Toj echʼ xa noʼox chopolik xchiʼuk xibal sbaik li Satanas xchiʼuk spukujtake. Ta voʼnee, li Satanase la smilbe xchonbolomtak xchiʼuk smosotak li Jobe. Laj une la stak talel «tsatsal ikʼ» sventa smilbe li lajunvoʼ xnichʼnabtake. Ta tsʼakal une jaʼ xa lik yakʼbe svokol li Jobe, laj yakʼ ti stsakat ta tsatsal kʼaʼal chine, lik ta xpachʼomal yakan kʼalal to ta sjol (Job 1:7-19; 2:7).

Li ta skʼakʼalil Jesuse, li pukujetike la spasik ta umaʼ xchiʼuk ta maʼsat li krixchanoetike (Mateo 9:32, 33; 12:22). Jun veltae la stikʼ sbaik ta yoʼonton jun vinik, laj yilbajinik tajek xchiʼuk laj yakʼik ti akʼo sbojilan sba stuk ta tone (Markos 5:5). Jech xtok, la stikʼ sbaik ta yoʼonton jun kerem, tsots laj yakʼbeik svokol ek, x˗avet noʼox yuʼunik, tsjipulanik ta lum xchiʼuk «tsots la slikesbe stupʼ-ikʼ» (Lukas 9:42).

Avi li Satanas xchiʼuk spukujtake jech˗o lek xaʼi chmilvanik. Ta skoj ti laj yichʼik jipel tal ta balumile, mas to kapem sjolik. Buyuk xa noʼox xkaʼitik ta spʼejel balumil ti chilbajinik xchiʼuk chakʼbeik xchamel junantik krixchanoetike. Junantike chilbajinik ta akʼobaltik, mu x˗och svayel yuʼunik xchiʼuk xibalik sba kʼusi chvaychinta yuʼunik. Yantik xtoke tstsatsal chiʼinik ta vayel. Junantik xtoke tslikesbeik xchuvaj, tstijbeik yoʼonton ti xmilvanike o ti smil sba stukike.

Lintina ti te nakal ta Suriname laj yal ti oy jun pukuj ti milbat 16 ta voʼ yutsʼ yalale xchiʼuk ilbajinat xchiʼuk akʼbat svokol 18 jabil li stuk eke. Li kʼusi la snuptan Lintinae te laj yal ti pukujetike «lek xaʼiik chakʼbe svokol xchiʼuk tsmilik li krixchanoetike».

Li Jeovae xuʼ xchabi yajtuneltak ta stojolal li Satanase (Proverbios 18:10).