Lekik skotol li kuxlejaletik ti mu xvinajik ta kʼelel la spas Jeovae. Pe oy jun ti lik stoy sbae, taje jaʼ li Satanase, ti Diablo sbi xtoke. Ayan ta yoʼonton ti jaʼuk x˗ichʼat ta mukʼ yuʼun li krixchanoetike, ti maʼuk xichʼik ta mukʼ li Jeovae. Jkʼeltik avil kʼusi kʼot ta pasel.

Li Jeovae te laj yakʼ nakiikuk ta nichimaltik Eden li Adan xchiʼuk Evae. Albatik yuʼun Dios ti xuʼ sloʼik jutuk mu skotoluk li sat teʼetik xchʼi tee. Pe albatik ti oy jtekʼ ti mu stakʼ slobeik sate, yuʼun mi la sloʼike, ta xchamik (Jenesis 2:9, 16, 17).

Jun veltae, kʼalal jaʼo stuk te oy li Evae, tal kʼoponatuk yuʼun jkot kiletel chon. Pe ti jamal kʼope, maʼuk kʼopoj li kiletel chone, jaʼ kʼopoj li Satanase. Laj yalbe Eva ti xuʼ sloʼ li sat teʼ ti bu albilik yuʼun Dios mu stakʼ sloʼike xchiʼuk laj yalbe ti muʼyuk chchamike, pe yakal tsjut li Satanase. Lek xa xaʼi la xchʼun li Evae, la sloʼ li sat teʼ, laje laj yakʼbe ek li Adane, vaʼun la sloʼ ek (Jenesis 3:1-6).

Liʼe chakʼ kiltik ti jaʼ jun jtoyba xchiʼuk jaʼ jun jutkʼop li Satanase, yuʼun laj yalbe Eva ti muʼyuk chchamik mi muʼyuk la xchʼunbeik smantal li Diose. Pe jecheʼ noʼox tsjut un, yuʼun chamik onoʼox li Adan xchiʼuk Evae. Li Satanase muʼyuk xcham, pe ta onoʼox xcham ta tsʼakal ta skoj li kʼusi chopol la spase. Avie, jech˗o tsjut kʼop li Satanase, tsloʼla krixchanoetik yoʼ mu xchʼunbeik smantal li Diose (Juan 8:44).

Ta mas tsʼakale, lik stoy sbaik yan anjeletik ek. Laj yilik ti toj kʼupilik sba li antsetik ta balumile, vaʼun yalik tal xchiʼuk lik xchiʼinik ta vayel. Laj yichʼ sbekʼtalik, xkoʼolajik xa ta viniketik la spas sbaik sventa xikʼik li antsetike. Pe taje maʼuk oy jech ta yoʼonton li Diose (Jenesis 6:1, 2; Judas 6).

La xchiʼin yolik li antsetike, pe li yolike toj echʼ xa noʼox mukʼtik bat xchiʼuk simaronik tajek. Taje laj yil˗o tajek svokol li krixchanoetike. Vaʼun, noj ta choplejal li balumile. Jech oxal, li Jeovae la snop chakʼ talel nojelal ta voʼ sventa slajesbe skʼoplal li choplejale. Jaʼ xa noʼox kuxul komik li Noe xchiʼuk yutsʼ yalale (Jenesis 6:4, 11; 7:23).

Li anjeletik ti laj yichʼ sbekʼtalike muʼyuk xchamik, sutik batel ta vinajel. Pe laj yichʼik kastigo. Muʼyuk xa laj yichʼik chʼamel ti bu oy li yaj˗anjeltak Dios ti tukʼ yakʼoj sbaike. Jech xtok, muʼyuk xa laj yichʼik akʼbel permiso yuʼun Jeova sventa xichʼik yan velta li sbekʼtalik kʼuchaʼal li krixchanoetike. Vaʼun, ta tsʼakale ta xichʼik chapanel mi kʼot li smukʼta kʼakʼalile (2 Pedro 2:4; Judas 6).

Li ta 1914, lik paskʼop li ta vinajele. Xi chal ta Apokalipsis li kʼusi kʼot ta pasele: «Lik paskʼop ta vinajel: la spasik kʼop xchiʼuk dragon [jaʼ xkaltik, li Satanase] li Miguel [ti jaʼ li Jesukristoe] xchiʼuk li yaj˗anjeltake, la spasik kʼop ek li dragon xchiʼuk li yaj˗anjeltake, pe muʼyuk bu kuch yuʼunik, jech xtok, muʼyuk xa la sta yavilik ta vinajel. Jaʼ yuʼun, laj yichʼ jipel yalel ta olon li mukʼta dragone, li voʼneal kiletel chone, ti Diablo xchiʼuk Satanas akʼbil sbie, ti jaʼ yakal tsloʼla skotol li jnaklejetik ta spʼejel balumile; jipat yalel ta balumil, koʼol jipatik yalel xchiʼuk li yaj˗anjeltake».

¿Kʼusi kʼot ta pasel un? Xi to chal li ta Apokalipsise: «Ta skoj taje ¡kuxetuk me avoʼontonik vinajel xchiʼuk li voʼoxuk ti te nakaloxuke!». Li anjeletik ti tukʼ yakʼoj sbaike xmuyubajik ta skoj ti chʼabal xa te li Satanas xchiʼuk li yaj˗anjeltake. Pe ¿kʼusi kʼot ta stojolal li krixchanoetik ta balumil une? Xi chal li Vivliae: «¡Jaʼ toj abol sba li balumil xchiʼuk li nabe! Yuʼun te yalem talel Diablo ti bu oyoxuke, oy tajek skʼakʼal yoʼonton ta skoj ti snaʼoj ti toj komkom xa li yoraile» (Apokalipsis 12:7-9, 12).

Li Satanas xchiʼuk li yaj˗anjeltake tsloʼlaik xchiʼuk chakʼbeik svokol li krixchanoetike. Li yaj˗anjeltak Satanase pukujetik sbiik, jaʼik yajkontratak Dios xchiʼuk toj echʼ xa noʼox chopolik.