LI UTSʼ-ALALILE jaʼ li kʼusi mas voʼne ojtikinbil ta stojolal krixchanoetike, pe li avie yakal tsnuptan tsatsal vokoliletik. Jlome chalik ti xiʼel van chchʼay li utsʼ-alalil ta skoj ti ch-epaj li stunesel droga xchiʼuk li mulivajel ta stojolal kerem-tsebetike, ti yantik xa ch-epaj li xtuchʼel nupunel avie xchiʼuk li majbail ta utsʼ-alalile, ti yantik xa ch-epaj batel li utsʼ-alalil ti jaʼ noʼox sbainoj stuk li totil o meʼile xchiʼuk yan tsatsal vokoliletike.

¿Mi xuʼ to van chakʼ jun oʼontonal li utsʼ-alalile xchiʼuk ti xuʼ chabibil chaʼi-o sbaik li buchʼutik teik ta stojolale? Xuʼ, pe jaʼ noʼox mi xojtikinik kʼuyelan ta tael li muyubajel ta utsʼ-alalile. Taje muʼyuk mukul. Voʼne xa onoʼox lek ilbil ti lek chtune. ¿Kʼusi taje? Li livro liʼe, Ti kʼuyelan ta tael muyubajel ta utsʼ-alalile, chakʼ ta ilel kʼusi jaʼ. Jech noxtok chakʼ kiltik kʼuxi xuʼ stakʼ chapanel epal kʼopetik ta utsʼ-alalil ti vokol ta chapanele. ¿Mi oy van buchʼu muʼyuk chtun yuʼun avi li mantal taje?