KAPITULO 37

¿Mi skʼan van xkichʼ voʼ?

Akʼbo senyail mi jech o mu jechuk:

Skʼan xichʼik voʼ skotol li yajtsʼaklomtak Kristoe.

□ Jech

□ Mu jechuk

Li ichʼvoʼe jaʼ tskoltautik sventa mu jpas tsots jmultik.

□ Jech

□ Mu jechuk

Li ichʼvoʼe jaʼ sventa jta˗o jkolebaltik.

□ Jech

□ Mu jechuk

Mi muʼyuk kichʼoj voʼe, muʼyuk chopol chilun Dios mi oy kʼusi chopol la jpase.

□ Jech

□ Mu jechuk

Skʼan xa xkichʼ voʼ yuʼun yichʼoj xa voʼ li kamigotake.

□ Jech

□ Mu jechuk

¿MI YAKAL chavakʼ ta akuxlejal li mantaletik ta Vivliae? ¿Mi chavakʼ persa ti jaʼ xkʼot ta avamigo li Diose? ¿Mi yakal xa chavalbe krixchanoetik li kʼusi chachane? Mi yakal xa chapas li kʼusi laj yal li sjakʼobiltake, xuʼ van anopoj xa chavichʼ voʼ. Pe baʼyel skʼan xakʼel mi chapalot xa. Sventa xanaʼ mi chapalot xae, jaʼ me xuʼ skoltaot mi lek takʼ avuʼun li kʼusi laj kalbetik skʼoplal ta slikebale.

● Skʼan xichʼik voʼ skotol li yajtsʼaklomtak Kristoe.

Jech. Jaʼ jech laj yalbe mantal yajtsʼaklomtak Jesus ti akʼo jech spasike (Mateo 28: 19, 20). Li stuk eke laj yichʼ voʼ. Jaʼ yuʼun, skʼan me xavichʼ voʼ sventa xakʼot ta yajtsʼaklom Kristoe, pe jaʼ to mi xnop xa ox lek avuʼune xchiʼuk mi jpʼel ta avoʼonton chakʼan jech chapase.

● Li ichʼvoʼe jaʼ tskoltautik sventa mu jpas tsots jmultik.

Mu jechuk. Li ichʼvoʼe jaʼ sventa xil yantik ti avakʼojbe xa akuxlejal li Jeovae. Ti chkakʼbetik jkuxlejaltik li Jeovae, jaʼ ta skoj ti ta jkʼan ta jchʼunbetik smantale, maʼuk noʼox sventa mu jpastik kʼusi chopol, pe ti oy ta koʼontontik spasele.

● Li ichʼvoʼe jaʼ sventa jta˗o jkolebaltik.

Jech. Jech kʼuchaʼal chal li Vivliae tsots skʼoplal li ichʼvoʼe, yuʼun jaʼ ta jta˗o jkolebaltik (1 Pedro 3:21). Pe li ichʼvoʼe mu xkoʼolaj kʼuchaʼal jun seguro ti chchabiot sventa mu kʼusi chopol xanuptane. Yuʼun skʼan jpastik ta skoj ti jkʼanojtik li Jeovae xchiʼuk ti ta sjunul koʼontontik ta jkʼan chijtunutik ta stojolale (Markos 12: 29, 30).

● Mi muʼyuk kichʼoj voʼe, muʼyuk chopol chilun Dios mi oy kʼusi chopol la jpase.

Mu jechuk. Xi chal Santiago 4:17: «Mi oy buchʼu snaʼ spasel li kʼusi tukʼe, pe mi muʼyuk bu tspase, jaʼ mulil chkʼot ta stojolal», mu ventauk mi yichʼoj xa voʼ o mi muʼyuk. Jaʼ yuʼun, nopo me: ¿Mi xanaʼ kʼusi tskʼanbot Dios ti akʼo xapase? ¿Mi xnop xa lek avuʼun li kʼusi chakʼan chapas ta akuxlejale? Mi jeche, xuʼ van skʼan xavalbe atot ameʼ o junuk ermano ti lek yij ta mantale. Jaʼ tskoltaoxuk sventa xakʼot li ta ichʼvoʼe.

● Skʼan xa xkichʼ voʼ yuʼun yichʼoj xa voʼ li kamigotake.

