Uni jcholmantal sventa Ajvalilal yuʼun Dios:

JNOPTIK avaʼi ti te oyot ta Betel ta Brooklyn (Nueva York) ta sob viernes ta 2 yuʼun oktuvre ta 1914. Te chotolot ta avavil li ta veʼebal ta jujun sobe, yakal chamala xkʼot li ermano Charles Russelle. Jaʼ to avile chjam li stiʼ veʼebale, vaʼun te xvaʼvun ochel li ermanoe. Jech onoʼox kʼuchaʼal nopem xaʼie, chpaj jlikeluk, vaʼun xmuyubaj xi chalbe li buchʼutik te oyike: «¡Liʼoxuke!». Vaʼun, kʼalal skʼan toʼox xchoti li ta jol mexa ti bu onoʼox chchoti ta jujun sobe, chib velta chtʼax skʼob, vaʼun chal jun aʼyej ti toj labal sbae: «Laj xa li skʼakʼalil jyanlum krixchanoetike; li skʼakʼalil ajvaliletik yuʼunike laj xa skʼoplal». Xamuyubaj xa noʼox tajek, ¡voʼne xa onoʼox yakal chamala! Jech oxal, lek tsots xchiʼuk jal chatʼax akʼobik xchiʼuk li yantik te ta Betel ta skoj ti xamuyubajik tajeke.

Oy xa ta sjaylajunebaluk jabil ti jech laj yal li ermano Russell taje. ¿Kʼusi pasem tal yuʼun Ajvalilal li vaʼ jayib jabil jelavem tale? ¡Ep tajek!  Li Jeovae stunesoj tal Ajvalilal sventa tslekubtas xchiʼuk tstojobtas li steklumale, ti jayib noʼox miyon ta 1914, pe ti oy xa vaxakibuk miyon li avie. ¿Kʼutik yelan chatabe sbalil li tojobtasel taje?

Nopajtik noʼox chkaʼitik ti xi chalik li ermanoetike: «Toj anil chanav li skareta Jeova te ta vinajele», oy srasonik ti jech chalike. Pe leʼ xa onoʼox tal ta 1914, anil xa onoʼox tajek chanav tal li vaʼ karetae —ti jaʼ skʼoplal li jvokʼ s-organisasion Jeova ta vinajele— taje jaʼ chachanbe batel skʼoplal kʼalal chakʼel lek batel li livro liʼe. Sventa chcholbeik skʼoplal li Ajvalilale ep ta tos kʼusitik la stunesik li jcholmantaletike, jech kʼuchaʼal mantaletik ta periodikoetik, cholmantal ta mukʼta vunetik, yakʼel ta ilel lokʼoletik, tarjetaetik ti chal mantale, fonógrafo (xkoʼolaj kʼuchaʼal jun tokadisko), radio xchiʼuk Internet.

Koliyal ti chakʼbutik li sbendision Jeovae xuʼ xa kʼupil sba jpastik imprimir mas ta 670 jeltos kʼopetik li vunetike xchiʼuk muʼyuk ta jkʼanbetik stojol kʼalal chkakʼbetik li krixchanoetike. Li ermanoetik ti naka noʼox chkoltavanike ch-abtejik ta svaʼanel Salonetik sventa Tsobobbail, Salonetik sventa Asamblea xchiʼuk Beteletik ti oy tsvaʼanik ta lumetik ti jkʼulejike xchiʼuk ta lumetik ti bu abol noʼox sbaike. Jech xtok, kʼalal chaʼiik kermanotaktik ti oy bu chkʼot vokolile ta anil noʼox chbat skoltaik li buchʼutik chil svokolike, jech chakʼik ta ilel ta melel ti «jaʼ jchiʼiltic ta voqʼuel chcʼot ti cʼalal oy jvocoltique» (Prov. 17:17).

Oy bakʼintik li paleetik xchiʼuk yan jkontrainvanejetike tspas ta jmoj sjolik xchiʼuk «li jchapanvanejetic ti mu tucʼuc [chchapanvanik]» sventa chilbajinutike. Pe tstsatsubtas xchʼunel koʼontontik ti oy jayibuk velta muʼyuk chkʼot ta pasel li kʼusi xchapojike, yuʼun jaʼ noʼox chkoltavan ‹sventa xichʼ akʼel ta ojtikinel mas li lekil aʼyejetike› (Sal. 94:20; Filip. 1:12).

Jaʼ jun mukʼta matanal chkaʼikutik ti koʼol chij-abteje, kuni chiʼiltak ta mosoil, teuk me ta ajolik ti jkʼanojotkutik tajek akotolike. Ta jpaskutik orasion ta atojolalik sventa xatabeik sbalil kʼalal chakʼelik li livro liʼe yoʼ oyuk sbalil xavilik li kʼusitik ta mantale (Mat. 24:45).

Naʼik me ti kʼanbiloxuk tajek kuʼunkutike.

Avermanotakik,

Li Jtsop Jbeiltasvanej yuʼun li Stestigotak Jeovae