakane xchiʼuk jaʼ sakjaman batel yuʼun li jbee» (Salmo 119:105).

[Rekuadro]

Baʼyel paso li kʼusi mas tsots skʼoplale

¿Mi mu noʼox xatabe lek yorail ti xapas orasion xchiʼuk ti xachan li Avivliae? Li kʼusi tskoltaote jaʼ ti teuk ta ajol li kʼusi tsots kʼoplal skʼan xapase.

Jpastik preva liʼe: Saʼo junuk akuveta tikʼo ochel mukʼta tonetik, laje nojeso ta yiʼ. ¿Kʼu yelan kom? Jun kuveta ti noj ta tonetik xchiʼuk ta yiʼe.

Pe avie, xokobtaso li akuvetae, baʼyel xa tikʼo li yiʼe, laje tikʼo ochel li tonetike. ¿Mi mu jechuk ti muʼyuk x-och li tonetike? Jaʼ ta skoj ti baʼyel la atikʼ li yiʼe.

¿Kʼusi chakʼ achan? Mi jaʼ baʼyel la apas li kʼusitik muʼyuk mas tsots skʼoplal jech kʼuchaʼal li chʼayob oʼontonale. Muʼyuk xa me yorail avuʼun ta sventa li kʼusitik ta mantale, jaʼ yuʼun xi chalbutik li Vivliae: «[Skʼan] xanaʼik stʼujel li kʼusi mas tsots skʼoplale» (Filipenses 1:10). Mi jech la apas taje, te chavakʼ venta ti oy xa lek yorail avuʼun ta sventa li kʼusitik ta mantale xchiʼuk ti jaʼ tsʼakal to chachʼay avoʼontone. Vuleso ta ajol ti jaʼ baʼyel skʼan xavakʼ ta akuxlejal li kʼusitik tsots skʼoplale.

[Lokʼol]

Li yamigoinel Diose xkoʼolaj ta jpets nichim ti skʼan kʼelel lek sventa xchʼie