Mu jechuk. Skʼan me xlokʼ ta avoʼonton mi chavichʼ voʼe (Salmo 110:3). Baʼyel me skʼan xavaʼibe smelolal kʼusi smakoj ti chakʼot ta stestigo Jeovae xchiʼuk ti jpʼel ta avoʼonton jech chapas akʼo mi oy kʼusitik chlik abain (Eklesiastes 5: 4, 5).

Chjel˗o yuʼun akuxlejal

Kʼalal chavichʼ voʼe, chjel˗o akuxlejal xchiʼuk ep kʼusitik xuʼ xlik akʼupin. Pe oy me kʼusi tsots chlik abaik xtok. ¿Kʼusi jaʼ? Jaʼ ti xapas skotol li kʼusi chavalbe Jeova kʼalal mi la avakʼbe akuxlejale.

¿Mi poʼot xa xavichʼ voʼ? Mi jeche, muyubaj me. ¡Jaʼ jun mukʼta matanal ti xuʼ xijtunutik ta stojolal li Jeovae xchiʼuk ti xuʼ xkakʼbetik iluk jujun kʼakʼal ti kakʼojbe xa li jkuxlejaltike! (Mateo 22: 36, 37).

LI TA YAN KAPITULOE

Te chavakʼ venta kʼuxi xuʼ xatunes lek li akuxlejale.

BEILTASEL TA VIVLIA

«Ta jkʼanboxuk [...] ti akʼo xavakʼik ta kuxul matanal li abekʼtalike, ti chʼuluke, ti akʼo xchʼam li Diose, ti jaʼ jun chʼul abtelal ti bu chatunesik ti kʼu yelan xatojobik ta snopele» (Romanos 12:1).

TOJOBTASEL

Jakʼbo atot ameʼ buchʼu xuʼ skoltaot ta tsobobbail sventa xachʼi ta mantal (Echos 16: 1-3).

¿MI ANAʼOJ XA LIʼE?

Tsots me skʼoplal li ichʼvoʼe, yuʼun jaʼ tskoltaot sventa xata amarka sventa xakole (Esekiel 9: 4-6).

¡PASO XA NOʼOX!

Li kʼusitik skʼan to xkaʼibe smelolal ta Vivlia sventa xkichʼ voʼe: ․․․․․

¿Kʼusi ta jkʼan ta jakʼbe jtot jmeʼ ta sventa li ichʼvoʼe? ․․․․․

¿KʼUSI CHATAKʼ LI VOʼOTE?

● ¿Kʼu yuʼun toj tsots skʼoplal li ichʼvoʼe?

● ¿Kʼu yuʼun chichʼik voʼ junantik kerem tsebetik kʼalal muʼyuk toʼox chapalike?

● ¿Kʼu yuʼun oy junantik kerem tsebetik mu skʼan xakʼbeik xkuxlejal Dios xchiʼuk ti xichʼik voʼe?

[Tsʼib ti mukʼtik sletraile]

Kʼalal te oy ta jol ti kichʼoj voʼe, jaʼ tskoltaun ta spasel li kʼusi leke xchiʼuk ti mu jtikʼ jba li ta vokolile» (Noemí).

[Rekuadro/ Lokʼol]

Li kʼusitik tsjakʼbe sbaik ta sventa li ichʼvoʼe

¿Kʼusi smelolal li ichʼvoʼe? Kʼalal chavichʼ mukel ta voʼe, xkoʼolaj ti chachame, yuʼun chavikta spasel li kʼusitik toʼox oy ta avoʼontone, vaʼun jaʼ xa chapas li kʼusi tskʼanbot li Jeovae.

¿Kʼusi smakoj ti chavakʼbe akuxlejal li Jeovae? Jaʼ ti jaʼ xa yuʼun akuxlejal li Jeovae, maʼuk xa avuʼun (Mateo 16:24). Jaʼ yuʼun, kʼalal skʼan toʼox xavichʼ voʼe, baʼyel skʼan xapas jun orasion ti te chavalbe Jeova ti jaʼ mas tsots skʼoplal chavil ta akuxlejal li kʼusi tskʼane.

¿Kʼusitik skʼan jpas mi ta jkʼan chkichʼ voʼe? Skʼan xavakʼ ta akuxlejal li kʼusitik chakʼ ta chanel li Vivliae xchiʼuk xavalbe yantik li kʼusitik achʼunoje. Tsots skʼoplal skʼan xachanunaj xchiʼuk xapas orasion sventa lekuk xavil aba xchiʼuk li Jeovae. Tsots skʼoplal ti xlokʼ ta avoʼonton ti chakʼan chatun ta stojolal li Jeovae, maʼuk ta skoj ti chalbot yantike.

