Li Satanas xchiʼuk spukujtake muʼyuk xa jal tsloʼlaik li krixchanoetike, yuʼun li Jeovae sjipojan xa onoʼox talel ta balumil (Apokalipsis 12:9). Ta tsʼakal jutuk xtoke, li Diose tslajesbe skʼoplal li Satanas xchiʼuk spukujtake. Xi akʼbat yil yuʼun Dios li jtakbol Juane: «Laj kil yakal chyal talel ta vinajel jun anjel ti stsakojbe syaveal li xabe xchiʼuk ti stsakoj talel jlik mukʼta kadenae. Vaʼun, la stsak li dragone, li voʼneal kiletel chone, ti jaʼ Diablo xchiʼuk Satanase, la xchuk jmil jabil. Laje, la sjip ochel ta xab, la sbaj xchiʼuk la smakbe lek stiʼ sventa mu xa sloʼla li lumetike, jaʼ to mi tsʼaki li jmil jabile» (Apokalipsis 20:1-3). Ta mas tsʼakale, li Diablo xchiʼuk spukujtake chichʼik˗o lajesel ta sbatel osil (Apokalipsis 20:10).

Li Diose tslajesbe skʼoplal ek li chopol krixchanoetik ta balumile (Salmo 37:9, 10; Lukas 13:5).

Mi laj xa ox yichʼik chukel li Satanas xchiʼuk spukujtake, li Jeovae chakʼbe ep bendision li krixchanoetike. Teuk me ta ajol ti mu xa kʼusi snaʼik jsetʼuk li animaetike. Li Jesuse la skoʼoltas ta vayel kʼalal oy buchʼu chchame, ti ochem tajek svayele, jaʼ noʼoxe muʼyuk chvaychinaj (Juan 11:11-14). Ti jech laj yale yuʼun snaʼoj ti xuʼ xichʼik tijel likel sventa xkuxiik yan veltae. Xi laj yal li Jesuse: «Chkʼot yorail ti skotol li buchʼutik oy ta smukinalike [...] chlokʼik tal» (Juan 5:28, 29; koʼoltaso xchiʼuk Echos 24:15).

Chchaʼkuxiik yan velta ta balumil. Muʼyuk xa chkaʼitik chalik ti oy la buchʼu chame, ¡jaʼ xa noʼox chkaʼitik ti oy xa buchʼu chaʼkuxiike! ¡Jaʼ jun muyubajel ti ta jchʼamtik li kutsʼ kalaltik ti chchaʼkuxiik tale!