¿Mi jaʼik van kuxlejaletik ti mu xvinaj ta kʼelel li animaetike?
¡Oy ta melel li kuxlejaletik ti mu xvinajik ta kʼelele! Jech xtok, oy lekik xchiʼuk chopolik. ¿Mi jaʼik van krixchanoetik ti chamemik xae?
Maʼuk, yuʼun kʼalal chijchame, muʼyuk kʼusi kuxul chkom kuʼuntik jech kʼuchaʼal chalike. ¿Kʼuxi jnaʼojtik taje? Yuʼun jaʼ jech chal li Vivliae. Li Vivliae jaʼ jun livro ti melel kʼusi chale xchiʼuk jaʼ te likem tal ta stojolal li melel Diose, ti Jeova sbie. Jaʼ la spas li krixchanoetike, jaʼ yuʼun snaʼoj kʼusi chkʼot ta stojolalik kʼalal chchamike (Salmo 83:18; 2 Timoteo 3:16).
Ta lum laj yichʼ pasel li Adane, jaʼ yuʼun ta lum sut batel
Li Vivliae chal ti ta lum la spas Dios li baʼyel vinik ti Adan sbie (Jenesis 2:7). Te laj yakʼ nakiuk li ta nichimaltik Edene. Ti lajuk xchʼunbe smantal Jeova li Adane, kuxul˗o jechuk li avie. Ta skoj ti yolbaj muʼyuk la xchʼunbe smantal Dios une, xi albate: ‹Chasut ta lum, yuʼun te lalik talel. Yuʼun ta lum pasbilot, jaʼ yuʼun ta lum chasut batel› (Jenesis 3:19).
¿Kʼusi skʼan xal taje? Kʼalal skʼan toʼox xichʼ pasel yuʼun Dios li Adane, ¿mi jaʼ toʼox jun kuxlejal ti mu xvinaj ta kʼelele? Moʼoj, yuʼun lum noʼox ti chʼabal xkuxlejale. Jaʼ yuʼun, kʼalal chasut ta lum xi skʼoplal li Adane, jaʼ skʼan xal ti chchame. Kʼalal cham li Adane, muʼyuk bu xpas ta jun kuxlejal ti mu xvinaj ta kʼelele, yuʼun te laj˗o skʼoplal, te tupʼ˗o skʼoplal li xkuxlejale.
Pe ¿kʼusi xuʼ xkaltik ta sventa li buchʼutik chamemik xae? ¿Mi te van laj˗o skʼoplalik ek? Taje jaʼ tstakʼ li Vivliae.
«[Li krixchanoetik xchiʼuk li chonbolometike] jun yavil bu chbat skotolik. Koʼol likemik tal ta pukuk xchiʼuk skotolik tsutik batel ta pukuk» (Eklesiastes 3:20).
«Li buchʼutik chamemike mu xa kʼusi snaʼik jsetʼuk» (Eklesiastes 9:5).
«Laj xa skʼoplal ti chkʼanvanike, ti chpʼajvanike xchiʼuk ti ch˗itʼixtavanike» (Eklesiastes 9:6).
«Chʼabal xa cha˗abtej, chʼabal kʼusi chanop chapas, chʼabal xa kʼusi chavojtikin xchiʼuk chʼabal xa kʼusi chavaʼibe smelolal li ta Mukinal ti bu chabate» (Eklesiastes 9:10).
«Tsut ta pukuktik li [krixchanoe]; li vaʼ kʼakʼale, chlaj skʼoplal li kʼusitik tsnope» (Salmo 146:4).
Jaʼ noʼox xuʼ x˗abtejik li buchʼutik kuxulik toe
¿Mi vokol chavaʼi xchʼunel kʼusi chal li tekstoetik liʼe? Mi jeche, nopbo skʼoplal liʼe: Jutuk mu skotoluk li viniketike jaʼ ch˗abtejik sventa smakʼlin li yutsʼ yalalike. Pe kʼalal chcham li vinik une, chil svokol li yutsʼ yalale. Bakʼintike, li yajnil xchiʼuk xnichʼnabe muʼyuk stakʼinik sventa smanik li kʼusi tslajesike. Bakʼintike oy skontra li vinike, vaʼun ch˗ilbajinbat li yutsʼ yalale. Nopbo skʼoplal avaʼi liʼ une: «Ti yuʼunuk kʼatajem ta jun kuxlejal ti mu xvinaj ta kʼelel li vinik taje, ¿kʼu yuʼun muʼyuk tsmakʼlin li yutsʼ yalale? Xchiʼuk ¿kʼu yuʼun ti muʼyuk chchabie?». Yuʼun melel kʼusi chal li tekstoetik laj xa jkʼeltike. Li vinik taje muʼyuk xa xkuxlejal, mu xa kʼusi stakʼ spas jsetʼuk (Salmo 115:17).
Li animaetike mu xkoltaj yuʼunik li buchʼutik chilik viʼnale xchiʼuk li buchʼutik chichʼik ilbajinele
Taje jaʼ skʼan xal ti mu snaʼik kʼusi yakal chapas li buchʼutik chamemik xae, mu xiloxuk, mu xchikintaboxuk, mi jaʼuk xuʼ skʼoponoxuk. Jech oxal, muʼyuk srasonal ti chaxiʼtaane, yuʼun mu xuʼ skoltaoxuk mi jaʼuk xuʼ xilbajinoxuk (Eklesiastes 9:4; Isaias 26:14). ¿Mi jaʼ skʼan xal ti muʼyuk xa chchaʼkuxiik li buchʼutik chamemike? Moʼoj. Ta tsʼakale chkalbetik skʼoplal li chaʼkuxesele.