¿Jayib jabilal skʼan sventa xkichʼ voʼ? Maʼuk chichʼ tsakel ta venta ti jayib ajabilale. Li kʼusi mas tsots skʼoplale jaʼ ti xavaʼibeuk xa smelolal ti kʼusi smakoj ti chavakʼbe akuxlejal li Jeovae.

¿Kʼusi xuʼ jpas mi mu to xakʼik kichʼ voʼ li jtot jmeʼe? Mi chalboxuk ti skʼan to xachan yakʼel ta akuxlejal li tojobtaseletik ta Vivliae, chʼunbo me. Pe oy kʼusitik xuʼ xlik apas sventa masuk xavamigoin li Jeovae (1 Samuel 2:26).

[Rekuadro]

Tarea

¿Mi anopoj xa chavichʼ voʼ?

Li sjakʼobiltak liʼe tskoltaot sventa xavakʼ venta mi chapalot xa. Pe ¡baʼyel me xakʼel li tekstoetik sventa xatakʼ li kʼusitik chichʼ jakʼel liʼe!

¿Mi apatoj avoʼonton ta stojolal Jeova? ¿Kʼu yelan yakal chavakʼ ta ilel? (Salmo 71:5). ․․․․․

¿Mi xavakʼ venta li kʼusi lek xchiʼuk li kʼusi chopole? ¿Butik jech avakʼoj venta? (Ebreos 5:14). ․․․․․

¿Mi nopolik noʼox chapas orasion? ․․․․․

¿Mi jamal chaval ta a˗orasion li kʼusi chakʼane? ¿Mi chavakʼ ta ilel ti akʼanoj Jeova kʼalal chapas orasione? (Salmo 17:6). ․․․․․

¿Kʼusitik to skʼan xlekub chavaʼi li ta a˗orasione? ․․․․․

¿Mi nopajtik noʼox chachan li Avivliae? (Josue 1:8). ․․․․․

¿Kʼusi chachanbe skʼoplal kʼalal chachanunaj atuke? ․․․․․

¿Kʼusi chakʼan chachanbe skʼoplal kʼalal chachanunaj atuke? ․․․․․

¿Mi xatojob ta xcholel mantal? (Nopo ta sventa liʼe: ¿Mi x˗albe avuʼun smelolal li kʼusitik tsotsik skʼoplal chakʼ ta chanel Vivliae? ¿Mi chbat achaʼkʼel li buchʼutik lek chaʼiik mantale? ¿Mi chavakʼ persa ti oyuk buchʼu xachanubtase?)

□ Tana □ Muʼyuk

¿Mi chalokʼ ta cholmantal akʼo mi muʼyuk chlokʼ li atot ameʼe? (Echos 5:42).

□ Tana □ Muʼyuk

¿Kʼusitik to chakʼan chalekubtas li ta cholmantale? (2 Timoteo 2:15).

¿Mi chabat ta skotol tsobajeletik o mi nopajtik noʼox chachʼay aba? (Ebreos 10:25).

¿Kʼusitik chapas ta sventa li tsobajele? ․․․․․

Mi chakʼik permiso li atot ameʼe, ¿mi chabat li ta tsobajeletik kʼalal mu xuʼ yuʼun chbatike?

□ Tana □ Muʼyuk

¿Mi chakʼupin spasel li kʼusi tskʼan Diose? (Salmo 40:8).

□ Tana □ Muʼyuk

¿Mi oy tsalem avuʼun junuk preva kʼalal la sujoxuk li achiʼiltake? (Romanos 12:2). ․․․․․

¿Kʼusi anopoj chapas sventa jechuk˗o akʼanoj li Jeovae? (Judas 20, 21). ․․․․․

¿Mi jech˗o chatun ta stojolal Jeova mi laj yiktaik mantal li atot ameʼ o li avamigotake? (Mateo 10: 36, 37).

□ Tana □ Muʼyuk

[Lokʼol]

Li ichʼvoʼe xkoʼolaj kʼuchaʼal ti chijnupune, jaʼ yuʼun skʼan me xanop lek